张敬轩首亮相《Chill Club》 赞疫情下续请乐手：令佢哋有收入！
日前张敬轩（轩仔）现身无线录影音乐节目《劲歌金曲》，今日（12/3）则首度亮相ViuTV拍摄另一音乐节目《Chill Club》。轩仔接受《香港01》访问时透露，自己在拍摄前特意参观录影厂，笑言有种拜访景点的感觉：“我有好多朋友上过去做节目，今日见到佢哋成日喺录影厂出面影相嘅走廊，有种‘终于嚟到呢个名胜’嘅感觉。（有打卡？）系呀，啱啱都影咗啲相。”
轩仔透露在节目中将演唱两首从未作现场演出的曲目，包括收录自上一张专辑《Senses Inherited》的《装睡的情人》，及在新碟《The Brightest Darkness》的《重头开始》。他坦言在录影期间感到紧张，又认为与Joey Tang（邓建明）等音乐人合作机会难逢：“我好耐冇同Joey Tang合作，同Tang Sir咁多年都系喺大型演唱会合作，但系今次可以好近距离Jam歌，觉得好开心。”
轩仔又特别讲到与主持骆振伟（Thor）合唱《笑忘书》，原来轩仔在2013年转投英皇娱乐后，Thor刚好就约满离巢，他对这位同门“师兄”近年发展感到高兴：“佢参加新秀𠮶年，唔记得系咪做评判，总之我就系喺现场。我觉得佢就好似伍仲衡评价强尼嘅说话一样，乐坛欠佢一个交代。佢系用心做音乐，相信虽然佢喺电视台有好好嘅发展，又有拍剧又做主持，但系我谂音乐都系佢好想得到成绩嘅一个范畴，希望乐迷同爱戴佢嘅观众都畀多啲支持佢。”
直言《劲歌》与《Chill Club》无法比较
轩仔先后现身《劲歌金曲》和《Chill Club》，他指后者在音响、灯光的水准高，被问到两间电视台的音乐节目有何分别，他坦言无法比较：“两个音乐节目嘅制作风格同目的好唔同，坦白讲，其实冇乜嘢好比较，因为大家做紧唔同嘅嘢，唯一嘅著眼点系，音乐节目一定要推动乐坛，令歌手同音乐人有表演机会。”
他特别提到《Chill Club》在疫市下沿用现场乐队为歌手伴奏，为乐手雪中送炭：“成个疫情当中，我哋几乎冇晒演出，但系因为《Chill Club》，一班乐手可以有好稳定嘅收入，呢个系我觉得电视台音乐节目最可贵嘅地方。其实音乐节目除咗畀一个平台我哋唱歌，对乐坛系有一啲隐性作用。”
“唔会特登谂要去边个台！”
被问到日后若两间电视台颁奖礼撞期会如何取舍，轩仔解释在没有电视台歌手合约下，两者之间根本不需要作取舍：“以往大家有一种认知，认为某个电视台唔畀艺人去其他电视台，其实我哋当时要签（电视台歌手）约，而呢个举动系基于尊重合约精神。因为冇乜人讲过，所以我都唔想大家有误会，其实如果歌手冇（电视台）合约，喺任何一个传媒都可以出现，例如我依家系冇合约，所以唔会特登谂要去边个台。”他又称自己今年保持当新人的心态，希望接触更多不同类型的节目：“喺呢行，你要抱住去嘉年华嘅意识先得，𠮶度有摊位游戏咪去玩啰，输赢唔紧要，最紧要系玩得开心，呢个就系我依家嘅心态。”