手机见鬼｜女主角林明祯放飞机首映礼　彭发嬲爆：唔系咁简单就算

由香港著名导演彭发执导的电影《手机见鬼》今晚于尖沙咀举行群星首映礼，大会突然宣布女主角林明祯有事缺席今晚首映礼。对于林明祯突然缺席首映礼，导演彭发接受《香港01》访问时直言十分之失望：“佢话佢冇咗本护照，我又唔觉得会系拍拖拍到唔见咗本护照。（佢喺马来西亚？）佢喺边我唔知，总之冇护照系出现唔到嘅。（佢冇同你交代佢身处何方？）佢梗系冇同我交代啦。（嚟近之后佢揾返本护照会否为电影宣传？）我真系唔敢讲唔敢答啦，今日佢够话佢出席，突然就话唔到。（冇直同你单声嚟唔到？）佢揾我唔到，但我都唔会揾佢。”

被问到担唔担心影响电影宣传？彭发续说：“呢个我担心唔到，反而真系要同所有记者讲声唔好意思，同埋最惨系主办方，我系觉得有啲内疚，因为好多条件都签晒合约，呢啲系要配合，始终冇咗一位主角出现，𠮶条数一定捉我哋计，唔系咁简单就算。（会唔会叫林明祯找数？）咁呢啲交返俾宣传部，的而且确系麻烦。（佢冇嚟有冇失望？）咁梗系有失望，亦都咁多年拍戏未试过主角嚟唔到，我都愕咗然呀。（会唔会林明祯怕要再回应Edan所以缺席？）呢个我唔知，同埋我冇留意呢啲新闻，我自己都顾唔掂，仲点会要顾人呢。（会唔会考虑再揾佢拍戏？）唔系我要考虑，系啲宣传同老板佢哋考虑，唔到我去揾啦。”