【同盟】胡定欣做进化版刁兰　完咗先feel到好过瘾：拍时好气馁

近排每到星期日就会有TVB剧集《同盟》嘅宣传活动，今日亦唔例外，早前远赴澳大利亚两星期拍摄节目嘅胡定欣同姚子羚今次终于回归，一齐同鲍起静、陈展鹏及陈山聪等《同盟》演员现身马鞍山同粉丝见面！呢套剧一播出唔少观众都同去年嘅《城寨英雄》比较，定欣就话拍《同盟》辛苦劲多：“之前系功夫，又巴西柔术又MMA又枪，全部由零开始学过，所以今次系进化版嘅刁兰。”摄影：温菁莉

提到上星期四𠮶集，影到定欣打到周身瘀，真系见到都心痛，她笑言拍嘅时候系有用化妆品遮盖，“但系水入面冲冲下就无晒，但有瘀痕起码证明我有拍过动作戏先喇。”定欣坦言当时拍摄嘅时候都好气馁，“我可以话《同盟》入面有95%嘅动作都系亲身上阵，好多时候动作做极都唔好，就会有力不从心嘅感觉。”她指自己都有好大进步空间，至于系咪想朝“打女”进发？定欣就认为，“无话我想唔想做打女，而系我觉得如果观众觉得我适合handle呢啲角色，其实我系好开心去迎接呢啲挑战。”其后续道，“入行10几年，可能有好多监制都见到我有舞蹈底子，都会加入一些动作嘅元素晌我角色。但挑战一次比一次大，我又学咗好多新嘢，都觉得好过瘾。”定欣坦言今次角色比刁兰疯狂，唔怕外界将两个角色比较，“大家会睇到动作比上次难度高，观众都见到唔同嘅演绎方法，始终背景年代都唔同。”

讲返活动上定欣同陈展鹏就玩游戏，期间更被其他演员要求陈展鹏跨过定欣嘅身体，问到会否feel到尴尬？定欣就话无，“大家唔好再朝住呢啲去谈论，对媒体嚟讲，可能系一个话题，但大家要讲嘅要答嘅已经答过，每一次答案都一样。唔通大家真系想见到我地尴尬先开心咩？既然我地咁辛苦去拍呢套剧，希望专注于剧集上，而唔系题外话。”至于她之前与一班好姊妹到澳大利亚拍摄节目《胡说八道去旅行》，定欣都话超级难得，“我前几日先返，但杏儿同豹嫂就仲系当地拍紧，我系好唔舍得，但我要返嚟宣传剧集，都无办法。”她直言私底下都好难可以一次过召集所有姊妹一齐去旅行，“个个都要开工，所以呢两个星期我铭记于心。”

而有网友表示今次《同盟》会在下个月13/9（星期三)大结局，对于安排甚为不解。监制文伟鸿就表示，“因为当初原定播出时间是星期一至日，但后来公司希望星期一至五播，所以就在星期三做大结局。”