【神秘宝藏】黄子华为张保仔自创台山话　挑战甄子丹讲潮州话？

2014年拍完，曾于香港影视博览宣在2015年底上画的《神秘宝藏》，结果冇晒影。事隔两年，正当大家差啲唔记得套戏时，电影铁定11月2日正式上画。据两位导演郑中基同陈嘉上讲，搞咁耐因为后期制作需时。日前电影推出首条预告，骤眼睇又觉得效果一般未见精彩，到底呢两年摊到冻晒，仲要畀TVB套《张保仔》反食头啖汤，值唔值呢？

自宣布郑中基与陈嘉上会联手执导，以中国海盗张保仔为故事蓝本的穿越喜剧《神秘宝藏》后，都遇上不少风波，先有古天乐因档期问题突然要易角，由黄子华顶上。然后电影一话开拍，TVB就拎住“张保仔”同“穿越”呢两大元素，揾嚟洪永城同陈展鹏开套《张保仔》，仲锐意要同步2015年出街。结果有志者事竟成，迟来先上岸的TVB，套剧播出一年有多，正版《神秘宝藏》呢刻先话上，真系吹涨。

讲番套电影，戏中每位演员都会分饰两角，黄子华会饰演张保仔及其后人，而陈法拉就要同时饰演郑中基女友及黄子华老婆，所以两位男主角会为争法拉而大打出手。其中古代的陈法拉，仲会以黑面、刀疤、黄牙丑爆女海盗造型登场。

郑中基的搞笑技俩，由《行运超人》断蟹到《低俗喜剧》暴龙哥，都永冇失手。今次自导自演，本应由自己做埋主角，但佢份人好均真，认为呢个枭雄角色交畀黄子华演会比他更称职。一个香港人熟悉的历史人物，交到子华神手上，到底又会变成点呢？“我呢个张保仔是个非常开心的疯子，为了自己开心可以尽情地蹧踬身边嘅人，好有霸气，而最经常被我虐待的，就系导演郑中基，我仲要每次搞完佢，都专登问番佢我做得够唔够好。”此外，子华更为角色自创一种Free Style的台山话，为张保仔增添几分喜感。至于见到海盗题材，好自然令人谂起《魔盗王》的尊尼特普，但子华就唔介意大家咁讲，亦大可以作比较，呢啲咪就系唔怕货比货。