专访｜林景程弃高薪追梦家人不认同　遭父指受骗入行：佢系金钱派

《万千星辉颁奖典礼2024》上月结束，部分奖项引起争议，然而对于“最佳男配角”奖，网民却是一致好评。看著林景程获奖时在台上声线抖震，惊讶得快要窒息的样子，大家都相信，他事前肯定是不知道的，这个奖肯定不是造马。网民留言：“地产𠮶阵抵攞啦！”、“默默耕耘，实至名归！”、“终于挨出头”等等，似乎都非常替他高兴。尽管其演技获得观众、公司认可，然而支持者却不包括其父亲，即使已做艺人十几年，父亲仍觉得他只是玩玩而已，深信他终有一日“玩够”就会走。而其实林景程素来都是一个没什么自信，常常陷入自我质疑的人，总觉得自己做得未够好。
场地：New York Cut

大学时期是歌唱比赛常客　曾夺荃湾区冠军

很多人知道林景程另一个身份是物理治疗师，这一科不易入，想必读书时要有一定成绩才能获取录，他却否认以前是“学霸”，指读书时成绩都是在中游位置徘徊，“HKCEE（会考），考完我到而家都唔知点解，我有25分㖞。”其实他中学时已经想读演艺，纵使不实际知道演艺学院为何物，却以为读到演艺就等于入到娱乐圈。母亲说：“好，你考埋个会考就试吓啦。”殊不知有25分，简直是意料之外，“我阿妈就更加系顺势同我讲真系唔好嘥，同一时间我又觉得真系唔好嘥㖞，读埋个中六中七。可能真系上天眷顾啦，报咗物理治疗真系又入到，又觉得唔好嘥㖞，跟住我阿妈又话真系唔好嘥喇，不如你读埋，咁你跟住咪去啰。”

问十个父母，至少八、九个都希望仔女做专业人士，景程的双亲也一样。他成长环境物质不缺，父亲做地产、哥哥做大律师，他知道母亲其实不想他读演艺的，尤其对林母来说，娱乐圈是个复杂的大染缸、怕宝贝仔一入去就学坏，又怕他冇能力养活自己。尽管家人没有硬性去阻止他，但慢慢地一路一路读到上去，他觉得妈妈的“唔好嘥”策略成功了，因为他逐渐已失去对演艺的兴趣，“读完书都20几岁，呢个年纪入行都叫大，所以我𠮶时都觉得算啦，唔好搞咁多嘢。”话虽如此，但景程大学时未停止过参加各区的歌唱比赛，他说：“𠮶阵时你明明唔系呢个区住嘅，你又会报埋呢个区，佢又受你报，咁你就梗系当自己喺呢个区住啦！今日去呢个区，下个礼拜去𠮶个区……”问到最好成绩的一次，他思考半响说：“好似系荃湾区，叫做攞咗个冠军，但系其实唔犀利㗎，因为好多唔同嘅歌唱比赛其实都输到无影。”

父亲金钱挂帅　觉得做艺人只是玩票及被骗

一个刚刚毕业的物理治疗师，人工已达三万，比起未知前景的电视台艺人，当然优厚一大截，对于要转行，林景程原本以为父亲不会太有意见，但他慢慢意识到对方其实并不想他走这条路，他说：“佢都会有我头先讲𠮶个概念，就系钱㖞，你可以揾多好多㗎㖞，你𠮶边搞唔搞得掂㗎？或者你搞得掂都好，点解你唔揾多啲啫？去到早两个礼拜同佢饮茶，佢都仲同我讲紧呢样嘢。”林爸爸当时说：“你𠮶边都系玩吓㗎啫，玩多几年嘅啫，系咪呀？唔紧要呀，你呢边揾到钱得啦，你迟啲都会做返（物理治疗）。”景程感谢父母，年轻时努力揾钱打拼，他才能过上无忧生活，可以去谈理想，因此即使父亲在他入行十多年仍认为他是“玩吓”、试图潜移默化他“回头”，他也能够理解，毕竟对上一辈来说，钱真的很重要，所以他只会将这个问题看成两个世代的相法差异，也不会试图改变对方。

他认为父亲是个典型爸爸，很内敛，有话不会直接讲，“佢会用一个对佢嚟讲讲笑嘅方式表达，所以我觉得，我接受，我听到佢呢句我feel到佢对我嘅关心㖭，其实我𠮶吓仲好冧。（咁你点回应）系呀系呀，再算啦，再算啦。”前阵子，景程陪父亲其好友饮茶，席间一众长辈用潮州话交谈，他虽然也是潮州人，却不会听潮州话，“佢直程话用潮州话同佢啲朋友讲，我个仔做电视，系呀，佢俾人呃呀。佢签咗电视，俾人呃，迟啲冇㗎喇，唔紧要，冇事嘅。”对于被父亲当“傻仔”，景程没感到难过，反倒与得父亲可爱，“喺佢概念嚟讲，佢觉得呢行系唔好嘅，佢就自然同人倾偈都唔想将佢个仔唔好嘅一面表露出嚟，所以佢就话系俾人呃啰。实质上系咪俾人呃，梗系唔系啦，但系佢会用另类嘅形式去保护佢自己个仔。”

父亲曾拒收家用　全数塞在铁闸归还

笔者问道，父亲会不会只是口硬心软而已，很多亚洲家长都会如此，心里其实逐渐认同，却不一定会表露出来，景程听罢笑了几声说：“哈哈哈，我谂冇，因为佢好坚定系金钱派嘅长辈嚟，佢𠮶一代系一定睇住钱，所以我谂除非我话畀佢听，我而家做戏揾钱多过做物理治疗，咁我谂呢个就会可以同佢倾嘅嘢。”而事实上，景程现在打两份工，人工绝对低过做全职物理治疗师，他知道如果自己专心一意做物理治疗，全家的生活水平都有所提升，因此他也自言自私，亦正因如此，他坚持不会让家人为自己的选择“埋单”，该给的家用尽量都不去减，“因为呢个我嘅抉择，我抉择咗，Suffer嘅应该系我，唔应该影响到佢哋。譬如好似家用咁，我阿爸其实知好多嘢，佢心里面好多谂法，家用就坚持唔收好多，我要去到闹交咁样同佢讨论，最后先畀到一嚿钱佢。”

景程讲到有一次他畀完家用后，突然收到爸爸来电说：“我塞咗（家用）喺门度，你快啲攞返，唔好俾人拎咗呀！”原来林父将景程交的家用全部提了出来，去到他家门前，将钱全数塞在铁闸里，然后扬长离去，更说：“我唔要咁多！”明知家人为自己好、怕他没钱用，景程窝心又内疚，但由于知道父亲为人较固执，为免吵架，他也就没再塞回去，“再塞畀佢就会嘈，呢个就系我头先讲嘅无谓嘅嘈吵，大家都系关心大家，如果真系唔要，你又知道其实佢个生活上面个钱系足够嘅，咁嘅前提底下我就冇再同佢……因为最后我有同佢倾过，我俾一半，佢岌头OK，所以有结论喺度就OK。”

参加《巨声》入行后　发现自己非歌手材料

林景程近年拍摄了不少令人印象深刻的角色，演技也备受认同，不过他当初是透过歌唱比赛入行，分别参加过《英皇新秀歌唱大赛》、《超级巨声》，还记得上面提到景程曾是比赛的冠军级人马吗？问到他是何时开始意识到自己想做歌手，他竟说：“我谂应该系咁讲，应该系去到某一个点，我知道自己唔想做歌手。”正是《巨声》，他发现世界真的天外有天、人外有人，何雁诗、许廷铿、刘威煌等个个水准都很高，自己反而只是个BB班、门外汉，头两集他已信心尽失，“佢哋嘅音乐造诣，佢哋想表达嘅嘢真系可以摆到喺音乐里面，which is我做唔到，所以我𠮶刻觉得我同佢哋系唔同嘅Level嚟㗎。如果真系要喺乐坛做呢样嘢嘅话，我觉得𠮶个应该系佢哋，去到𠮶刻我就觉得，唱歌对我嚟讲，唔会去到好好嘅地方，只不过系我其中一个钟意做嘅嘢，但系钟意做唔代表一定做得好。”他甚至谓：“我呢种如果做咗歌手，会影响呢个乐坛啰！（咁严重？）冇错，系真系好确定！”

2009年签约无线后，景程其实有出过歌的，那是一首儿歌，动画《Battle Spirits少年突破马神》的主题曲《Go Ahead!》，笔者听过，感觉颇热血，他却表示正是因为这首歌，他更确认自己真的不是歌手材料，“其实𠮶段时间冇嘢做，机会好少，突然之间佢话畀你听有首儿歌畀你，你梗系想把握！你尽咗你嘅能力去做，得到个效果你系好唔满意，而佢哋真系尽咗力去帮你制造呢首歌㗎喇，所以就更加确定咗，其实你真系唔啱，唔好夹硬嚟。”

景程初入行时不懂兼顾两份工作，试过临时被TVB召回去，要取消诊症，他觉得这样很对不起病人，于是把心一横放弃了物理治疗诊所的正职，偏偏艺员部一年只得几日工开，零收入又百无聊赖的他，便陷入了疯狂自我质疑的时期，“𠮶时成个人、成个状态系好混乱㗎，经济上面又会有出现问题，因为我cut咗好多物理治疗嘅工作冇做，呢行系咁得意，你一唔得闲嘅时候佢就会有通告，无啦啦叫你返去排舞，而家睇返，𠮶啲唔系一个演出，系一个彩排嚟。𠮶时梗系唔敢推，梗系返到足晒，但系你返到足晒嘅时候，又发现点解咁多人都冇嚟，原来可以唔返，但𠮶阵时唔识，咁我又好老实，佢叫我返咪返，所以就搞唔掂。”

被监制潘嘉德指衣衫褴褛　 却因一事获选中拍剧

回想当初与TVB签约，景程是冲著歌手梦想而去的，他甚至曾扬言：“我𠮶时就同自己讲，我冇同公司讲，如果你揾我拍剧，我一定唔会接，我净系要唱歌！哼！”然而他说：“但系点知真系揾咗我拍剧，咁我当然就唔会唔接啦，哈哈哈！”访问中，景程总说自己好好彩，在他最想放弃、一心等完约的时候，机遇突然出现了，他竟获潘嘉德监制邀请拍摄他人生第一套剧《On Call 36小时》，他第一个反应是：“拍剧呀？都唔系做音乐呀？”不过既然他都自觉唱得不好，约又未完，就硬著头皮接，还记得第一场他跟谢东闵、张慧雯、谢卓言几位新人轮住讲对白，NG了很多很多次，那刻他都心想，可能是最后一部剧了，但没关系啦，快完约了，岂料到后来，他已完完全全“返唔到转头”，有戏演才开心。

潘嘉德彻底改写了景程的演艺路，他直言：“去到边都系咁讲㗎喇，冇佢系唔会有我往后嘅日子，所有演戏嘅嘢都唔会出现，佢简直系垃圾桶执我出嚟！”他透露潘嘉德最初见到自己时，觉得他很不像样，“佢近排都讲返，话‘叫你上嚟见面，你一上到嚟头又唔梳，著到唔知点咁，污污糟糟。’但佢都肯畀机会去用我。”景程笑言，当初就连幕后人员都说他“真系唔系好得㖞”，但基于他的物理治疗师身份，潘嘉德才点头：“哦，咁OK㖞！”于是找他去演《On Call》的实习医生，景程难免有感而发：“以前读咗一样嘢，我以为喺呢个圈度用唔着，慢慢你又用得着㖞原来，你永远都唔知读过嘅嘢几时用得到。”

不渴望做主角　认太易满足未找到野心

如是者开始了拍剧生涯，景程亦做过很多行行企企的角色，根本也没想过行出街有人认得，至《香港爱情故事》的地产经纪与同期《杀手》的小秉，他终于被更多观众留意，角色也比以前多戏份和有深度，“两套都有啲回响，我记得我《杀手》死嘅时候，有次喺街度，总之行街，有人同我讲‘你死得好惨’，我话我死得好惨？生勾勾㖞我而家，但系好开心啰呢件事系！”近两年他都有份提名“最佳男配角”，《反黑英雄》的灿哥亦终于为他带来这个奖项，当讲到会否希望更上一层楼做主角，他想都没想就说：“冇㖞，其实我唔恨做主角。”他说自己很享受做有戏的配角，而更重点的竟是：“我觉得我做主角冇人睇。”

景程不知道自己有没有能力驾驭到主角角色，不想浪费宝贵的机会，“我唔会讲到好似以后都要净系做配角，如果机会到嘅话我会想，但系，如果你俾我而家呢一刻拣嘅话，我未Ready，我觉得而家喺唔同嘅配角里面揾到𠮶啲角色嘅生命，对我嚟讲已经系好好嘅事。”景程整个人感觉很随遇而安，也没有野心，他直认不讳，身边很多同事叫他要积极去争取，他其实也觉得演员要有野心才有推动力，对角色演绎也有帮助，然而现阶段他已觉得很开心、很满足，能够研究角色、能够做戏、与很好的对手对戏等等，“我而家仲未揾到𠮶个野心，我未揾到一个动机点解我要去搲咁多嘢，可能太易满足喇我个人，我都唔知，我都寻找紧自己。”

因艺人身份被病人质疑专业　拒绝就医

随住戏份和机会增多，问景程会否开始无法兼顾物理治疗师工作，他说幸好还应付得来，因为他现时已没再返诊所，主要去老人院工作，时间灵活得多。艺人做副业，很多人都以为会有“明星光环”，但对景程而言这不一定是优势，他入行早期仍在返诊所时，就曾被观众认得，对方更质疑其专业，拒绝被他治疗。他说：“其实我都唔知点解佢会认得我拍电视，因为𠮶时我都好少出镜，𠮶时我记得同佢做过一个检查，做完检查，我同佢解释咗个病症咁咁咁做，佢就同我讲‘系咪你做？’我话‘系呀！当然啦，唔使担心，我会跟。”佢话‘咁我唔做喇，你都志不在此㗎啦。’佢觉得我之后会唔做，会去做电视。”

景程坦言当下都有难受，但很理解病人的决定，既然畀了钱，为何不去拣一个能100%有时间跟进自己的治疗师呢？而这亦进一步催化了他不再做诊所的决定，只要他一日仍要拍剧，他都不会再返诊所任职，“因为原来喺佢哋眼中嘅影响性唔系净系我谂咁样，话约唔到Case，原来系佢对我个信心上都会影响到。呢个系直接影响病人嘅嘢，虽然我知好多病人唔介意，但会影响到一个，我都唔想。咁不如喺我真系冇时间处理呢件事嘅就唔好做，做唔到嘅唔好做，唔好迫自己去做。”

很多人都关心景程之后会否继续物理治疗工作，他直言经常都会思考这问题，两边都有挣扎，到底应否做全职演员或全职物理治疗师，“我会谂全职做演员嘅唯一原因，可能就系，要全职做演员我可以生活到，呢个系最紧要，因为我有家庭，我都要为我嘅家庭负责。”若家里经济出现问题，他也逼于无奈要放弃演员身份，不过他仍衷心希望：“可能唔好全职啰，可唔可以八成物理治疗，两成畀少少我做返演员做嘅嘢啦。”

后记：

访问其实在林景程还未获颁“最佳男配角”时做，得奖后记者曾问他，父亲反应如何、可有因奖项改观，终于知道他已不是玩玩吓，而且是个受观众喜爱的演员。他说爸爸都有问：“有冇奖金？”、“冇咁拎嚟有咩用㗎？”景程只回答：“冇钱㗎，做个纪念㗎咋😂”虽然从他的反应，也看得出父亲确实金钱挂帅，但其实大家都明白，林爸爸的出发点就是对儿子的爱，怕景程不够钱用、怕景程生活得不好，这又岂会不是爱呢？

传统华人社会，父母总不轻易将爱宣之于口，爸爸即使认同、支持，也不一定会说出口，而景程就笑言：“我谂要去到有一日，佢见我好清闲，唔使挨更抵夜咁返工都生活得好好，肯定咗个仔生活无忧仲有得剩，咁佢先会显露更多认同。”不知道甚少留意娱乐新闻的林爸爸有没有机会看到这个报道，但如果他见到的话，希望他知道，你的儿子是很多观众心目中的好演员！