【逃犯条例】油尖旺街坊联署反修订 誓言“守香港，拒投降”
反修订《逃犯条例》的争议不但“冲出国际”，本土的联署潮更一浪接一浪，群情之汹涌涵盖全港各区、学校、议员及公务员工会等。有旺角居民发起油尖旺街坊联署，字里行间道出贵租、医疗、法治、食安、自由等种种中港民生忧虑，“同大陆接轨，香港就会玩完！”并呼吁街坊参与6月9日民阵发起的游行，矢言“守香港，拒投降！”
● 批政府“假咨询” 必须“反送中”
该联署声明由旺角花园街及弼街两名街坊发起，字字辛酸，一字一泪提及现在楼细租贵，但大家仍相当关心香港，批评政府只进行短短20日“假咨询”，若修订《逃犯条例》一过，香港人随时被送上内地，“挨贵楼贵租，住豆膶咁大地方‥‥‥但我哋一样咁关心香港，所以一定要“反送中”‥‥‥而家话修订《逃犯条例》，令我唔知边年边月边日会被送番大陆。等四千蚊就要等年几，成个逃犯条例你够胆讲廿日咨询！？”
●“唔系仲要夹硬嚟呀话？”
发起人又指自己一向最信法治，最重要“有规有矩”，但政府与建制派却强行将《逃犯条例》修订草案直上立法会大会，并反驳政府所谓“急市民之急”实属无稽，应急在㓥房、医疗、拾荒等民生问题，当局所指香港法庭可以把关，亦备受台湾、大律司公会等各界质疑，“破坏晒规矩，真系嬲到爆‥‥‥法庭将来都冇乜Say啦！你唔系仲要夹硬嚟呀话？”
●“同大陆接轨，香港就会玩完”
回归后，油尖旺区的找换店、中港旅巴及药房多如雨后春笋，居民亦因此与内地多有接触，走私奶粉、成药常见，皆因内地食安监管欠佳，又欠缺言论自由，“正正因为香港有好多大陆冇、同禁嘅嘢，香港先会有啖食，如果样样都要同大陆接轨，香港就会玩完！”
● 守香港 拒投降
声明最后，发起人雄心壮志，希望大众用行动守护香港，并呼吁街坊于6月9日（星期日）参与民阵在铜锣湾发起的游行，“总之我一日仲有用得著嘅地方，一日都会刮光刮净自己仅余嘅价值去守护香港。”他指自己毫不畏惧，拒绝投降，“喺旺角我地咁嘅环境都生存到，证明我哋乜嘢都唔惊！你唔系觉得我哋旺角人会投降呀话！？我旺角大㗎！所以我哋瞓身要求香港政府：立即撤销《逃犯条例》修订！”
一群油尖旺街坊反对修订《逃犯条例》联署声明，全文如下：
我哋系一群油尖旺街坊，我哋忙返工放工，挨贵楼贵租，但住豆膶咁大地方，都系为左近啲返工，生活方便啲啫。我哋虽然日忙夜忙，为供楼交租，但我哋一样咁关心香港，所以一定要“反送中”！
香港政府而家话修订《逃犯条例》，令我唔知边年边月边日会被送番大陆。等四千蚊就要等年几，成个逃犯条例你够胆讲廿日咨询！？政府话急市民之所急，油尖旺几多人住㓥房呀！几多老人家等睇医生呀！几多人要拾荒维生呀！又唔见政府心急解决呢啲问题？
港府话今次修例系为左回应一单港人在台湾的谋杀案，但台湾已表明不会在修例后移交疑犯；港府强调香港法庭可以把关，但大律师公会早就反驳，中国政府及其他国家若要求香港法庭移交疑犯，法庭将都冇乜Say啦！你唔系仲要夹硬黎吓哗（呀话）？
我哋香港人，由细到大，无论读几多书，最信法治，揾食几艰难都好，听倒程序公义都特别觉得有道理，做嘢最梗要有规有矩。但今次政府同建制派夹硬黎，话直上到立法会大会审议，破坏晒规矩，真系嬲到爆！＞_＜
油尖旺咩最多？找换店、中港大巴同药房最多，冇乜边个街坊同大陆冇来往，如果条例一过，人心徨徨，因为大家都冇啖好食。如果大陆食物安全监管好，就唔使咁多自由行来走奶粉、走成药水货啦；如果大陆有言论新闻自由，就唔会咁多自由行来旺角书店买禁书啦！正正因为香港有好多大陆冇、同禁既（哋）野（嘢），香港先会有啖食，如果样样都要同大陆接轨，香港就会玩完！
政府夹硬黎，搞到数以十万计市民在 4 月 28 日上街游行。你以为香港人任你鱼肉咩，香港人个心点谂，我都知你知我知，心不在你身上，就算今次政府夹硬通过左（咗），又如何？
我哋呢班油尖旺街坊，今次联署，只想为香港默默付出，默默心底、用行动守护佢，总之我一日仲有用得著嘅地方，一日都会刮光刮净自己仅余嘅价值去守护香港。
喺旺角我地（哋）咁嘅环境都生存到，证明我地（哋）乜野（嘢）都唔惊！你唔系觉得我地（哋）旺角人会投降下话！？我旺角大架（㗎）！所以我哋瞓身要求香港政府：立即撤销《逃犯条例》修订！
发起街坊：
花园街黄佳鑫
弼街温柏坚
------------------
最后亦在此呼吁各位街坊出席6月9日的反对修订《逃犯条例》游行，详情如下：
日期：6月9日（星期日）
集合地点：铜锣湾东角道
时间：下午2时30分集合，下午3时正起步
游行路线：铜锣湾东角道游行至金钟添美道立法会综合大楼