【足球．博评】鸡年值得留意嘅星二代
话说洛迪高屋企有三只马骝，意思系一家三代都有属猴嘅人，呢种都算系一种传承。
讲起传承，球坛讲最多当然系父子档。再讲告鲁夫父子档都已经系咸丰年代嘅事，不如趁啱啱踏入鸡年，同大家数下有咩有睇头嘅新．星二代！
文：洛迪高@ 世界波
李华甸奴（Rivaldinho）－ 父：李华度（Rivaldo）
大家记得森巴好波之人，通常都叫XX甸奴，XX度。李华度就慌个世界唔知佢个仔唔好波，直头改个名叫李华甸奴！好彩呀囝都叫做争气，仲同老豆试过同场入波。随后佢有机会转投葡萄牙球会博维斯塔，不过佢表现麻麻要重返巴西，不过李华度就想囝囝同佢一样，可以去意甲揾食，不过21岁仔嘅佢相信未够实力，所以最近盛传意乙拉蒂纳想借佢，咁都系一个机会嚟嘅！
费达历高基艾沙（Federico Chiesa）－ 父：基艾沙（Enrico Chiesa）
讲起意大利，意甲嘅费伦天拿有意无意之间都有两个名将之后，一个系意大利前锋基艾沙之后费达历高；另一位就系罗马尼亚前队长赫杰囝囝伊亚尼斯。
费达历高最近威水史就系射入老豆前战友保方大门（虽然睇重播都唔太肯定佢掂到波），19岁人仔，主要司职右翼嘅佢今季不乏上阵机会，联赛暂时2入球2助攻算是不俗。
伊亚尼斯赫杰（Ianis Hagi）－ 父：赫杰（Gheorghe Hagi）
至于另一名将之后，18岁，同老豆一样司职进攻中场嘅伊亚尼斯赫杰就仍然主要踢青年军，但都同样喺青年联赛暂有2入球2助攻，都符合位置要求。佢同时做过罗马尼亚梯队队长，以及喺佢老豆执教球会下做过队长，同佢老豆一样有领袖风范，佢老豆唔止猛赞个仔未来劲过佢，仲亲手将佢送到紫百合！
基奥云尼施蒙尼 （Giovanni Simeone）－父：施蒙尼（Diego Simeone）
讲起意甲，就当然要提下马德里体育会施蒙尼囝囝基奥云尼施蒙尼！同佢作为强悍防中嘅老豆唔同，阿仔就做前锋。佢喺河床及班菲特嘅表现吸引意甲热那亚出手！今季佢表现都相当唔错，意甲暂时踢21场都入咗10球！
积斯甸古华特（Justin Kluivert）－ 父：古华特（Patrick Kluivert）
讲起前锋，就要睇下古华特阿仔积斯甸，17岁嘅佢已经代表咗荷兰U18国家队嘅佢啱啱先进入一队，唔知有无机会复制老豆18岁踢欧联决赛仲入埋波嘅成就呢？
卢卡沙豪域 （Luka Zahovic）－ 父：沙豪域（Zlatko Zahovic）
讲完前锋当然讲中场，大家仲记唔记得斯洛文尼亚潇洒中场沙豪域？佢囝囝踢前锋，仲已外借返祖国嘅马里博尔表现唔错，联赛上阵14场入10球，嚟紧如无意外佢会返海伦芬。海伦芬近年盛产前锋，睇下佢下年喺荷兰会唔会成为斯洛文尼亚新希望！
基斯甸马甸尼 （Christian Maldini）－父：马甸尼（Paulo Maldini）
讲完中场前锋，当然到后卫！第一个就系传奇马甸尼嘅宝贝仔基斯甸！而家似乎发展不似预期。由AC米兰青年军出道，而家去咗第三级别嘅Reggiana，借完到马尔他联赛，而家又借咗去意大利第四级联赛。20岁嘅佢仍然有机会去高级别联赛，但A米讲到明留畀马甸尼阿仔嘅3号波衫，系压力定动力？最后会系基斯甸著定其他兄弟著仲未可知：会唔会佢细佬丹尼尔仲有机会上位呢？
父辈出名，后代压力之大可想而知，而能够比老豆更出名嘅更系少之又少，除咗系因为压力，更大原因其实都系因为实力问题。机遇？其实有老父干都已经叫赢在起跑线上，但同时因为老豆出名家庭富裕，所以星二代踢波动力多系证明自己而唔系揾钱养家，咁去到中途发现力有不逮半途而弃亦属正常。
讲咗咁多星二代，你会发现好多已经出出地名嘅，例如施丹三子已经早登台面，当然实力如何都系要放长双眼。星二代入面甚少龙门，其实原因都算简单，因为门将呢个位置较为特殊，唔系话星二代就有啲著数嘅，而且亦唔需要成名早，好似卡斯柏舒米高（Kasper Schmeichel）成名早，但真系证明自己比肩父亲，都要等到上年李城夺冠啦。
（文章纯属作者意见，不代表香港01立场。）