裸辞，同裸跑裸泳一样，只啱后生仔同老人家

裸辞，同裸跑裸泳一样，一生人总要试一次（可惜我唔识游水）。可以的话就趁后生试，勇气够成本低唔介意人点睇（不过记住话比全世界知自己的低调）。错过咗嘅就等老咗先做啦，老左一样唔介意人点睇，你见坐巴士啲阿伯剪指甲啪啪声一个人坐三个位开大volume睇片就知。

今次Blog Jamming有三个主题拣。“张德江”我就一定唔写，原本想写“废青”，因为我都做过一年双失青年，而“裸辞”我冇经验。

后来朋友提醒，原来“裸辞”我都试过，刚好12年前，又系欧洲国家杯的暑假。果然人会选择性遗忘。或者系我都唔记得自己曾经咁勇敢，或鲁莽。如果冇𠮶年的裸辞，而家我嘅人生肯定好唔同。我试过裸辞成功，亦试过裸辞失败。 试过赞成又试过反对。即管同大家分享下感受。

裸辞好很型的画面　只会系拍戏先有

神机测字时间。见到“裸辞”，你脑中即时浮现乜嘢画面？

大约唔会系唔著衫咁去辞职。照计人人都理解到系“未揾到新工又唔系退休或嫁人唔使做就辞职”。

我脑中嘅画面：有才情有理想嘅年青厨师，受唔住流水作业、废柴同事、外行老板、只睇钱嘅金主、扮嘢又挑剔嘅食家、有两个钱就扮哂大爷嘅客人，甚至系业界的种种陋习等等。卒之把几火，掉低条围裙，抛下一句“我唔X捞啦”，行出门口，甚至仲可以拎杯水淋个客或老板。（所以记住，扮大爷，就唔好坐近门口）

型，真系好型，睇到呢啲位，个个观众都想学。不过拍戏呢，之后年青厨师一定排除万难开到自己的理想餐厅（对，钱由天度跌落嚟，或者有个好欣赏佢的富家女之类），旧老板同事食家客人都唔小器直竖姆指赞好。大家就睇完套戏好有message，明天继续番工。我应该睇过十套八套戏系咁上下桥段。

严格嚟讲以上嘅画面唔只裸辞，仲系即走。亦所以我嘅画面系厨师之类，因为可以掉低条围裙即时推门走人。其他人裸辞不一定会即走，你想都未必可以。坐写字楼的，就可能仲要交番员工卡计埋条尾数，甚至由柴湾走入屯门做exit interview，然后日日返公司玩手指之类。分分钟畀人罚你坐杂物房一个月，唔比嘢你做又唔畀你玩电话。现实可以系完全唔型。信我，我连果句“我唔X捞啦”都讲过，型咗半日咁大把。

有人话裸辞等于男女朋友分手。“你会唔会一定要揾到第二个先撇而家𠮶件？”

我唔同意。感情上，多数人都可以未揾到第二个就分手，工作就冇咁易。点解？首先，一个人好难同时返两份工，甚至返住工想揾第二份都难；唔少人裸辞系因为“专心揾工”。对好多人嚟讲，一脚踏两船相对地容易，正如拍紧拖再去识第二个，点都容易过番紧工去见工。第二个原因系，返工有粮出，再难顶，你都有可能行尸走肉白逗人工一排。但对住一个自己唔钟意既另一半，痛苦得嚟冇乜得益。

裸辞裸跑裸泳　都只啱后生仔或老人家

有人话裸辞等于裸跑裸泳。Yes and No。有乜唔同？唔同就系，裸泳裸跑有型在“裸”，平时跑步游水唔会特别型。但裸辞，型有一大部份型在“辞”。有得辞工的即系炒老细鱿鱼，唔理裸唔裸，都必然有型。亦因为咁，裸泳裸跑未必要有人睇住，但裸辞果句“我唔X捞啦”，一定要大大声畀所有人听到，老板闩埋门，你都要讲到出面听到。裸辞冇人知，等于锦衣夜行富贵不归故乡。

裸辞裸跑裸泳有乜相似？相似就系，呢啲嘢都系适合少年人做，或者老年人做。 我等年纪在职场打滚咗一排的，就冇呢支歌仔。

早几年我就裸辞失败，是咁的：阿头颁布最高命令，要我report to总坛的一个南亚人。本人自觉冇一瓣不及佢，拒绝就范，就真系果句“我唔X捞啦”都一字不漏照讲。不过老细好言相劝，“系唔捞，都等人炒啦，赔多啲”。 最后点？柳暗花明又一城，南亚人忽然自己唔捞，南亚语“我唔X捞啦”点讲我就唔知啦。

裸辞都有世代之争

裸辞往往系世代之争。小朋友觉得裸辞系勇敢，本人乜都识就系争个机会，返埋啲咁嘅mickey mouse company大才小用，唔好谂住施舍一万几千阻住我追梦（但其实系边位阻住阁下追梦？最初拎支抢夹你返工定有人跪低求你勉为其难帮下手？）。

老柴呀乜乜人力顾问呢？就觉得“而家啲后生仔冇责任心，都唔知江湖险恶，古语都有云骑牛揾马，第时就知味道。”

点解裸辞都有世代之争？说穿了，其实就系机会成本。以本人为例，12年前𠮶次仲算打工冇耐，人工唔高，年纪又轻，又未使供楼养狗之类，梗系勇敢而成功。到几年前南亚人𠮶次，就唔同讲法，讲完句“我唔X捞啦”系好型，但上facebook出完post，就都系check下银行户口先。

小朋友裸辞又不一定系“冇责任心”。老柴如我，中咗六合彩都好可能裸辞。归根究底钱作怪。拎𠮶皮几嘢人工又上位无望，当然易裸辞；公司唔型又冇人识，当然易裸辞；老豆老母未必好有钱但都唔等开饭，就梗系易裸辞；呢啲现象全部同社会／职场流动性减低有关，好易解释到。

最棹忌“裸辞惯犯”　除非系天才

话说回头，乜乜人力顾问同你讲唔好太冲动，裸辞过嘅，第时揾工可能多阻滞。我都请过人，可以话你知，系真的。个别大公司HR对“空窗期”好敏感，两个月空白都要写，而你又唔好意思写自己睇咗一个月波，再哭咗一个月波丧，于是第一份工已经陷入打工应唔应该坦白的两难……

我作为最终“用家”倒唔系关心“空窗期”。 问题唔系裸辞嘅人特别冇责任心，我都裸辞过我当然唔认。问题系裸辞过嘅往往代表机会成本低。可能系性格太爱自由（爱自由就唔好嚟见写字楼工啦老细），可能系物欲比较低，可能系屋企比较富贵。呢啲同工作能力或责任心都可能冇关，但客观地令你知道，佢重施故技的机会唔低。而十个有十个请人嘅，最怕就系请咗个人返嚟两个月又，我想专心睇冰球世界杯而走咗。

当然，以上嘅野都系对一般人讲，你系天才就冇乜所谓，你系Steve Jobs当然可以裸辞。你系 Michael Jordan去打一排棒球先番嚟拎NBA冠军都仲得。不过Michael Jordan大约唔会返紧工在公司睇我呢篇文。

裸辞，同裸跑裸泳一样，一生人总要试一次（可惜我唔识游水）。可以的话就趁后生试，勇气够成本低唔介意人点睇（不过记住话比全世界知自己的低调）。错过咗嘅就等老咗先做啦，老咗一样唔介意人点睇，你见坐巴士啲阿伯剪指甲啪啪声一个人坐三个位开大volume睇片就知。

至于又唔后生又唔太老，好似我呢啲，就唔好谂了。最主要系因为，你去做，都完全唔型。分分钟之后后悔，仲要求返人畀机会你，几无谓呢。只有年青或年老时先nothing to lose。所以坐巴士最静嘅都系我呢类人。

（本文纯属作者意见，不代表香港01立场。）