那些年翻生的球星
生命满希望，前路由我创！昔日意大利神童巴洛迪利（Mario Balotelli）沉沦几年，本来去到法甲大家都唔睇好，不过佢去到尼斯就相当争气，唔止无再神神怪怪，牌又拎少咗（早前对罗连安特试过双黄一红被逐，不过后尾球证承认犯错打得甩。）仲入返波！
最近4场入咗5球，比起上年由利物浦外借AC米兰时20场入得1球已经有好大进步！
咁多年嚟，其实唔少球星受过一时挫折，不过唔少都可以重新出发再次发光发亮，等世界波嘅洛迪高同大家介绍返！
宾艾化 （Ben Arfa）
宾艾化翻生，同巴神有一个共同点，就系效力尼斯，分别在于尼斯现任领队系前慕逊加柏教练法夫尔（Lucien Favre），而宾艾化当时教练系现任修咸顿教练佩尔（Claude Puel）。宾艾化本来喺英超纽卡素都发展顺利，不过因伤病等因素，去到后期仲要外借侯城，最后要返祖家踢尼斯。喺尼斯呢一季，佢踢咗34场入咗17球，仲有金球表演添！仲凭呢季嘅演出获得加盟法甲盟主巴黎圣日耳门嘅机会，但系上阵机会唔多，睇怕又要准备再翻生……
简拿华路（Fabio Cannavaro）
现任中甲天津权健教头，当年喺柏尔马同杜林及保方等同伴帮助，球队成为“意甲七姊妹”其中一队，不过后来因为财政问题，被卖去国际米兰，不过佢喺国米嘅岁月简直不堪回首，最后国米将佢贱卖到祖云达斯（国米得到祖记后备门将卡连尼（Fabian Carini）…）结局大家都知，就系简拿华路凭06世界杯嘅演出，转投皇马仲拎埋金球奖……
法图斯 （Festus Baise）
翻生嘅除咗有国际球星，仲有本地球星。啱啱帮中甲球队贵州恒丰智诚升上中超嘅佢，效力南华时遭到弃用，最后转投本地球会公民（一脚蝎子脚乌龙仲“名”满天下）。随住最近两战中国表现出色，获得中甲球会垂青，仲喺球会冲超路攻入6个入球！
史奈达（Wesley Sneijder）
由阿积士转投皇家马德里嘅佢，虽然开始时有突出表现，不过随住受伤慢慢失去位置，最后转投摩连奴麾下嘅国际米兰，仲马上帮国米喺打吡入面大胜AC米兰，季尾仲帮球会夺得三冠王（意甲、欧联及意大利杯），仲随国家队夺得世界杯亚军，可惜最后都系失落国际足协金球奖……
安基（Robert Enke）
唔系每个翻生故事都系以大团圆结局告终，至少前德国国家队门将安基唔系……安基职业生涯初期喺宾菲加表现不俗，得到加盟巴塞隆拿嘅机会，可惜佢喺巴塞嘅时光过得并唔愉快，并且要租借畀西班牙嘅特内里费及土耳其费伦巴治，可惜都未能扭转佢喺巴塞嘅岁月。佢04年离开鲁营，更因呢段经历患上抑郁症，以自由身加盟汉诺威。安基喺一直隐瞒病情下，于呢间球会表现大有起色，仲借此入选国家队。可惜到最后，佢因为女儿喺2岁时因心脏病逝世而一直未能走出阴影，加上领养一个囡囡后，怕被揭发有抑郁症后会无埋呢个女，最后于09年卧轨自杀身亡。
虽然安基故事系一个Bad Ending，但总括嚟讲，球星能够翻生，靠嘅除咗系够运遇上伯乐，仲要本身真系有实力，同埋心理质素够强先可以反弹！佢哋做到，我哋普通人都得！听日一定会好天嘅！
（本文纯属作者意见，不代表香港01立场。）