《同盟》68岁郭锋3个打8个　唔用替身好霸气：入嚟打你！

TVB新剧《同盟》系咪向功夫片致敬？继陈展鹏同胡定欣打到反转再反转之后，昨日第5集就轮到郭锋带埋两个仔黄长兴、杨证桦入更衣室3个打8个，66岁嘅郭锋依然好抽得，仲摆出李小龙嘅经典姿势。同场嘅黄长兴接受电话访问时就大赞郭锋，更指郭锋完全冇用替身添！好劲呀！

郭锋拍戏几十年都拍过好多武打片，不过拳打脚踢呢啲招式比较少见，昨日《同盟》讲郭锋个仔黄长兴同人踢波，点知对方球员出茅招整伤咗黄长兴，所谓整伤其实只系只脚流咗少少血，郭锋一怒之下就拉埋黄长兴同杨证桦杀入更衣室找晦气。

郭锋好霸气咁讲咗4粒字：“入嚟打你”就一手将对方推埋墙狂打，更衣室内其他人即冲埋嚟，郭锋3人个个好似《古惑仔》洪兴出身咁将对方8个人打到落花流水。郭锋身手了得，出拳狠劲，睇落真系拳拳到肉，更多次发出李小龙式叫声，果然宝刀未老，三扒两拨就将对方全部打低。

喺戏入面饰演郭锋二仔嘅黄长兴接受《香港01》访问时大赞郭锋：“佢身手几好㗎！我同佢之前都合作过，佢keep得好好！呢场戏佢唔使替身，喺镜头都见到佢个样，你见到飞嚟飞去𠮶啲都系被打𠮶啲，佢哋就要用替身。”黄长兴称呢场打戏系要畀观众知道佢哋一家人好打得，之后仍然会有动作场面，但拳脚较少，多数揸枪咁话。

而早前郭锋爱妻欧阳佩珊去世，黄长兴等《同盟》演员都有慰问：“我哋有个group嘅，佢喺个group讲咗佢屋企嘅事，我哋唔想打扰佢所以只系慰问咗句，佢话之后会约我哋出嚟食饭。”黄长兴又透露佢饰演嘅韦以强会死，因而导致韦家同令家仇恨加深，但系详情佢就唔肯讲住，自己睇㖞！