【任噏乱评 】《超时空男臣》劲Hea都好睇过《前度》　其实好灰！

唔知大家8点半有无睇到TVB《超时空男臣》同9点半ViuTV嘅《玛嘉烈与大卫—前度》呢？前者未播之前有唔少网友都话套剧摆明抄韩剧《阁楼王世子》，玩穿越之外，又系由古代返现代揾返失散咗嘅太子妃。到放工漏夜用myTV SUPER睇番《超时空男臣》，睇之前都冇抱寄望，都系为应付“脑细”先焗住望一望，点知睇完嘅感觉系好似啲贺岁片得啖笑，无咩剧情但求开心笑下，但笑下啲时间又好快过㖞！笑完之后就开apps睇玛嘉烈与大卫，ViuTV果然系ViuTV，用16：9加上下黑边，电影感好强！加上袁澧林同刘俊谦咁靓女靓仔真系好过睇啲绿色嘢护眼，btw成套剧就系不停拍到佢地好靓好正，画面太美，但观众就死咗啰，点解？因为闷到死咗呀，睇咗好耐都唔知想讲咩。好彩套剧得20分钟咋，如果系播1个钟嘅话，我应该会选择去瞓觉！！！

《超时空男臣》套剧暂时嚟讲我最深刻嘅唔系三位穿越到现代嘅袁崇焕、左光斗同李进忠，而系张诚。饰演呢个角色就系有“完美奸人”之称嘅郑子诚，佢系第一集戏份都好重，隔住𠮶mon都闻到阵奸味，有几幕佢仲要旁白，好似听紧收音机咁（明明系奸戏嚟㗎嘛！），唔知佢会唔会出现系现代，如果有我觉得套剧会更有追看性。讲返𠮶三位主角萧正楠、曹永廉同何广沛先，萧正楠曹永廉今次就食住《公公出宫》条水，再拍住上拍剧，我又唔太期待佢地有咩演技。但何广沛近年就几乎每隔几个月就见佢有新剧出，今年3月播嘅《亲亲我好妈》佢饰演嘅文亮熙又pure又true嘅style，系TVB真系买少见少。今次系《超时空男臣》扮太监都几似，而且把声真系几阴柔，唔知之后会唔会被定型系古装剧就做太监呢？(希望唔会！！)只不过有好多人都话啲历史完全错晒，其实唔明大家点解会觉得咁出奇…TVB嘅嘢…你懂的！

实不相瞒《前度》呢套剧我真系期待咗好耐，当然系私心想睇两位男女主角喇，始终套剧有佢地加持好似唔同啲咁。第一集虽然短短20分钟，已经系返望表，因为真系有啲闷，唔似之前《诡探》咁有张力，要一个钟先够喉。《前度》呢套剧系啱播20分钟，男女主角几靓仔靓女都好，剧情太闷太长会恰着咗。最重要嘅系袁澧林、刘俊谦对白真系唔多有啲失望，反而女二杜小乔讲得最多（好似佢先系主角咁~），抢晒我女神啲对白,我唔系想睇你呀！！所以话呢，内容先最重要，男女主角有几靓都无用，起码《超时空男臣》胶得嚟都算系有些少剧情，笑下都好呀。就好似行紧电器舖啲电视机咁，靓机永远净系播画质靓到晕但内容闷到呕嘅4K试机片，同现实电视会播嘅节目完全唔同。