【赌城群英会】强奸戏照抄《赌圣3》 　吴家乐：条桥我哋冇权理

TVB剧《赌城群英会》嚟到结局篇，有睇开嘅都想知有乜惊天地泣鬼神嘅桥段，但系昨晚𠮶集吴家乐为咗测试马国明系咪扮盲，于是喺佢面前强奸佘诗曼𠮶场戏，竟然系照抄2000年嘅《赌圣3之无名小子》。吴家乐回应《香港01》时就好尴尬咁讲：“剧本几时轮到我哋啲小演员参与吖！我哋冇权批评任何剧本嘅嘢！”

王晶话晒曾经系桥王吖！当年佢监制兼导演嘅《赌圣3》，张家辉为咗留绝招喺赌局使出于是扮盲，奸角黎骏为咗试下佢真盲定假盲，就潜入张家辉屋企喺佢面前强奸舒淇，张家辉一路睇（听）住电视播《奖门人》一路笑嚟掩饰，睇到观众心都噏晒！

但系今时今日呢场戏竟然照办煮碗重拍一次！昨晚同样系王晶监制嘅《赌城群英会》出现几乎完全相同嘅剧情，马国明扮盲，奸角吴家乐又系潜入佢屋企，为试佢系咪真盲喺佢面前强奸佘诗曼，电视又系播紧《奖门人》，马国明又系以笑嚟掩饰，隔咗17年王晶系想我哋观众怀旧，定真系冇晒桥呀？

《香港01》致电喺剧入面强奸佘诗曼嘅吴家乐，佢听见两段剧情咁相似都有啲愕然，但表示唔记得有冇睇过《赌圣3》：“张家辉𠮶套唔记得有冇睇过喇，真系咁似？”吴家乐话拍摄时王晶唔在场，整套剧有4个导演：“我哋都系睇剧本，导演决定点拍㗎啫！至于条桥系点我哋冇权理，剧本几时轮到我哋啲小演员参与吖！我哋冇权批评任何剧本嘅嘢，如果讲条桥就一定系正啦！”佢补充呢场戏系拍晒澳门场景之后，隔咗1个月至喺香港拍摄，但系场戏咁似王晶自己嘅旧作，吴家乐就话：“我都想睇番《赌圣3》睇下系咪咁似，但或者系王晶想recall番大家嘅记忆呢！好似何浩文有场戏做鸭，都似《鸭王》、四哥（谢贤）造型都似佢旧作㗎，我怀疑系晶哥专登攞番出嚟！”原来王晶咁想我哋怀旧，咁我都系攞番啲旧戏出嚟睇算喇！