12日︱为张栢芝复出度身订造　林爱华盛赞Stephy︰演到咁内心嘅戏

香港爱情电影《12日》，由《12夜》导演林爱华执导，邓丽欣及马志威主演，电影已于4月27日正式上映。今日（29日），林爱华携同邓丽欣、马志威一同出席电影宣传活动，与观众见面。宣传活动前，执导《12日》的导演林爱华接受访问，谈及电影拍摄的源起与Stephy邓丽欣的表现，并对新一代女性感情观念的看法。

林爱华接受访问时，提到剧本写作的始末：“其实原本剧本系因为张栢芝复出叫我写嘅，咁因为复出、仲要系续集，所以用返呢个Format写啦！但系因为种种原因开唔到，变咗剧本就摆低咗，然后最近有投资者有兴趣，就拍返呢个剧本。”由为张栢芝度身订造，变成由邓丽欣主演，林爱华表示未有在演员层面上迁就：“就演员（的改动）唔多，不过两位演员嘅气质系唔同，发觉佢哋演嘅方法都唔同，就算系同一样对白。但系唔同系《12日》系要由廿几岁做到三十几岁，Stephy本身可以咁样塑造，喺外型嚟讲，变咗有一个优势。”

林爱华亦盛赞Stephy在电影里的表现，表示非常满意：“开头我都唔知Stephy可以演到咁内心嘅戏，因为呢套戏都侧重个女主角，同埋佢𠮶种唔开心系好内敛、喺里面嘅，对演员嚟讲系好难嘅。唔系一啲好大嘅事件，而系心理好微妙嘅转变。”她亦补充指：“同埋又有爱、又有恨，咁可能Stephy自己经历过一啲恋爱，我觉得比佢以前系有深度啲嘅。”而在拍摄前，林爱华亦花不少时间与Stephy交流对婚姻、爱情的看法：“Stephy同𠮶个角色好唔同，Stephy系好男仔头，同埋佢好有自己嘅主见，但系佢个样呢就好似好Feminine、好女性化。”

由剧本完成至今，香港女性的社会地位与角色一直在演进，林爱华表示未有刻意按新一代进行改变：“如果一改呢，而家廿几岁嘅女性，系另一个故事嚟嘅！我系想拍呢个故仔，我谂系差唔多三十几岁以上嘅男女会睇得明啲，甚至你四十几岁更加好！”她续指：“我唔想个故仔系包罗万有，系所有年纪嘅女仔都有，因为如果系咁会自相矛盾，所以我唯有牺牲咗而家廿几岁、新一代嘅女性。”

而对于新一代的女性，林爱华亦有独到的看法：“我觉得而家系几Unisex（中性）嘅，好难讲话而家嘅男、而家嘅女，而家廿几岁嘅Generation系好似嘅，男同女之间。”而在爱情题材之上，林爱华亦正准备一部投入科幻元素的新作：“我而家反而写紧一个三角恋嘅故事，但系对象一个系人、一个系机械人，我觉得咁样反而系新！人唔完美，但系有个机械人系完美嘅，究竟你会想拣一个人定系机械人？”