李尚正专访｜唔敢认系“有线一哥” ︰畀Loong 9听到会唔开心
《第四十二香港电影金像奖》将于4月14日举行，今年男配角竞争颇为激烈，有香港首位亚洲影帝（1970）姜大卫《白日之下》、金马影帝谢君豪《毒舌大状》及吴慷仁《但愿人长久》，就连11岁的黄梓乐《年少日记》，都提名过金马奖最佳男配角，位位都是实力人马，而第五位有李尚正。
人称“有线一哥”的李尚正，凭《死尸死时四十四》饰演保安员李保安，令全场爆笑。而当日宣布入围名单时，他的名字一出，都惹来一片夹集惊讶与惊喜之声。“除咗演戏演得真系好嘅，连演得唔系咁好都摆埋落去，令提名所涵盖的类别更广，等大家有得拣又有话题，仲可以突出真系好戏嘅人。”李尚正并不觉得自己好戏到要提名，正如他从不觉得大家称呼自己做“有线一哥”，是种赞美。
鸣谢︰
化妆：吕宜铃
发型：朱美嫦
场地提供：GON! Bar & Restaurant
“演得唔好都入围，先突出演得好嘅”
知道自己获提名最佳男配角，当然高兴，因为由拍完一刻，李尚正已担心不知最终会被删剩几多戏份。“自己不是主要配角，只希望唔好剪走晒就好安慰，但导演引述剪接的胡大为先生讲，觉得我演得几好睇，所以就冇剪走摆晒落去，变咗剪走咗人哋嘅演出，我喺度要同大家讲声唔好意思。”
李尚正讲嘢进退得宜，说话往往语带戏言，但又不时渗出几句真心话，正如问他点睇自己会入围，他似乎真的认真考量过。“你见美国奥斯卡都会拣啲完全不同类别嘅演员入围，令涵盖嘅类别更多。除咗演戏演得真系好好嘅，连演得唔系咁好都摆埋落去，等大家有得拣，又可以突出真系好戏嘅人，大家都开心啲。有啲演员系明显啲戏好唔得，但你又会好钟意睇佢。”边句真边句假，其实都冇所谓啦！
“畀利是保安最少100蚊”
阿正在戏中饰演保安员，自细有个朋友的爸爸正是做保安，所以听过唔少逸事趣闻，即使是常人经常拿来嘲讽的话题，阿正都明白背后原因，会以谅解或意会的心态看待。“如果你本身就好唔钟意保安呢个工种，你真系唔会演到到呢个角色……不过都演到嘅，因为你有人工收嘛。”
戏中一幕关乎保安员收利是，并成功对一众住户的阴招逐一声讨！现实中，阿正理直气壮话自己最少会封100蚊，因为自觉这是一个性价比甚高的“投资”。“我平时对保安好客气，畀利是最少都畀100蚊，你日日都见到佢㖞，就算系好亲嘅直系亲属，你都唔会成日见啦。如果平时唔畀利是，有起事嚟大家就会公事公办冇偈倾，况且一年100蚊真系唔多。”
呢个moment，要爆喇！
对阿正来说，全片最有发挥，堪称演技大爆发，就是怒斥几位住户的一幕，就算唔识拍戏，都知呢幕系自己嘅重点戏码，用上周星驰的说法，呢个moment，要爆喇！”李尚正︰“都有少少呢种感觉，呢啲机会好少有，同周生（周星驰）要求好唔同，周生系想你要点样爆，但今次何爵天（导演）系任我发挥，冇一个画面要我点样达成，所以都开心。”
跟过周生多年，某程度上连思维方式都会有点轨迹可循，“成个表演都系参考自周生的演出，其实自己都好自然反应，一收到剧本就幻想周生会点演呢？当日全日都喺度背稿，虽然下午先拍，但我全日都不停背，中午食饭时，同刘江老师一齐坐，佢讲好多有趣旧事，我好想听呀，但要背稿唔听得，那刻好煎熬。”
“叫我一哥都系润紧我啫”
李尚正有个别号叫“有线一哥”，事关睇亲开电视，大部份节目都关阿正和拍档“妹头”卢颂恩事，不是主持就是演出，就算冇样见都仲会有把声做VO，关于这点，阿正反而想澄清一下。
李尚正︰“可能外人会觉得我同妹头霸晒所有工作，其实我同佢一星期最多都系返三、四日工，其中一日专录VO，基本上返一日录两三集，几个钟就搞掂，最花时间系拍《卧底旅行团》，真系开全日工拍一、两日，其他好似拍间屋点装修布置，都系两个几钟之内就可以返屋企。所以唔系晒命，我哋工作时间好短，唔系点解仲喺度捞呀，如果一星期返七日我仲喺度做？”就算冇一哥嘅人气，但敢言的态度都已经有一哥风范。
讲到《卧底旅行团》系列，年初播出第三季收视有4点几，是开电视其中一个高峰，而最近几集更被旅游发展局睇中，拍成广告特辑推介游香港，有收视又有收入，似乎“一哥”这个名已经有明有实，当之无愧。
李尚正︰“冇冇冇！一哥唔可以自己认，最多人哋讲然后我答︰‘系㖞！’但我唔会自己去认。点解你哋叫我做一哥，因为得我一个嘛，得你一个梗系一哥啦，其实大家都系润紧我啫，事实上亦都因为成日见到我，大家先会咁叫。”
阿正唔想自己被称呼做一哥，除了怕名不副实，另一原因是怕隔篱台真正一哥听到会唔开心。李尚正︰“例如陈启泰，人哋当年真系亚视一哥，而家Loong 9系一哥（TVB）啦，即系Loong 9会心谂︰‘我系呢个台嘅天团，你话你自己系𠮶个台嘅一哥？而你系咁嘅样㖞，咁佢哋会唔开心。调番转，如果我系佢哋见到都会唔开心，所以我唔会咁叫自己。”自嘲完又反讽对方，喺讲嘢曲到圆方面，阿正肯定系一哥。
奉行保安员心态︰打份工唔会揾命搏
从阿正的言谈会听得出，他做人凡事都只求尽责，无错就可以，会否羡慕别人成就更好？“人哋有今日成就，一定系付出比你多，或者可以付出我付出唔到嘅嘢。”安于在有线当一哥，某程度阿正都有些少当保安的心态。“我功能系一个工作者，员工，尽力去将上头交带落嘅工作传达出去，呢个我好清晰亦都好基本。”
作为演艺工作者，最常听到人说是要凡事搏到尽，捉紧每个机会，每次都当最后一次做等等……十万句热血火烫嘅说话，其实阿正都热血过，辣手过，但都是10年前的事。“我10年前，廿几三十岁时系有谂过呢个问题，你当呢份系终身事业，自然会有咁谂过，但会有个风险，如果我本条命出去做但唔成功，我会冇晒心机。《卧底旅行团》我都本条命出去做，如果冇人睇系唔会再拍。”
李尚正︰“用呢个态度去做一个节目系绝对可以，以前有啲监制系要求chur爆你，但我觉得未必维持到好耐。”所以阿正这些年来，就用一个我能够有几多就畀几多，唔会畀多嘅方法去做日常的工作，又系咪等于唔成功？似乎又唔系咁差，求及格求无错，这种保安员心态在时下香港，可能更加长做长有。