【有片·跳出嚟】Freelance 平面设计师新手建议：如何开价？

为咗有自由嘅生活同时间，愈来愈多年青人选择唔返正职，自己接Freelance揾钱。但好多人都唔知点起步，一开始经常都会谂点同客户沟通、点倾价钱、点令客源突破亲朋好友介绍等等问题。有5,6年Freelance经验嘅设计师Roger在片中就有一啲经验分享。

而关于开价与被开价，就有以下粗略的法则备忘啦：

1)Free Pitching：就系唔同公司或者Freelancer之间投标竞争。过程要度桥、写计划书，甚至做Sample。最后客户选中就有得做有钱分、唔中就前功尽废，1蚊都冇。其实外国都有用Pitching嘅方式，但通常都会有一笔钱比竞争者，即使最后冇畀人拣中都会有钱落袋，当然拣得中就可以再同客户倾会再畀几多钱去做啦。(香港行规就系“免费奴工”)

2)做唔同嘢嘅价钱，其实都冇得讲到好实，做Freelance可以话冇公价，所以有时根本就唔知点样同客倾。一方面惊收得太低，开高啲又怕冇人揾你做。我哋喺网上揾过人报价，整理咗几个大约价目出嚟，虽然只系参考性质，但希望都有少少帮助。

2a)做200页，A5大小嘅小说，负责排版同封面设计，大约系7000到10000起步。页数、图片数量、客户要求等等因素都会影响价钱。

2b)做活动嘅美术设计，最基本就要做Logo、活动海报、传单、Backdrop、网站乃至舞台等等项目。价钱约10000到20000起，亦都系因应唔同项目数量变动。有部份设计师，接咗个活动返嚟做，自己设计完Logo、定好大约美学风格、方向之后，会将细项判畀其他人做，自己收少啲钱，又做少啲；亦可以选择一脚踢做晒。

2c)当然，上面嘅价钱除咗会受唔同项目影响，客户系政府机构定私营、设计师经验同知名度、交货日期急唔急等等都会令价钱有好大落差，所以都再强调，上面价格只能做参考，喺同客人沟通过程中，都要灵活变通。