【宝林街市翻新】小店今明撤离大清货　老伯日卖二百只粽不舍街坊

宝林街市将于6月1日起翻新，街市内不少档舖也明言只做到今、明两天（27、28日）。临别秋波，一众街坊今日仍冒雨来到街市，买最后一餐𩠌，在平民饭堂吃最后一餐饭，送别陪伴他们三十年的宝林街市。

退休公务员开平民粽店

宝林街市约有百多个档口，即将关门装修，但仍有一半以上的店舖，包括菜肉档，五金，海味杂货等也有开舖，跟街市共战到最后一刻。除了菜肉档和食肆外，大部分干货店都有减价，有成衣店以半价发售，老板娘亦直言要蚀本清货。

街坊一如往日到街市买𩠌和吃饭。对著街市门口的客家茶果冯伯伯也是如常摆档卖粽子、咸蛋和茶果。“做埋听日，冇得留低！”对于离别，冯伯伯表现相当潇洒，他坦言“冇办法，系大势所趋。”“呢度入场费四万几银，净系八达通都二万几银，啲钱等于充公。三个月按金就廿万，但我只卖几蚊一个茶果，十几蚊一只粽。”

“呢度系屋邨嚟，私人楼就有得发围。呢度人流少，就算你点样装修，我都可以行多步去靓嘅地方啦，唔到你讲到天花龙凤，到时实旺咩？人流唔多，旺咩？”冯伯伯说。

太太日包逾百粽　“唔系话赞老婆，真系好食嘅！”

临近农历五月，冯伯伯开始卖粽子，分别有碱水粽、花生咸肉粽、红豆咸肉粽和绿豆咸肉粽，不过粽子到下午就极速卖完，冯伯伯笑言全靠街坊捧场，“我哋做生意讲实际、讲老实，而唔系啲游客见你做得好先嚟帮衬吓，全部都系街坊。”他们每日卖二、三百只粽，由早上七时开舖，到下午一时许便卖光，今日帮衬的街坊也大赞粽子扎实、味道一流，不过他就将功劳归于太太，“唔系我包，系我老婆包，我负责卖嘅啫！唔系话赞老婆整啲嘢，真系好食嘅！”
 

每年包粽派街坊　子女打本开店打发时间

到街市卖粽之前，冯伯伯与太太每年都会包粽派给街坊，直言“我哋做人冇所谓”。去年八月在子女支持下，两老决定到街市卖粽打发时间，“之前一直冇嘢做，旧年八月老婆话不如包粽去卖。仔女就话‘妈咪，你唔怕辛苦嘅就做，银纸唔系靠你赚’，我啲仔女搞掂晒啲成本，最紧要啲仔女乖，我就心满意足。”

“想要粽打电话畀我，我哋再包！”

生意越做越好，冯伯伯招积笑说“住元朗、屯门都要特登揸车嚟同我买啊！”但明日之后，这档手工粽小生意就要绝迹宝林街市，“我以前系公务员，有长俸咪周围去吓，年纪大系咁㗎啦细佬！”不过他明言，只要街坊给他打个电话，便会继续包粽，“到时揾地方交收！”

街坊茶居撤出将军澳　老板：“系街坊唔舍得我！”

转角去到街坊茶楼宝林茶居，他们的代表作即叫即蒸点心和手拉肠粉令众多食客著迷。茶居何老板表示，今日就是最后经营日，就算是装修过后也不会再回到街市，他笑说：“系街坊都唔舍得我！好多都拎咗我电话，叫佢两三个月后再打畀我睇吓点啦！”何老板说装修之后，会先帮朋友的食肆打工，再撤出将军澳开店，“呢度有咁多食肆，再叉只脚落去好难做，除非你好出位啦。”

据了解，自从领展将宝林街市外判给建华管理之后，租金一直高企，宝林茶居开业数年后黯然离场，也是因为不满建华管理，“建华就不可理喻，我唔同佢倾啦，佢自己都有做包点啦，所以佢自己会做返。冇得可惜，建华咁麻烦，不过系政府纵容出嚟。”他说在昂贵租金下小店必然遭淘汰，做老板难挨，坦言在外面打工也能赚到同样的收入，“仲衰过打工，呢个政府真系越讲越劳气，衰到冇人有，领展已经衰，又捧多个建华出嚟，佢哋都系斗揾食，有咩法子唔加租。”

装修过后宝林街市小店大逃亡，临别之时，何老板也难忍不舍之情，“都唔知点讲，最后呢日，卖得几多得几多。做咗咁耐，始终都会有少少唔想，但唔想都冇办法。挨咗咁耐，细路大晒，咪挨少啲啰。”

街坊感叹街市小店买少见少　不舍糯米鸡和肠粉

“自己即叫即做嘅，基本上越嚟越少。”街坊杨先生来到街市，最后一次帮衬茶居，“比酒楼好，但冇咗都冇得拣，都系要去酒楼。”他表示明白何老板两夫妻一手一脚做小生意的难处，舖租高昂下撤离也无可厚非，不过他也感到十分可惜，“帮衬咗好多年，全部都街坊生意，最后一餐，冇架啦。周围环境都冇晒，上咗舖贵晒就唔同，亦都消费唔起。”杨先生大赞茶居的糯米鸡非常美味，而且肠粉即叫即拉，市面上已十分难得。

深宵食堂不再　猪肉档也难逃迁离命运

宝林街市作为有名的深宵食堂，驰名的宝琳粉仔、宝琳为食喵等食肆也只做到今天便会离场，转到别处重新发展。除了食肆迁离，菜肉档也难逃厄运。街坊们均叹在宝林街市买𩠌已成习惯，“连最后一日都要喺度买！”担心日后要到新都城二期买𩠌，下雨将很麻烦。肉档老板坦言装修之后，街市的猪肉将由建华大财团垄断，“佢哋自己做晒，鱼、菜同肉一条龙，我哋都好难做。”他直言不舍得街坊，但也没有办法：“人哋捞几廿年都要下山，唔到你话。”“做埋今日，系咁先！”

社区干事冯君安也来到街市探望档主们和街坊，得悉许多小店都做到今天便结业，他也感到十分不舍，直言宝林街市特别之处在于档主和街坊关系非常好，“大家互相认识，会问吓近况，去惠康买嘢唔会话关心啲收银员点样，但呢度啲街坊会问街市嘅状况，将军澳只有呢度系咁。”他说街市小店的终结，是令人情世故也同时终结，“变咗批发市场一式一样，唔系人情。连锁食店支配之下，建华会唔会畀呢啲手工粽喺度呢？”冯君安最不舍得的除了宝林茶室，就是卖两𩠌饭的来恩小食，“我哋由细到大都系食呢啲，新街市之后可能会被机器取代。如今大家都系亲手去做，就算系每只粽嘢都会唔同，每样都有特色，呢啲就系有落心机同冇落心机嘅分别。”

建华回复查询时曾表示，宝林街市将于6月起进行翻新工程，预计有关工程将于3个月内完成，又提到其公司一直与现有商户保持紧密沟通，并会优先与现有商户探讨续约安排，了解商户所需。