浊水漂流专访｜吴镇宇再爆演技做染毒街友 “分明想攞奖啦”
由《翠丝》导演李骏硕自编自导，吴镇宇、谢君豪、李丽珍、蔡思韵、朱栢康等人主演的《浊水漂流》，改编自香港真人真事情片，讲述一班于深水埗天桥底下聚居的露宿者被社会边缘化，他们因为城市再发展而长期遭到扫荡清场的故事，较早前吴镇宇抽空接受《香港01》访问，分享饰演火爆街友“辉哥”的心路历程。
接拍染毒街友为攞奖？
先问到吴镇宇今次点解会接拍做染毒街友“辉哥”时，他笑言：“分明想攞奖啦下嘛，上次都有嘅，我成日都唔记得扒龙舟个套叫咩名，真系惨，由佢啦。（记者︰《逆流大叔》），《逆流大叔》增肥三部曲最后一部曲喇嘛，每年都同新导演合作，新导演有新嘅谂法，成本又唔会好多，唔多就唔会俾投资方有咁多掣肘，而呢个系个比较特别嘅题材，系改编真人真事，我谂呢个社会现象几值得拎出嚟讨论下。”
影帝极投入 睇剧本已落泪
问到首次接到剧本时，哪场戏最令他印象深刻，想不到影帝都睇到投入而落泪。他忆述：“睇剧本喺船上面个场戏喊咗出嚟，个种伤感嚟自于演员同情呢个人，佢冇出过深水埗㗎大佬！搭个船发觉‘哗，咁多楼同人㖞，满到泻，我就穷民区出嚟，佢又不断填海，即系有咁多钱点解唔去…’觉得几惨系踎喺船头望另一个世界，呢场戏好触动到自己情绪，都会‘呜呜，好惨啊..’咁样。加上维多利亚港冇规划嘅，地产商话乜就乜，冇一个原则性，点解唔填埋过去啫？”
“深水埗咁多年都冇变过，啲路我都识行”
由于电影中一班街友正正就是在深水埗，问及吴镇宇对深水埗有甚么特别回忆时，他指自己暑期工正是在深水埗南昌街一间酒楼返工，以前或现在要买杂物都要去深水埗，而且在此能够揾到以前香港最接地气的玩具和茶餐厅，直言深水埗咁多年都一样，条条街都系咁，啲路自己都识行。
及后他补充:“其实香港本来系点嘅样呢？就系深水埗咁嘅样，跟住就会尖沙咀咁。同埋如果你在深水埗行，行下行下就会及发现点解咁多名校、名车？因为已经到咗太子界限街，真系一条街㗎咋，个分界线唔系好明显㗎咋。而本身喺深水埗嘅人夜晚系会出嚟喺公园抖凉，而家地摊都被赶绝，虽然有人喺度吸毒，但唔系贩毒或制毒嘅主要地方，佢罪恶唔系好大，同埋个啲人系有人拎综援，但都有人仍然靠紧自己双手去揾钱，同埋政府真系冇乜点关注佢哋嘅需要，最好已经系俾个针筒收集箱佢哋叫佢哋唔好乱掉，所以喺个度拍感情会变得好浓。”
愈拍愈有真感情 提及清场事件仍有道火
早前官方释出的花絮见到吴镇宇事后再次提及清场事件仍然好嬲，问到他个人又如何看待该次事件，他今次同样讲讲下都有火：“辉哥咪就系我爸妈个类人，未必系香港土生土长，但对于香港嘅建设出咗一分力，将自己最黄金嘅时间投放喺到，只不过系唔好彩冇运气要住深水埗。佢（辉哥）嬲在个程序，我摆喺到嘅嘢唔执得㗎嘛，又掉晒又咁样又唔道歉，家下系咪我好恰先，老老实实，X！我哋做错嘢咪去坐监啰！我觉得换转辉哥系自己亲人都会有道火喺到。”及后吴镇宇再补充深水埗的街坊感觉好强烈，而家跟囝囝讲甚么是街坊他都不知道，已经没有了那种守望相助。
“咁都三级就咪L拍喇！”
根据《电影检查条例》，本片列为三级片，只准18岁或以上人士观看，吴镇宇听毕即表示：“个啲系旧式粗口嚟，连你老X都冇㗎，都系托唛托乜、把唛把乜，咁都三级，有冇搞X错啊，X！同埋个个阶层嘅人就系咁样讲嘢，好似茶楼啲人、咕喱佬咁，唔系点讲嘢呢？我唔觉得系个粗口嚟㖞，粗咗喺边呢？你揾一句系攻击性闹人？咁又要点样表达呢啲人嘅身份呢？点解三级呢？超，如果系咁样就咪L拍喇！”
坚持有几值得？
最后吴镇宇对于因为坚持会失去唯一家园、同伴、甚至系帮自己的人，乍听的确不值，但他认为：“觉得辉哥好值得发呢个脾气，我嚟X咗香港做咗咁耐嘢，最后拎综援瞓街，你揾架车一嘢扫晒挞地，咁我又可唔可以冲入你屋企拆烂你啲僭建物，话因为你僭建？你唔可以越过程序，咁唔使讲法律讲阶级已经得，同第三世界国家比？你点话比人进步都冇用，一个国家、社会嘅进步系你照顾到几多瞓街嘅人，唔系因为你照顾到几多住山顶嘅人，山顶嘅人嘅钱系因为我哋瞓街嘅人而得嚟，佢老X佢自己有生活能力咩？唔觉得有㖞，所以佢发呢个脾气系好应该。”
Credit：
Makeup：Kargo
片段提供：mm2 Studios Hong Kong