【仲讲龙哥？】苏民峰出山Rap新歌 重夺玄学家Rapper一哥地位
撰文： 何志衡
出版：更新：
龙哥独有嘅freestyle超度方式令佢迅速成名，坊间有人恶搞成Rap歌版本，不过龙哥好快就out咗，连《BigBoys历险记》都cut晒佢啲“戏”呀阴功！不过讲起玄学界Rapper，都好难取代到大家心目中的苏师傅苏民峰，而咁啱苏师傅最近都Rap咗新歌㖞！
其实10年前苏民峰已经为有线嘅《峰生水起精读班》唱过主题曲，当年都系Rap㗎！仲早过麦玲玲同农夫首《风山水起》。今年奇妙电视新节目《中伏》亦由苏师傅主持兼唱埋主题曲，苏师傅喺佢专页都有放少少录歌时嘅花絮，冇唱10年师傅好似有啲紧张，开头跟唔到音乐，但系监制提咗句佢就即刻跟到喇！可惜片段太细声听唔清楚师傅唱乜，但都听得出佢系Rap紧歌。
虽然有苏师傅坐镇，但原来个节目系同玄学无关，点解呢？据闻又系被TVB嘅潜规则所限，事缘苏民峰喺“Big Big Channel”有个玄学频道，会开live讲2018年生肖运程，于是乎就唔可以喺其他电视台做玄学节目嘞。
咁《中伏》系咩节目呢？奇妙电视回复：“系一个讲法律漏洞嘅节目，例如你做咗啲行为可能犯咗法都唔知，咁就中伏。”而苏民峰系主持之一，每集会请一啲律师、名人等做嘉宾，而苏民峰首歌好快就有得听㖞。