【ABCT冠军杯赛．邱益忠】Wow高效进攻成大热 Entourage最强黑马
ABCT业余篮球冠军杯4月5日举行四强赛，揾笔者分析至啱啦！点解？一来过去几年笔者研究至少300队地下联赛球队；二来笔者成立嘅 #魅力移动SJC 系8强一份子，喺死亡之组同Wow X Teawood、西沙联对战过，深深体验到佢地嘅战斗力，揾我分析应该最贴地啦！
先讲返我哋魅力移动SJC （圣若瑟书院），虽然我哋争少少入到4强，但成功做到传承精神，一班80后师兄带住两位00后师弟杨筌皓同谢嘉浚挑战列强。杨筌皓喺16强面对1.9米高嘅球员，依然以75%命中率射入8分；而谢嘉浚喺8强战对决Wow X Teawood狂轰24分（包括6球三分波），证明自己入选港队U18有根有据！
可惜，小弟因为要准备求婚之旅而去咗澳大利亚，未能喺决赛日同大家现场讲波，不过亦希望籍呢篇文同大家分析一下4强球队战力！
修顿ACTION－业余篮球联赛冠军杯赛程
4强战：
下午3时：Wow x Teawood VS Entourage
下午4时：时尚中国 VS 西沙联
晚上6时：季军战
晚上7时30分：冠军战
Jumper Basketball将直播季军战及决赛
A组首名：Wow X Teawood （前称Wow Fitness）
场均得分：65.2分
场均失分：49.5分
战绩：3胜1负
队中主力：郑卓男、余明峰、张嘉伟
夺冠机率：70%
短评：
中前锋兼仅得22岁嘅郑卓男，笔者睇好佢有力成为赛事MVP！身高1.91米嘅卓男手长脚长，封波意识极高，场均12.3分、10.3篮板、3.5球封阻恐怖数据，有佢落场对方要入波非常非常难！
“单打王”余明峰一向有“私league传奇人物”之称，笔者3年前开始留意呢位无打过甲一甲二嘅球员，单打技巧相当出色，多变嘅入波方式更吓你一惊。目前佢上阵4场，场均12.25分、7.25篮板见佢只发挥七成水准。呢位一出场令女球迷“湿晒”嘅余明峰（我无呃大家，佢真系又靓仔又高又好波，我唔系Gay都要大赞）都有弱点，就系太中意花式传波，导致录得场均3球失误。
前甲一安青球员张嘉伟快攻、三分样样精，其中一场以50%命中率射入21分系代表作！至于中大三子之一嘅魏俊铭、潘俊熹一起机就猛力狂射，而睇得又打得嘅模界男神陈伟成（Avis）＋天堂鸟成员叶灏基（Gordon）坐拥大批Fans，自然为敌队造成极大压力。
B组次名：Entourage
场均得分：56.7分
场均失分：47.75分
战绩：3胜1负
队中主力：余普生、范永贤
夺冠机率：55%
短评：
除了不敌时尚中国外，其余3场有两场大胜对手双位数，当中余普生本身系会计界巨头PWC 3大男神之一，射术和核数一样精湛，目前暂时以21.75分喺赛事得分王列第一位！至于范永贤外围火力够猛，除第3场面对时尚中国时中空弹外，其余3场合轰11球三分波，场均18分排喺得分王第３位。
哗！一队有两个超强得分手，难怪Entourage被誉为最强黑马！呢班以ABC＋鬼仔为班底嘅球队，身体质素同三分火力达A级水准，不过平均高度不及Wow X Teawood，要杀入决赛，必须要有第3位球员跳出！
（其实我驶唔驶写返英文？算啦，你地去Google Translate应该OK！）
B组首名：时尚中国
场均得分：56.5分
场均失分：51.25分
战绩：4战全胜
队中主力：区年乐 、朱贤炜
夺冠机率：65%
短评：
区年乐最近频频上报，除咗因为佢喺篮总杯表现出色外，主因系佢所效力之甲二球队建龙有传会签入前NBA湖人中锋Bynum，身为嘅佢以队长身份回应传媒而为人熟悉。从资格赛到8强，睇得出佢打呢个比赛绝对超班，4场比赛共攻入17.25分，无论系铲篮、中距离同三分都有货交！
另一位队友朱贤炜对决Abandoned时，以69%极高命中率轰入21分，为球队带来第二个得分点，即系话，你派人死Mark区年乐系无用嘅！至于第3个得分点非潘嘉骏莫属，虽然佢三分波未起Q（两场11射2中），但两分尚算稳阵，所以时尚中国无论高度同速度并重，系赛事夺冠次热！
A组次名：西沙联
场均得分：60.2分
场均失分：57分
战绩：3胜1弃权 （实际上系4战全胜）
队中主力：刘振星、吴隽彦
夺冠机率：50%
短评：
西沙联将于四强战对阵时尚中国，其实呢次系两队四战全胜嘅球队大对决！只系因为西沙联对魅力移动SJC时误派甲一飞鹰球员余嘉宝上阵，而被判0:20落败。西沙联呢队后生波打法极快速、射波准到爆，一味同你冲冲冲快抢攻，一般球队未能招架！刘振星效力甲二晋裕，司职射手，虽然今次参赛数据上未有“爆Show”，但关键时候嘅三分波依然有保证。最重要佢又大只又靓仔，女球迷唔好错过啦！
由于赛制所限，现为甲一飞鹰球员的余家宝和李东坤未能为球队披甲，西沙联今次可算系半力上阵。佢哋要杀入决赛兼夺冠，必须人人有货交同发挥120%战力！
后记：
睇仔睇到好闷？放心，大会统计员Tiffany妹妹外貌清纯可爱，仲有少少似TVB主播蓝可盈！