真．三国无双｜张建声酒店习武变卖艺　难忘智叔教导︰似亲人离开

由导演周显扬执导及监制、杜致朗编剧及监制，改编自日本同名经典游戏的电影版《真·三国无双》将于4月29日上映，现时在尖沙咀iSQUARE举行“《真·三国无双 》展”，合共展出12套角色戏份兼兵器，今午（2日）请来“张飞”张建声、屡获香港电影金像奖及台湾电影金马奖提名的著名设计师吴宝玲（BoBo姐）举行开幕仪式。

操完大只冇用要极速增肥

据知《真·三国无双》单是戏服以及打造武器的制作费已高达千万港元，剧组更远赴新西兰取景，对此出演张飞的张建声表示自己当时早有准备：“因获前老板兼伯乐萧定一先生指定要做张飞，最初收到指引要做到变形侠医咁大只，好畀心机同时间去操到好大只，点知着戏服时都系同游戏有出入，Bobo姐同萧定一先生建议‘不如你增肥啦阿声’，所以之前操落嘅都无晒，不过唔紧要，增肥15磅块面都有返肉，再着戏服都系差咁减啲，Bobo姐好好整咗件特制米芝莲衫，由脚包到手，最终出到嚟终于似张飞个形态，呢个对自己嚟讲比较难忘。”

全身负重仲要拍打戏

而当问到着戏服有咩难处时，张建声回应：“因为拍摄场地好热，40几度、 体感温度50度，真系会中暑、休克，我自己套衫因为包实要由背后拉开，所以好大胆咁偷偷地剪过bobo姐件衫，要开窿去洗手间。另外因为天气太热嘅关系，又有打斗戏份，真系出晒汗，而件米芝莲戏份就会吸晒啲汗，变相更加重15磅、再加上支破军蛇矛都10几20磅、仲有盔甲真系重上加重。”

练武被游客误会卖艺

由于今次演出人物众多，张建声自言拍摄都有压力，事关他的身形加上戏服的关系令他活动不算灵活，他笑言：“有日武指林定安先生要我耍招过背花，今日教我听日就要拍，本身冇武打底子，加埋戏服又重，好在同行有位武指栗米在酒店大堂拎住支棍练足一晚，最搞笑有游客望住我哋拍手掌，以为我哋喺到卖艺，呢个真系好深刻，到第2日3 take之内成功先心安。”

有古生、雪哥就有笑声

而问到在收工后，镜头下的大家是否已经筋疲力竭忙着休息时，他即时拧头：“因为同周显扬导演、监制杜致朗开工最好就系夜晚一齐食饭食好嘢，尤其古生（古天乐）、雪哥（林雪）喺到就会笑料百出，其实24味Brain都喺到，每一日几辛苦都好，食完个餐饭就会好舒服，等第二日再拍过。途中我哋刘关张三兄弟本身唔熟，但因为二哥韩庚（饰　关羽）邀请我哋上佢架餐车到食饭，开始玩到癫，之后我去北京、台湾都有揾韩庚、祐宁聚聚。”

不舍智叔离世　犹如人生导师兼家人

最后提及廖启智（智叔）离世，张建声都有表示不舍：“同智叔都合作咗好几部戏，每次都会同佢讲‘智叔我又偷咗你啲嘢落袋’，佢会话‘你个衰仔吖，有咩还返俾我先？成日偷我嘢’，佢俾我印象真系位好老师、好朋友，无论喺我做人方面佢俾多意见我，甚至乎关于做戏嘅，佢反而唔会去俾答案我，会带领住我去谂，因为冇啱与错，每个人发挥唔同。最深刻都系《无双》，我同智叔、发哥（周润发）每日凌晨5点去跑步，同到两大巨星跑步当然开心，而我同智叔都会再行一段路讲人生经，可惜人真系好化学，好突然，有亲人走咗嘅感觉，希望佢屋企人节哀，相信智叔喺天堂都会开开心心。”