【周末午夜场】《最佳损友》80年代贱男示范　三大金句今日仲啱使

今晚（20/1）深夜翡翠台会播出王晶执导，刘德华、邱淑贞、陈百祥、冯粹帆、曹查理主演的《最佳损友》（1988年3月27日上映）。呢部系30年前的经典，系晶哥喺《精装追女仔》系列以外，另辟一笑片经典。又因为两个系列嘅演员都差不多，好易令人混淆。电影主线讲翁世杰饰演的徐定富，为阻止细佬徐定贵（刘德华 饰）接手家族生意，决定叫公司三大损友教唆佢，令佢集烂口、烂滚、牛精于一身。

三大损友分别系牛精帆（冯淬帆 饰）、咸湿超（陈百祥 饰）及臭口奇（曹查理 饰），得到“免炒金牌”同“任使金卡”嘅眷顾下，喺公司任意妄为，主力就系要教坏个细佬。一盘生意打理得好唔好，同系唔系烂口、烂滚、牛精，其实冇咩直接关系，所以都系揾戏嚟做，而在主线教坏徐家贵之余，追女线都系另一主打。

男士吹水饭局

《最佳损友》中有好多精彩爆笑场面，不过数到最抵死，除咗陈百祥为保老友安全而被君如蹂躏一幕，四个男人喺炸鸡店对“爱情”嘅睇法都精辟独到。好似曹查理话︰“好就女人，唔好就累人，所以一得到手就要撇。”呢种押韵句式，到今时今日叶念琛的作品都时有出现，即系“钟意就keep，唔钟意就delete”嘅始祖。

而陈百祥一句︰“冇理由为一棵树放弃成个森林”唔好话老套，呢句金句早已成为唔少人嘅座右铭，系自己感觉良好唔结婚嘅最佳理由。至于冯粹帆，要配合牛精形象，就讲出︰“总之女人，60岁前唔好同佢讲真话，70岁前唔好俾饱饭佢食。”句句都咁历久常新，久不久听番都仲系咁警世。

再贱嘴都未必敢拍

其实时下嘴贱者大有人在，“mean精”更是随处可见，不过时代进步，在关注种种歧视底下，好难再将相关内容放入电影当中拎出嚟取笑。好似戏中有幕四位男士争相高价租床位偷窥豆豆（邱淑贞 饰）冲凉，唯独有个唔使钱仲俾番二百蚊津贴嘅，原来系要你牺牲色相俾嗱喳星摸。又一幕讲几个整蛊陈百祥，话佢对爱滋病呈阳性反应，要佢做各种无厘头嘅快速测试，又系劲好笑，不过放喺今日可能又已经引起相关人士不满，要平机会见。

点图放大更多剧照：