美图秀秀根本冇赚过，亦唔会赚到钱

修图软件都收钱？傻的吗？丑妇终须见家翁呀。畀钱执相app，咁不如畀钱去整容啦！

今次讲返本行，讲金融。放心，唔会闷亲你。

小故事好简单：

美图公司（1357，以下简称美图）星期四上市，揾咗成堆KOL（意见领袖）去港交所手机直播上市仪式，反应都几好。不过，好似个个都系用iPhone，而唔系用美图手机。对，美图有出手机。

呢两日“中环人”普遍讲嘅，唔系叶刘参选，就系美国加息（连带港股大跌）。比较少人讨论但本人重点关注嘅，就系美图成功上市。唔好搞错，重点唔系代言人杨颖Angelababy去敲钟，亦唔系佢大住肚著3吋高踭鞋，更加唔系“首席颜值官”（Angelababy嘅Title）到底系咩中文。

重点关注嘅系：到底边个走去买？

美图搞上市期间，传媒讨论有意无意聚焦在“香港股市终于又有科企啦”。的确，除左金融从业员外，好似所有香港人（甚至大陆人台湾人新加坡人）都会话你知，“香港经济太单一，完全集中在金融地产”，食老本，跟唔上新经济潮流。然后就会话你知，连香港股市都系侧重金融地产，比唔上美国台湾甚至大陆咁多元化。

呢个讲法其实冇错，的确香港股市系冇乜科企。美国嘅科企霸王Apple， Google（其实系母公司Alphabet），Facebook，Tesla，Amazon等等固然全部留在美国上市。就连中国嘅阿里巴巴，新浪，微博等等，都全部去美国上市。细公司好多就留在深圳上。

香港股市有乜猛料科企？有，腾讯（700）咯，近18,000亿市值（港纸，下同），当然够资格。但，真系可能数多只都冇了。第二系边只？可能你听过“金山词霸”啩？金山软件（3888），200亿市值左右，完全唔系𠮶回事。除非你计埋联想（992），或者瑞声科技（2018）之类做硬件为主嘅公司。

美图上市，就360亿市值左右，疑似稳占“第二大科企”宝座（点解“疑似”？阵间解）。而呢间公司，根本冇赚过钱。对，年年都蚀钱。唔止，间公司上市前仲系“净负债”的，简单嚟讲，即系负资产，资不抵债。上完市cap咗旧钱就变返正数啦。

咁都上到市？仲要上主板？唔好闹住，真系冇问题的。港交所规则写到明，冇盈利唔紧要，市值够40亿，同时收入够5亿，一样可以。美图就两样都过到关。条文一早写定，冇特权冇搬龙门。蚀钱净负债唔紧要，有人肯买就得啦。

科企嘛，讲梦想，唔好讲赚钱咁铜臭，人人都话改变世界嘛。Tesla一样年年蚀钱，Amazon之前亦蚀足N年，早排我写过Uber，蚀钱速度前无古人。你总唔会话佢地系老千。对不？ 

问题系，美图就唔系Tesla Amazon，甚至唔系腾讯阿里巴巴。

点解话美图“疑似稳占第二大科企宝座”？因为，其实你根本唔了解公司。讲起美图公司你谂起乜？你话简单啦，美图秀秀吖嘛。但其实招股书写明，美图公司97%嘅收入系嚟自硬件，即系美图手机。你熟悉嘅美图秀秀，顶多占佢3%收入。其实公司似系卖手机多啲。

点解软件收入咁少？因为，美图秀秀系免费软件嘛。可以点收钱？你收8蚊，人人即时转用其他软件。WhatsApp咁不可或缺，当时要收8蚊都大把人出嚟写几千字文闹呀。一个普通修图软件想收钱？难过李嘉诚修到变李嘉欣。

卖广告？美图秀秀唔系WeChat唔系阿里巴巴。你可以日日花好多时间睇WeChat朋友圈，花好多时间淘宝，但，你会花几多时间落个执相app？

硬件方面？不客气讲句，美图手机更加系笑话一个。成个地球嘅手机市场， Apple食咗91%盈利，另外三间大陆公司（华为，Vivo，Oppo）各自有2%左右，剩低嘅就分埋最后嘅2%，仲有一堆蚀钱等执笠嘅。连Sony LG三星小米HTC都流晒血嘅市场，后起之秀嘅美图手机可以赚到钱？你觉得符唔符合常识？但至少美图手机有收入（但冇盈利），美图秀秀软件就收入都冇乜。

美图嘅创始人兼董事长蔡文胜（繁体版招股书都系咁写个“胜”字）一路强调用户数目。的确，计用户数目，美图仅次于腾讯同阿里巴巴，而市值只系两者嘅零头。佢话有用户最后就实赚到钱，Facebook Google腾讯都证明咗呢点。

问题系，美图就真系唔系Facebook Google腾讯阿里巴巴嘛。人地嘅用户有loyalty有stickiness，可能系因为型，因为死忠，因为个个都用，或者因为懒， 但你嘅用户冇忠诚又冇黏性。个app一收钱就会走，而每日亦唔会用好耐。收唔到客户钱，又收唔到广告钱，咁，钱从何来？卖手机？你话呢？

（文章纯属作者意见，不代表香港01立场。）