财金圈一盅两件 等待发落的CEO与国际金融中心遗址｜刁佬
最近江湖上盛传联交所行政总裁欧冠升好大机会不获续约，消息传到街知巷闻，刁佬最怕坏事总系开口中。刁凤：“虽然一切仲未落实，但全街都知佢不获续约，真系颜面何存呢？都几惨。”刁佬：“佢惨？三年袋两亿一，净低呢一年周围飞唔知去边，唔好同我讲佢坐经济舱，肯定系公司出钱啦。有咁嘅下场，我都想咁惨。”
呢三年香港的国际金融地位如何，无需多讲。小红书上已见到内地网民称香港为“国际金融中心遗址”。作为联交所CEO欧冠升居功厥伟，如果话全因外围因素，无论佢有几努力都无用，咁即系是旦揾个人做都一样，唔洗七千几万咁高人工。究竟当日边个揾佢返嚟？如果今时今日又系呢班太上皇作主，恐怕又系揾个天子畀班 King Maker 去重演历史。
创业板咨询终于可以升班转主板，都算系欧冠升任内少数的德政。偏偏有位大佬冲出来话创业板应该禁转板，强逼阿里巴巴﹙9988﹚及腾讯﹙0700﹚等科技股转去创业板。到时轮到主板无人玩，唔通又转返阿里巴巴及腾讯等科技股过去？情况会唔会好似你装修屋企时唔满意厨房同厕所个位，拆咗互换位置，拆完换完之后又觉得之前好啲，结果钱又洗咗，嘢又无变。
香港美其名系国际金融中心，实际就是一个供国际人仕集资Cap水的地方。如果水管生锈，渠务唔畅通，水又唔干净，啲人点会嚟。香港要做返国际金融中心，首先要做到海纳百川，公平中立，欢迎各种光谱嘅人前来投资。资金自由进出，不单欢迎美国人开户，就更加欢迎没被制裁的俄罗斯人及祖国同胞啦。个个老板揾钱做到身水身汗，揾到钱都要揾个好地方休息下，购物消费，同冲凉洗衫，唔系咁辛苦赚钱做唛？
证券商协会永远名誉会长陈柏楠表示︰“本地证券业界与港交所近年保持沟通，惟与欧冠升本身的沟通就极少，明白语言可能是一个障碍。”讲得客气就语言障碍，咁大个机构点会无翻译，事实上近年联交所有几咁重视华资及中小型上市公司，大家心知肚明。做生意嘅朋友都知，去银行开户成功都会寄封信恭喜你，送个钱罂畀你，每年仲有日历同利是封。证券行、上市公司，同埋投资者都系联交所嘅客户，但联交所开张几十年至今有咩礼物送过比客户？无㖞，不时写信畀你恐吓就有，刁佬有时都谂，喂假假地我哋都系联交所嘅客，佢地系咪应该客气少少？而家警察抄牌都好有礼貌，今时今日咁嘅服务态度真系唔够嫁，不过联交所喺香港系独家经营，又冇竞争对手，亦都好难怪联交所做乜要同我哋呢班蚁民卑躬屈膝。真系当佢寻找发展与生活，我哋只追求温饱与生存。
刁佬相信天下合久必分，当独家经营养尊处优，失去危机感。如果允许成立另一间私营证券交易所，刁佬觉得有竞争先至有进步，当市场打破独家经营垄断，服务自然会提升，或者置于死地而后生，先至可以促使香港呢一个国际金融中心遗址复活。
简介：游走在中环黑白之间，自觉是个穿著西装的古惑仔，在波诡云谲的金融市场中，钻研刀不血刃的秘诀。
免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。
另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。