高登爆补习社师生恋　遵理独立委员会调查

“问世间，情是何物，”出自 800 年前金末元初诗人元好问嘅《雁丘词》。到咗千禧年代，下句已经由“直教生死相许”变成“直教‘虾条’相许”。星期日，有女学生喺高登讨论区开 post，用千字长文，第一身角度细诉与补习名师持续一年嘅爱情故事。但系文中嘅学生妹觉得，与其话系爱情，倒不如话系被欺骗感情，仲畀老师呃埋“虾条”（失身），o赵完松。

是咁的，女学生参加咗名师补习班，因为问功课，二人开始短讯交流，渐生情愫，但系言谈之间，女学生意识到老师不断性暗示。女生小鹿乱撞，道德感情交战，然后一次约会，她，答应了。

以为爱情从此开花？点知老师开始冷待女生，唔覆 message，避而不见，最后仲 block 晒 facebook、whatsapp。女生终于了解到：

他所谓的“喜欢”只是建立于性之上。一但得手了，我就已经完全失去价值了……我既然被他这样找上了，我也相信我不会是第一个，亦不可能是最后一个。

故事赚人热泪，网民争相转载，唔使一日，已经推爆咗几个高登 post，高登仔仲揾到疑似涉事男事主——遵理学校通识科补习名师 Oscar Ma。

Oscar 起初矢口否认，话文章抹黑，生安白造。事件惊动到遵理老细 June Leung，佢表明反对师生恋，力撑下属清白之身。女事主决定公开与老师嘅短讯对话纪录，同埋喺老师屋企影嘅相，图文并茂力证真有其事。Oscar 发现事态严重，决定报警，并且喺 facebook 出 post 澄清自己冇生痣！（女生文章提及老师那话儿“左边有粒黑色痣”。）

但系随着公开嘅证据愈嚟愈多，连原本撑 Oscar 嘅另一补习名师“化学博士”Kelvin Lau 都转軚向女事主道歉。寻晚，遵理学校同埋 June Leung 分别发表声明，决定委任独立人士组成委员会调查事件，简称“呃虾条调查委员会”（误）。

故事合唔合理，证据真定假，睇嚟要靠警方同埋“委员会”嘅调查先会水落石出。但就咁，若有错在先，被揭发最蠢是轻敌，一味否认等定低估对方所持嘅“黑材料”，“否认吖嗱？爆多啲睇你仲认唔认”是正常反应吧？仲有，不认不认都要向公司认啦，免却老细同事“跟车太贴”引嚟尴尬，变埋头条新闻。真爱无罪，双方如果系坦诚相爱（前提是坦诚，仲要相爱！），或者当今社会已经能够接受师生恋呢？

延伸行动： 做人最紧要光明正大，做得出就唔怕认，平时做过啲咩衰嘢，今日对老细一次过忏悔晒出嚟，如果佢系好老细，定必欣赏！