【废青企管学】请成全“博炒”的人

航空公司裁员，一嘢炒600人，当中可能好多无辜打工仔好伤心，自问尽心尽力尽责求两餐，瞓醒就无咗份工；
更甚者有人对公司唔只讲金仲一直讲心，被炒个感觉就好似失恋咁：“我咁爱你，点解你突然间唔要我？我究竟做错咗啲咩？”

电视剧对白话“嫁比份工好过嫁比衰男人”，此话一出，身边的确有几个女强人对呢句对白表示认同（吓亲我），原来真系好多人谂住同份工一生一世，但系而家现实就立即话你知嫁比份工并唔系你谂得咁稳阵，公司同你分手真系出一封信而已，你就连私人嘢都无机会执。但系感情嘅嘢，有人爱得投入难舍难离，另一方面亦有人潇潇洒洒觉得天涯何处无芳草，返工态度就系“炒我丫笨”，日日迟到、得闲“病”吓、永远怕蚀底惊做多嘢、同事有困难就企埋一边食花生甚示踩多几脚……偏偏呢啲“炒我丫笨”嘅人，可以寄生喺唔同公司，仲要炒极都炒唔到佢。

转多几份工就发现，勤勤力力同懒懒散散嘅人，好多时待遇都差唔多，好运嘅话，勤力𠮶个可以每个月赚多三几千人工，唔好运嘅话，懒懒散散𠮶个仲做埋勤力𠮶个人嘅上司，公平咩？痴线，你信职场上有公平架咩？当我遇到第一个懒散人而佢完全唔担心比人炒嘅时候，我同自己讲：“呢间公司唔炒人，养到啲人懒哂。佢入到呢间公司真系好彩。”转另一份工，又遇到同一类人，我再同自己讲：“佢职位低，人工平，所以公司唔炒佢，当养只牛，佢真系好彩。”然后到第三份工又再遇到，佢仲要系经理级，好啦，原来间间公司都有“炒不到的人”，呢班人都有一堆共通点……

唔介意其他人点睇自己

做人要得到快乐，“唔介意其他人点谂自己”真系好重要，而呢样嘢系要修练返嚟，唔系人人都做得到，简单举个例，你买咗件新衫，同你平时Style完全唔夹、Cutting又同你身型格格不入，但系唔买都买咗，你点都想著一次，点知著咗返工被一致劣评，同事A话：“哗原来你手臂咁粗。”、同事B话：“你今日做咩著到成棵树咁呀？”，听完呢啲说话，你仲敢唔敢再著件衫返工？如果你有犹豫，即系你都介意人地点睇自己。而𠮶班“炒不到的人”真系好睇得开，佢地好明白，自己日日迟到、扮病、推Job、做错哂啲嘢、过咗Deadline都唔交嘢等等所带比其他同事嘅痛苦，系唔会影响到自己嘅快乐。就算明知其他同事喺自己背后指指点点，但佢都系继续懒、继续Hea。 

我有个朋友阿强，喺一间外资公司度做，佢条Team就得三个人，经理、阿强同埋一个“炒不到的人”阿金，阿金除咗每日迟到成粒钟之外，仲要极唔独立。外资公司当然系每次开会都用英文，要迁就返啲外国嚟嘅老板，但阿金本身英文奇差，每次开会都听唔明，然后散会就旨意阿强解释返比佢听，阿金见有人帮自己，就越来越依赖，完全无正视自己喺公司入面嘅沟通问题、无打算去进修，Email唔识打都系叫阿强帮手，完全无羞耻之心，理直气壮讲句“我唔识”就可以唔洗做。慢慢，阿强因为要照顾埋阿金，工作量就越来越多，而阿金就好安心咁每次开会都恰眼瞓、玩电话，放工约班猪朋狗友劈酒到天光，然后又唔知醒，又迟到或者Sick Leave。我问阿强点解佢公司可以接纳到呢个人？好命嘅嘢真系葡萄都无用，佢地个经理系一个善良基督徒，对于阿金嘅恶行真系原谅佢七十个七次，担心炒咗阿金会令佢生活有困难，唯有不断劝劝劝……期望佢有一日会浪子回头。

而阿金呢啲人又真系可以完全无半点唔好意思、无自我检讨，亦唔介意其他人话佢蠢呀废呀，继而无赖落去。我谂一谂，点解有啲男人可以打女人、不停滚都娶到老婆？因为佢唔介意人地话佢贱格，加上身边有一个不断纵容佢嘅傻猪。

膊头要够A

A字膊嘅基本功当然系推Job，“炒不到的人”对于Take唔Take一个Job，并唔系睇件事值唔值得做、对公司有无效益，而系睇“边个叫我做”，同Grade叫佢做？推；隔离Team Head叫佢做？推；自己Team Head叫佢做，而个Team Head系唔恶嘅？推。就算个Job可以为公司带嚟100万收入都好啦，总之乜都唔上身，佢地有个好坚定嘅心态就系“炒我丫笨”。

基本功再锻炼上去就系将啲Job交比其他同事，交咗出去之后，个Job就完完全全系属于同事嘅，话之对方做到呕白泡都绝对唔会出手帮忙。今次个苦主系做HR嘅Jennifer，佢公司每年年头都会搞春季大旅行比同事参加，Jennifer系一个新同事，上司当然系将呢啲猪头骨Job交比佢啦，但Jennifer入职一个月左右，都未摸清公司运作、过往活动系点，甚至连活动Budget都未知，但上司交咗比佢之后就完全唔理，个态度系“唔关我事”，仿佛成件事唔系公事而系Jennifer自己要搞生日会咁，一啲Support都无，问意见又求其交啲废话。佢上司就系“炒不到的人”，呢类人好叻将所有交咗出去嘅公事都当系同事嘅私事，“单嘢系你嘅”、“你做死系你嘅事”，不带一点Team Spirit。

一间公司唔炒人唔等于就系好公司，因为“对工作上心嘅人”会被𠮶班“炒不到的人”搞到好痛苦，话就话做好自己本份唔洗理啲衰人，但一齐做嘢，对方工作心态唔好，会令“上心人”被连累、被影响，长此落去又点会唔心灰想辞职？结果走吓一个、走吓又一个，“炒不到的人”就长Hea因年资而升职，由害同Grade变成害下属。呢啲人嘅衰嘢点止咁少，一齐嚟我Facebook Page分享更多。

（文章纯属作者意见，不代表香港01立场。）