罗力威事隔四年复出乐坛5位数自资出歌　获大批粉丝现身撑场

罗力威今日（18日）出席“购物节启动礼”，并担任活动宣传大使，以及现场唱歌助兴，吸引多达20多名粉丝举牌呐喊应援。罗力威接受《香港01》访问表示：“我估有四至五年冇出嚟唱歌，我个大女而家四岁，印象中如果我个女儿系四岁，咁我就有四年几冇出嚟！今次系第一次出返嚟公开唱歌。”

自觉升格父亲性格开朗

提到是否很紧张，他坦言：“紧张系有，但系自信都有，担心都有，紧张好耐冇唱歌，对自己嘅音乐好有自信。谂紧咁耐冇唱歌会唔会好似二字头𠮶阵，而家都已经三字头，就嚟接近四字头，谂紧会唔会好似以前咁有power同放得开。”他继续指自己已经比较开朗一点，并表示：“我以前一路都系收收埋埋嘅一个人，呢10几年都系好收埋自己，成为咗爸爸同丈夫，好难在收埋自己，多啲同小朋友玩，自己就开朗咗。”

透露自资五位数出歌

被问到会否担心粉丝变少，他幽默表示：“其实随着时间冇唱歌越耐，就一定会，亦都系好自然嘅事，但好有信心当我好用心将自己嘅心血摆咗喺自己嘅新歌，我相信会感动返一班旧嘅歌迷，感染到新嘅朋友，我会应承大家喺两至三个月之内推出新歌。”讲到目前是否没有签约唱片公司，他说：“我冇签到唱片公司，主要都系自由身咁样做，我冇谂太多其他嘢住，我净系想专心做好新歌，跟住先再谂公司其他嘅嘢。”

提到自资出歌是否使费很大，他表示：“都要用好多钱，因为随着音乐去计可能都会拍MV，之后睇吓会唔会去到其他平台宣传，但呢啲都系做歌嘅基本开支。（使费是否高达六位数字？）其实五位数字已经好足够。”讲到会否希望参加颁奖典礼，他说：“如果我出咗新歌各大平台觉得好听，俾机会我去曝光或者亮相嘅话，我当然都好乐意将我嘅新歌畀多啲乐迷听。”

回应街头busking被警察赶离场

被问到较早前在街头Busking，却被警察赶离场，他表示：“我之后听返原来而家Busking可能会有警察嚟监管，因为收到投诉就会停止Busking，其实冇话咩特别原因，可能当刻有人投诉，个声音太大，其实都几经常发生，我都冇乜经验，我自己就好平安冇乜特别损失。”他透露为了弥补粉丝，有停留大方合照互动报答他们来支持。

被问《中年好声音》参加意向

讲到会否考虑参加《中年好声音》，他表示：“如果当我唔系每一集参加，原来我可以净系好舒服咁参加一次玩一集，咁都几好，咁样就会轻松好多，向呢方面比较谂多，唔系每一集要去，我知道呢件事系辛苦，辛苦到最终大家有回报，玩一集然后就返屋企，咁我就冇问题，希望自己个状态可以回复返参加歌唱比赛咁强嘅水准，去玩新嘅比赛都要对得住大家。”

退隐幕前四年经营网上生意

被问到过去的四年退隐幕前，主力做什么工作，他说：“我比较放得少喺音乐度，我其实喺背后有网上嘅生意会系做紧，我好难讲究竟正职上网卖嘢，定系专注喺音乐方面，我自己冇特别去分，我自己嘅性格从来都算系好收埋自己嘅人，冇话要去见人嘅时候通常都系收埋自己，收埋自己嘅时候就做创作，直到而家（网上生意）收入都系OK，我用咗几年嘅时间去摆咗喺新歌，出新歌嘅时候就要准备返自己嘅状态，可以开始放返低啲做生意嘅嘢，放返多啲比例就出嚟唱歌。”