Hermès逆市爆数再加价　金融友呻配货50万仍“一袋难求”｜珍姬蜜

两个传统零售消费大日子，包括圣诞和新年刚过，市面上啲名店都静落嚟。小珍最近行PP、圆方等商场，Hermès同Chanel等名店都唔见有人排队。虽说港人呢排兴北上吃喝玩乐兼扫货，但行山姆超市同名店嘅又系两个客群。

通关后经济未如理想已是人所共知嘅事，小珍想分享嘅系，喺呢个市道下，名店居然逆市加价兼配货升级！名店无人排队并非生意唔好，实情系一班大豪客早喺加价前shopping。

Chanel经典款 八年升1.7倍

先讲奢侈品龙头Hermès。据珍姬蜜了解，刚刚喺1月8日加价，涨幅大约由5%至17%不等，故一众熟客已经赶喺月头消费。经典款Kelly及Birkin 25 Togo皮售价由83,400蚊升至93,400蚊；Birkin 30更加破10万蚊大关。加幅最多嘅系Kelly一代，由46,500蚊加至56,500蚊，升幅高达17.7%。

而Chanel呢两年亦“急起直追”，一年加几次价，单计2023年已经加价超过10%，经典款Classic Flap专柜价正式“破8”。讲紧2015年卖紧30,000蚊嘅袋，今年先买就要俾80,000蚊，累升170%。更甚嘅系，Chanel加价后竟然都系一袋难求，想买热门手袋，有时要先买皮具以外嘅产品，以表示对品牌嘅忠诚度。但呢一举动听闻令唔少粉丝都大感错愕，扬言“转会”至Hermès。

呢两年Hermès经常大排长龙，上至手袋、下至衣服首饰，一律供不应求。尽管名店并无明文规定要配货，但唔少“养马人”都笑言每个月要去“配货”。由于官方无明文规定“配货”，每一个手袋嘅配货比率亦只能“心领神会”。以坊间成日讲嘅“1:1”嚟讲，即系你想买一个80,000蚊嘅手袋，就要额外买80,000蚊皮具以外嘅产品作为配货。换言之，一个80,000蚊嘅手袋，实际要洗16万银弹先买到。

Hermès配货比率超过“1:2”

自疫情开始，Hermès话皮革产品生产数目大受影响，令配货比率大幅上升。2021年打后，小珍同一众朋友从未试过可以“1:1”买到手袋，起码要“1:2”先可以买到心头好。而年尾就系Hermès最旺嘅时候，皆因销售会喺年尾“结算”，安排客人购买心仪嘅手袋，以便出年重新计算配货记录。

但去年Hermès生意“爆数”，可谓同香港经济处于平行时空，竟出现客人无得拎心仪手袋嘅情况。尤其是铜锣湾其中一间装修紧嘅分店，居然喺金融界出现“苦主群”。先有一位唔少庄家常用嘅美女股票经纪，因为一直唔俾佢心仪手袋嬲到“转会”，转咗去另一间分店。

其后，再有一位新晋金融才俊同小珍呻，“我想拎个嘅鳄鱼皮俾老婆，已经配咗近50万蚊，销售都无回音。”一个鳄鱼皮Kelly价值约23万蚊，即配比已经达“1:2”。无独有偶，小珍刚巧又帮衬同一间分店，配比超过“1:2”，但2023年亦冇袋拎。

Hermès股价四年升三倍 LVMH同比跌16%

唔愁冇生意，亦直接从股价反映出来。疫情前，Hermès 2019年股价约500欧元，随后一直上升，2023年突破2,000欧元，升幅达三倍。近日回落些少但仍企稳在1,800欧元水平，一年升幅达12%。反观另外两大法国奢侈品巨头，LVMH及Gucci母公司Kering，同比分别下跌约16%及34%。

以往股楼畅旺时，莫讲话一班富豪手松，连上市公司过年搞传媒午宴，都会摆三两围兼人人有鲍鱼。但随著疫情加恒指跌跌不休，呢啲超豪午宴近年已成绝响。小珍最近见亲啲上市公司大老板都愁眉苦脸，一方面愁冇水，另一方面又要应付监管机构，以免被DQ。但名店却可以逆市爆数，认真唔简单！