开工大吉77｜曹查理拍三级片致富：六万蚊一组日日开工开足几年

久未露面嘅曹查理接受苑琼丹主持香港开电视节目《开工大吉77》访问，大谈当年拍三级片往事。曹查理就话当年决定接拍三级片皆因条气唔顺：“当年我几靓仔又高大啊，但成日都做奸嘅，处于半红不黑位置，最红反而系曾志伟、大口青，佢哋做晒主角嚟打我，我就一于去拍三级片，睇吓你哋敢唔敢！”

曹查理未与圈中人发生感情

曹查理笑指自己从未与圈中人发生过感情︰“咁多年都冇同圈中人发生过，一夜情都冇！我记得第一次拍三级片，对手系一个泰国女生，得番块布遮住，真系睇你够唔够遮啦，我紧张到不得了，要抛开个心理，净系谂住钱，收工去边度使钱！”

因为三级片致富，曹查理亦成为影坛抢手货：“我当时六万蚊一组，日日开工开足几年，试过有一次去到现场，导演觉得𠮶布景唔得，照出粮叫我收工！其实我唔介意人哋点睇，因为最紧要记得我，而且好多女明星都系得远观，但我就可以同佢哋亲近，所以唔抗拒。”

畀面苑仔︰我肯复出

曹查理透露，自己已退休一直拒绝访问，纯粹“畀面”苑仔才出山：“大傻（成奎安）旧时叫我返内地登台，话上去打个招呼就有几万蚊，我都唔睬佢！今次苑仔叫到我先出嚟咋，如果苑仔叫我一齐拍三级片，我肯复出，因为呢部一定系笑片，唔会系爱情动作片。”