寻秦记｜黄文标廿年后再演古天乐兄弟　滕翼现身：感觉好似一家人

电影《寻秦记》日前推出首预告，身为主角兼老板的古天乐，数年前已苦心经营，花尽心力去集齐剧集演员，希望以原班人马姿态再次参与电影版演出。所以从预告看到林峰、宣萱、郭羡妮，加上主题音乐一起，已经回忆返晒嚟，非常感动。

而从剧照看到，大家更惊喜发现，在剧集中饰演项少龙结拜好兄弟滕翼，都有现身，该角色由黄文标饰演，廿年前在剧中重情重义，不苟言笑的性格深入民心，廿年后能够回到电影版，原来都有段故。

黄文标在剧集饰演滕翼，是项少龙的结拜兄弟，性格骁勇善战，亦是剧集中最先相信项少龙是来自未来的古代人。标哥接受《香港01》访问时，回想当日古仔找他归队，自己都非常开心。“当然开心，估唔到廿年后可以演番同一角色。后来从剧组得知，剧本原先冇滕翼呢个角色，要去到第10稿先加我落去。”标哥坦言自合作《寻秦记》后，其实甚少跟古仔联络，但对方仍然记得自己，非常感动。

点击睇《寻秦记》最新剧照

古仔窝心举动标哥都挡唔住

不过数到最窝心，还是在片场上，古仔对在场每位工作人员的无微不至。黄文标︰“话说套戏在贵州山区拍，当地温差好大，中午热到有三十几度，傍晚就可以跌到得十度，好易冻亲。有日开工我拎错衫得件薄褛，但当日就跌到得十几度，成个人即刻觉得凉凉地咁。宣萱好好，即刻借个暖水袋畀我用，朱仔（朱鉴然）又立即除件褛出嚟一齐搭住。呢个时候古生经过见到，就问︰‘做咩？好冻呀！’然后就叫助手拎佢自己件羽绒畀我著。当下真系好感动，好窝心，感觉真系好似一家人咁。”

标哥个样似耶稣？

问到当年拍《寻秦记》跟古生的合作，标哥都笑指古生的爆肚位好劲，有时都好难接得住。“因为佢个角色唔使讲古语，成日爆啲现代人对白嚟搞笑，有次Roll紧机，佢无端端指住我，话我个样都几似耶稣，我𠮶下真系接唔住。Cut机后佢同我讲，之后久唔久都会咁样爆下肚，唔使理佢。”结果这种演绎方式就成为剧集最好睇的地方。“唔好睇住预告咁认真，古生喺电影版都会有唔少呢啲搞笑位。”标哥透露。

《寻秦记》电影版首预告精彩场面