【每逢大事讲故事】美国大选A餐定B餐 第一千金你点拣？
今届美国大选希拉里斗特朗普，相信大家同飞云一样都系抱住食花生嘅心态，要讲老老实实政治，同立法会宣誓单嘢一样“无眼睇”。计我话不如睇下靓女好过！可能你好唔gur特朗普咁有米，唔gur佢咁都可以选总统，点都拣唔落手，但要俾飞云拣第一千金，我梗系拣个索架啦。
其实两位贵千金，都系喺纽约政商圈镁光灯下长大，大家嘅成长背景有不少共通点之余，仲要系老友鬼鬼，依家望住老豆老母鬼打鬼，咪话唔老尴。
希拉里同克林顿嘅独生女，香港人都应该唔陌生，车路士丫嘛，真系我细细个就听过佢个名。至于美国人，亦会对特朗普家族一啲都唔陌生，尤其佢（啲）老婆同千金，简直精彩过选美。35岁嘅大囡Ivanka喺今次选举成日企喺老豆隔离，抢镜过影过裸照嘅“特朗太”十万倍。虽说有图有真相，但相呢就唔post了（…面红…），有兴趣嘅读者识做啦。
克林顿家族喺过去30年贵为政坛明星，也是特朗普发迹之时，两家人早已认识，唔少人都知其实特朗普以前曾经捐钱俾克林顿基金会，大家都有自己嘅事业，车路士同Ivanka早几年透过老公认识，大家都系纽约政商圈名人二代，可谓一拍即合，一见如故。车路士更曾在接受Vogue杂志访问时，大赞Ivanka天生具魅力，前年一同在一个妇女组织典礼的红地毡上，开怀说笑，似乎真心friend㖞。
成长背景似 老豆桃色风波中长大
回到1993年，克林顿入主白宫，车路士得𠮶13岁。大约两三年后，克林顿同莱温斯基嘅性丑闻就爆出，做第一千金压力已经够大，老豆仲要唔生性，真系EQ低啲都搞唔掂，之后入埋史丹福大学修读历史，做过新闻主持，又为父母打理克林顿基金，前年更在牛津大学修毕公共卫生博士学位。更难得嘅系，时隔23年佢同父母关系仲咁好，今次轮到阿妈选总统，佢都出心出力，作为一个囡，其实已值一百分。
睇成语动画廊都知，唔系个个第一家庭都咁和睦嘅。
同样地，身为长女嘅Ivanka自细已成日跟住老豆，出席各式各样商界场合，似乎对于爸爸嘅桃色丑闻已经见怪不怪。Ivanka 18岁就离开屋企去读大学，头两年喺华盛顿乔治城大学就读，之后再转去宾夕法尼亚大学读经济。
虽然老豆成日口出狂言，Ivanka却相当得体，人前人后不时赞爸爸，又话过去10年跟爸爸一齐为公司打拼，感觉无得顶。爸爸对囡囡都赞不绝口，话佢叻女，甚至话如果唔系自己个囡，一定要同佢拍拖。我啋～
不过，特朗普同第二任老婆生嘅二女Tiffany，对老豆态度就唔系咁die hard，虽则有好俾面出席大大小小嘅拉票活动，但成长阶段跟随妈咪生活嘅佢，就明显无Ivanka同老豆咁亲，其中一次辩论仲俾人影到老豆想锡佢一下面猪仔，佢就好身手敏捷咁闪开，一副“喂唔使咁客气啦”嘅模样……
Tiffany妈妈亦讲过，特朗普对呢粒女供书教学做到足，不过生活上一切都教唔到佢。对于爸爸侮辱女性嘅丑闻，Tiffany都有为佢辩护嘅，话爸爸教导佢地做女人都可以男人一样咁叻、咁成功。不过Tiffany睇黎唔想靠父干，既努力发展音乐事业，又去时装杂志Vogue实习。
不过今时今日，咁样做富二代系唔够嘅，一于伊人当自强！Ivanka遗传咗爸爸嘅生意头脑，间唔中会上老豆主持嘅真人骚《飞黄腾达》客串下，过下明星瘾，今日已经系特朗普集团嘅副总裁，仲有自己嘅时装品牌，咁索做埋生招牌。不过今次为咗帮老豆选总统，已经得罪晒全世界所有女人，要杯葛佢嘅时装品牌。孝顺嘅Ivanka仍然死撑老豆，话美国最宝贵嘅地方就是人们有自由做想做的事，又话自己嘅品牌系希望给予女性力量，如果其他人要政治化，佢都无办法。或者，善忘嘅人类好快就唔记得特朗普选过总统呢，特朗普输咗都唔驶喊，钱仍然大把。
睇住民调，我谂大家会认为其实希拉里胜利在望，希拉里做左美国第一位女总统，亦会改变“第一夫人”嘅传统角色，不少知情人士都认为，克林顿会协助希拉里外交及其他重要政策，打理白宫家头细务则交比36岁嘅车路士，拣下窗帘布、负责搞下party、国宴菜单𠮶啲咁（唔系叫克林顿做挂？），再次肩负起起第一女儿嘅职责。
幸福人妻斗放闪
相差一岁嘅Ivanka同车路士嘅命运或者注定有好多相似嘅地方，都系嫁咗个犹太裔老公兼做埋妈妈。又咁啱嘅系，两女嘅家翁都分别因为逃税及诈骗坐过监。已为人妻嘅Ivanka今年初仲为老公生咗第三个bb，一家五口成日喺Ig放闪。点解一家五口都可以咁靓嘅?!!!真系闪到飞云眼都盲。车路士都唔输蚀，虽然星味未及索爆Ivanka，但车路士最近都替老公生左个仔，凑够一个“好”字，一样咁幸福。
当然比起特朗普家族，克林顿一家唔算超级富豪。然而两位千金嘅生活，已经足够令大家葡萄（系咪好想阿源上身呢……），住洋楼养番狗也许唔足以形容，就带大家睇下示范单位！
左边系车路士靓屋 右边系Ivanka靓屋
车路士同老公喺2013年以1000万美元买下纽约“最长”的住宅，长度延伸整栋大厦。近2000平方尺嘅住宅，楼底10呎高，拥有宽敞嘅开放式厨房。Ivanka一家同样定居纽约，喺2011年豪花1600万美元购下位于上东区Trump Park Avenue面积4200平方尺嘅顶层单位。
叫我阿妈nasty woman 你话点忍？！！！
今次总统选举异常丑恶，特朗普直呼希拉里“nasty woman”，对于Ivanka同车路士嚟讲，真正系一场友情考验，不过佢地两位都坦言好欣赏大家，仲当对方好朋友，见面都不谈政治。人前答得咁得体，系真唔系咁大方？睇下边个赢先讲。
最后我问番你，A餐定B餐？Sorry，都唔到你拣。
下集，飞云再同你讲下克林顿家族同特朗普家庭嘅恩怨情仇，记住睇，bye lu!