演戏跟踢球一样 合作才能讲好故事│人生导演课│冼振东专栏
几年前，我以顾问身分去看一间小学排练一出话剧。孩子们已排练了好些日子，大家都做得相当不错。我特别留意一个几得意的小男生。小休时，我特意走过去跟他说话。
文：冼振东
“你几年班呀？”
“ …… 三年班。”看见一旧庞然大物走近，他显得有点腼腆。
“你钟唔钟意做戏呀？”我笑吟吟的问。他一愕。当然啦，这样问，难道答你“我最憎做戏”吗？我微笑著等候。他尴尬的笑了笑，轻轻的摇了摇头。
其实他演得不差，虽然只有三句对白，但他念得大声清楚，也知道自己在做甚么。
我看著他，用浮夸的BB语气问：“点解呀？？”
他咧嘴一笑，微微低著头。
“你觉得自己得三句台词，好少嘢，系咪？”
他擡头望一望我：“ …… 都唔系嘅 …… ”
一顿。我看见他身穿巴塞球衣，忽发奇想，问道：“你系咪钟意踢波多啲？”
他用力地点头，好像很开心我这样问他。
“咁点解你咁钟意踢波？”
“好玩啰 …… 射入咗，赢咗，好开心啰 ……”
“咁输咗呢？一定会唔开心啦，系咪？”
他点点头。
“但系一打比赛就会有赢有输。输咗，都无办法，系会唔开心嘅。咁可以点呀？”
“练吓波，再赢返啰。”
“系㖞！再努力啲练波啰！同埋大家一齐谂下点解会输 …… 咁啰，系咪？”
他笑著点头，对足球的事显然比较雀跃。
“你觉得呢 …… 踢波𠮶阵，系咪个个都好紧要嘅呢？你𠮶边少咗一个，就好大机会会输㖞，系咪？可能呢，有啲人踢得无咁叻㖞，踢咗好耐都只系掂到三次波，咁 …… 无咗佢系咪都唔紧要呢？”
“…… 都唔系嘅 …… ”
“系啰，话唔定𠮶个同学虽然只系掂到三次波，但系可能佢踢出去俾另一个同学，𠮶个同学先有机会传俾另一个，再俾另一个，之后就入波！哈哈！咁啰！”
他笑了笑。我继续说：“其实呀，同做戏系一样㗎。你唔好觉得三句台词唔紧要呀。无你𠮶三句，个故仔咪睇唔明啰。睇唔明，同输波系无分别㗎㖞。”
他看著我，好像想我继续说下去。
“落场比赛，就梗系想赢㗎啦，系咪？”我稍稍搭著他的肩膊：“但系做戏要‘赢’呢，就唔可以净系做戏㖞，要‘一齐去讲个故事’！”
“ ……？”
“你想唔想用你𠮶三句台词，同其他同学一齐‘赢’吖？”
他轻轻的点点头。
“咁你就要记住，唔系净系自己做戏㗎，系要同其他同学一齐讲好呢个故事！”
他似懂非懂的想了一会。我再强调：“我哋大家‘一齐’去讲好呢个故事，好无呀？”
小休之后，再次排练。我见到他即使未出场，也颇留心内场同学的表现，仿佛在球赛之中，即使球不在他脚下，他也会很紧张赛事情况，准备当球传到自己时，可以做到最好，一齐胜出赛事，就像在舞台上一齐讲好故事一样。
（专栏“人生导演课”每月刊出，标题由编辑撰写，原题：“演戏跟踢球，是一样的”。本文不代表艺文格物立场）
作者简介｜冼振东，明爱华德中书院助理校长（演艺），深信戏剧能成就全人教育，致力栽培学生成为自己人生舞台的导演：“导好自己・演好人生！”