谢霆锋2018正式回归乐坛 演唱会搞得成大家想听咩歌？
撰文： 李妍桦
出版：更新：
2018年最爆嘅事，莫过于喺叱咤听到谢霆锋重出乐坛唱歌，相信喺电视机前面嘅观众都相当振奋，因为Chef Nic终于唔再玩食物喇！而系认真拎住支结他唱歌，记得上年英皇搞演唱会，谢霆锋居然唔系唱歌，竟然喺度煮面！观众即刻嬲嬲猪，大闹畀钱买演唱会系嚟听歌，如果要睇你煮不如返屋企睇《12道锋味》算啦。的确，大陆做综艺真系好赚钱，除咗好多植入式广告之外，因为内容入屋，通常出街之后会多好多工作机会，所以近年谢霆锋冇咩点唱歌，主力搞个节目，嚟到今年已经系第4季，想听佢开金口唱歌真系要等发梦𠮶阵。
+4
不过机会嚟喇，叱咤揾到谢霆锋连唱3首歌，分别系佢嘅饮歌《玉蝴蝶》、《活着VIVA》同埋新歌《有火》，净系听到《玉蝴蝶》个前奏都几乎high爆全场，呢几年乐队擡头，好似Supper Moment、ToNick喺各大颁奖礼都拎到重要奖项，点知谢霆锋一句“年轻得碰著谁亦像威化般干脆”，一下子完全盖过晒佢哋风头，“摇滚之父”终于返嚟喇！
+1
其实早系上年已经走漏咗啲风声出嚟，佢自己都话打算喺2018年会放多啲时间喺音乐上面，又先后推出咗《异想天开》、《有火》呢两只新歌，虽然上年搞唔成演唱会，但今年2018开演唱会绝对不是梦！净系听《玉蝴蝶》同《活着VIVA》大家边会够喉啊，依家煲定霆锋嘅歌就差唔多喇，如果畀大家拣，边一只系大家心水呢？《游乐场》一定走唔甩，《非走不可》更加唔使讲啦，仲有《爱后余生》、《无声仿有声》、《坏习惯》、《罪人》……
其实只要佢肯开演唱会，唱咩歌相信大家都冇所谓，好想再睇多一次霆锋掟结他。