香港冇wifi的cafe何其多：有台有电掣就系冇wifi 快餐店上网更快
记者不是文青，但以文字为生的人，总要依赖cafe勇敢生存。一间有wifi 的cafe，是拯救无数文艺青年的避难所。Cafe提供wifi不是理所当然，只是我们发出卑微的哀鸣。
跟大家玩一个小游戏，点击下图你认为哪一间有提供免费Wifi？
文末开估 !!!
有Wifi的Cafe是自由工作者梦寐以求工作室
以创作为生又或是自由工作者(slasher)，每个月好似接咗好多工作，之但系只系帐面数，有啲要迟几个月，甚至收不到稿费，日日check户口过数未。生活逼人，居住环境挤逼，每月负担不起万元以上租工作室，讲真一部电脑走天涯，又唔系startup 租工作室嚟做乜。自然地，那些Cafe有个大大玻璃窗，靠窗有一个地台，放著几个cusion，背著一个大书柜，还有那坐低咗成世都唔想起返身的梳化椅，成为一群自由人梦寐以求的工作室。一杯咖啡，一件蛋糕，还是我们能消费得起。
记者惯于沙田文化博物馆的牧羊少年咖啡馆工作，博物馆提供免费wifi (虽然间中会断线)，但环境宽敞，食物质素高食得饱。不过，一间有wifi的cafe系唔够。记者有时候无固定工作地方，编辑话“你份稿有啲嘢改㖞 !”又或者剪片同事剪好一条短片请你过目，就要九秒九揾间有wifi的cafe坐低做嘢 。冇wifi的照顾底下，数据用量好似阴尸纸几秒间化为灰烬。你总不能光站在7-11半粒钟，又或是同阿婆阿公去大家乐争位坐；又或是日日去图书馆同高考生抢位，又或是日日食M记打稿，稿费未收到人都油尽灯枯。我只系想讲，呢个社会的确有群打工仔，唔系为煲剧，而系为两啖饭而依赖wifi生存。Wifi，就是“文字人”的氧气。
既舒适又有wifi的cafe，难揾过女神啲脚毛
但要揾一间环境舒适、食物质素高食得饱、唔多人任坐唔嬲、有电掣叉电、免费Wifi的cafe，难揾过喺女神脚上的脚毛。例如油麻地，要找到舒适的Cafe已经好不容易，记者最爱就是电影中心旁的Kubrick。谂住睇场戏之前可以打阵稿，只可惜Kubrick没有提供wifi，但记者已经叫咗杯好贵的苹果茶，唯有硬食坐低打吓字，当真系要上网的时候，就过一过隔篱M记借wifi，揾齐晒资料就过返嚟Kubrick。
大家唔好好似记者咁肤浅，上网查“文青Cafe”，以为那些杂志推介的文青Cafe就有Wifi提供。一，基本上有新开张的Cafe，都被杂志归类为“文青Cafe”，根本是一个强加的名份。况且，有张木台，摆个书架啲杂志就话系文青Cafe，唔通V面嘅就系女神咩！Cafe提供Wifi，亦非理所当然。
不要盲目相信店名、IG相
因此，找到一间舒适又唔多人争位的Cafe，其实已经是小确幸，如果有埋wifi，仲可以喂饱肚皮，系开心嘅。“小房子”、“一扇门”、“屋子”等等，呢啲店名似到好似阮兆祥同卢觅雪个样咁(成日唔记得去开𠮶间叫乜名)，都是那种有地台cushion、木台、大大个玻璃窗那一类装潢，都好舒服。打开IG，食物相都拍出女神相的果效，加埋啲睇几次先睇得明，似诗唔系诗的caption，𠮶种阳光感、艺术气质令你觉得喺𠮶度创作一定好有灵感。三间舖头都好大方，标榜任坐唔嬲，让人用轻食消费空间的好地方。之但系，以上三间舖头，边间系食得饱冇wifi，食唔饱但有wifi，真系难答过会考啲选择题。要两者兼得真系唔容易，因为好多cafe提供的轻食轻过纳米份子，𠮶啲饭团只够填饱女神的肚和相机。(据记者观察所得，通常有干花的cafe都系食唔饱。)
有电掣叉电位，但冇wifi。
不过，的确有一种情况又真系绝望过输咗条输卵管。还记得有一次经过沙田的一间咖啡店Beans，眼见一张长台，全是面壁思过𠮶种自闭位，每隔都有一电掣叉电位，仲有书台灯，心谂今次一定有wifi喇挂，就冇打电话去问清楚，点知真系冇，只可以用商场30分钟的wifi，引言都未屙到出嚟，wifi 就断咗，𠮶种惊喜好似如厕中的时候马桶突然消失一样。当电脑search到有wifi，侍应又话你知：“唔好意思，呢度冇wifi。”的时候，真系想将一个keyboard 啪落自己大髀泄愤，“抵死吖，唔问清楚！”
咖啡店wifi慢过大家乐
你又唔好以为咖啡越贵，wifi速度越快。记者用通讯事务管理局办公室OFCA的测速app，测试不同cafe wifi 上载速度，测速三次取其平均数。结果发现油尖旺区高档cafe（咖啡$50-60/杯）wifi上载速度平均只有5 Mbps；而Starbucks平均有16 Mbps；Cafe de Coral 却有60 Mbps，快餐店连wifi都快过人！
有Cafe提供免费wifi，甘愿将地方打造成freelancer工作的Office，他们如何经营下去？只要装修靓靓，却被传媒强加文青cafe之名，老板们又有什么看法？下回分解。
下图边间Ｃａｆｅ有 Ｗｉｆｉ开估！！！
讲真，明明系餐厅咪餐厅，做乜叫自己做Ｃａｆｅ嚟玩人啫！