《关公大战外星人》导演玩穿越　未来版陈浩南打到入内地

《古惑仔》你一定睇过，《关公大战外星人》你冇睇过都一定听过（YouTube有得睇），如果捞埋会变成点？陈浩南揸住《星战》光剑你又见过未？

《关公大战外星人》导演梁仲文最近有新作叫《香港大师》，恐惧鸟编剧，同《关》一样系科幻片，讲未来世界出现了一班叫铁头人的改造人部队维持社会秩序，但铁头人手法过火滥杀无辜，甚至凌驾警察，一班过气古惑仔为守护同伴，连同一个叫“香港大师”的神秘人物共同对抗敌人，而一班主角造型都几似郑伊健版本嘅《古惑仔》。《香港大师》今日发放咗新预告片，男主角Matthew Manson长发造型确系令人想起郑伊健，“冲三小”人物设定都系以山鸡、包皮为蓝本，另外睇开cult片都会认得嘅Sam哥，女角就有谭淇淇同埋YouTuber曾乐彤。

导演梁仲文接受电话访问时表示系有意模彷陈浩南：“同投资方倾过，《古惑仔》喺内地好多人钟意，套戏又系讲古惑仔，咁不如试下用番𠮶啲形象去玩套科幻电影啦！当系致敬作品。”不过《香港大师》由内地投资，暂时只会9月开始喺内地国内收费频道播放，香港睇唔睇到就未知，而黑社会题材嘅电影从来绝迹内地，《香港大师》又点过到关呢？“呢个答案好有趣，因为故事设定喺未来嘅一个架空世界，尽量将现实世界缩到好细，古惑仔呢个称呼就好似古代武士、忍者咁被神化咗，唔系真正嘅黑社会，仲讲黑社会好老土！”梁导演补充：“本来个设定就系咁，可以话系错有错着咁避开咗内地呢个审查问题。”

6年前嘅《关公大战外星人》有很多反建制元素，但新作主打内地市场仲可以有所讥讽吗？梁导演就自我反省：“我觉得《关》要讲嘅嘢太浅薄，乜都直接讲晒出嚟，对我嚟讲可以话几懒；呢几年我进步咗唔想咁多抽水嘢，民生、现代社会发生嘅事都有讲，但既然要打入内地当然唔可以讲到咁出啦！但我唔系惊封杀。”

梁导演再次拍cult片依然低成本，佢表示花咗接近7位数，大部份花喺特技上面：“呢个成本喺戏院放有啲勉强，作为网络电影就几吸引。”