【来稿】西九龙中心嘅廉价骑呢，就系其存在意义
西九龙中心赶走5蚊两球雪糕小店，爆出公关灾难。系因为定价太平顶烂市？抑或店主得罪咗业主？我唔知。我只系知，呢度嘅装修格局从90年代冇变过，𠵱家个厕所走廊仲贴住周秀娜、Twins嘅登台相！我有合理怀疑，廉价同骑呢就系佢唯一卖点，如果有一日佢唔再廉价骑呢，点解我哋仲要去？
外人觉得深水埗有好多低下阶层，但以前嘅西九龙中心一样包容。你估每个商场都咁大方？喺圆方，对穷L嚟讲，你负担得起嘅可能只有住宅平台𠮶几啖空气。但旧时嘅西九龙中心，无论你系公屋仔女、㓥房户定纸皮阿婆，都可以喺入面用蔗渣价钱买到各自嘅的娱乐。
蔗渣价钱 买到娱乐满足
呢度冇意大利Gelato ，但有5蚊两球拳头咁大嘅雪糕。冇潮牌同A&F，但“苹果商场”淘宝货着上身都差唔多啫。小朋友去唔到海洋公园？唔紧要，几蚊都可以去奇趣天地坐碰碰车、掟几粒波仔。日本料理更加唔使讲，有连美国前驻港领事夏千福BB都唔敢挑战嘅明将寿司，威震四方。畀唔起钱都唔紧要，8楼美食广场可以任坐，飞雪溜冰场嘅白雪景色免费任睇；唔钟意坐，又可以挨住栏杆俯视众生，望吓人望吓骑呢𡃁模show，过吓日辰。
【西九龙中心】90后难忘奇趣天地、迷你版海盗船：曾经系潮流指标
明明系一个稳定地落后于时代嘅商场，但西九龙中心竟然一直吸引到明星嚟踏旺个场。从2000年代嘅Twins、容祖儿、Boyz，到𡃁模、AV女优，甚至AKB48都留低过几条脚毛。今日，䢂口同厕所块墙仲诡异咁保留住过气明星嘅出show相，更有疑似未整容前嘅原貌，弥漫住一种90年代嘅没落氛围。睇新闻先知，原来男子组合Sun Boyz曾经喺西九龙出show𠮶阵，从5楼吊住威也飞落嚟，AV女优小泽玛利亚喺度搞过……抱抱会。喺𡃁模大乱斗嘅年头，仲有唔少乜乜baby喺度寸其他靓模，话人哋老、个波系假。
包容骑呢异族的温柔
最难得嘅系，万千宅男日盼夜丁嘅日本女子组合AKB48，竟然试过喺西九龙中心开设全球首间海外专卖店，仲嚟港宣传，搞到班宅男鬼咁hapi。近年，西九龙中心亦开设咗唔少小众兴趣嘅舖头，好似Lego店、羊毛毯手作店，6楼同7楼仲成为盲人按摩店嘅集中地。就系咁，西九龙可以将社会上穷嘅、另类嘅、小众嘅、宅嘅、毒嘅乜都捞埋一齐。即使呢度娘，唔够光鲜，冇圆方嘅贵气或者apm嘅潮流，但香港边度仲有咁接地气嘅商场，有咁包容嘅空间，将社会上面唔同小众又弱势嘅群体沟埋一齐，畀佢地用少少嘅消费同社会接轨？
不过，连深水埗重建旧楼都可以包装到市中心豪宅咁浮夸嘅年头，西九龙中心唔续租小店，系咪想升呢为西九龙“圆方”？AKB48专门店已经搬走，明将都执埋，变成价钱贵一截嘅“韩日烧BBQ”。香港已经冇乜偶像明星再会去西九龙，或者咁讲，香港根本再冇偶像明星。当今日喺深水埗都可饮到杯文青手工咖啡𠮶阵，仲有乜嘢唔会变？ 如果有朝一日，西九龙变得唔再西九龙，再冇劣食同𡃁模女优，𠮶班跟唔上时代、被社会遗忘嘅人，仲可以喺边度存在？