【狮子山上】林德信曾烧伤脚入院 难忘爸爸赶至︰有人爱争好远
撰文： 洪晓璇
出版：更新：
林德信（Alex）早前拍摄由梁国斌执导，以“包山王”黎志伟真人真事改编嘅电影《狮子山上》。三人接受香港开电视《娱乐头条E-news Headline》主播马梓轩专访，Alex坦言拍摄过程历尽艰辛：“最痛苦嘅系我哋去到屯门拍一场攀上狮子山嘅戏份，𠮶度5层楼高，我连埋轮椅绑实晒，成晚半天吊，净系头同手郁到，然后要我演最高难度，最多感情嘅戏，我系好忟！因为唔上唔落，又要幻想卫诗雅喺山下，啲风吹埋嚟，石头跌落嚟，真系未试过拍得咁辛苦，拍足3日！”
片中讲述Alex饰演嘅纪大伟，因车祸以致下半身瘫痪，人生顿时陷入低潮，全靠家人扶持重新出发。Alex回忆求学时期，曾深深感受父亲林子祥嘅关爱：“以前我喺英国读书，记得有晚同朋友烧烤，其中有一个朋友饮醉咗，唔小心将烧烤个火踢过嚟，我成只脚著晒火，当时入咗医院，3日后我Daddy就飞咗过嚟！我好记得佢冇闹过我，反而担心我，有个爱你嘅人喺身边，感觉争好远！”
Alex又表示入行以来，从未演过年纪这么大，兼且已为人父嘅角色，Alex笑言现实中亦向往呢种生活模式：“拍呢部戏𠮶阵，我feel到梁导演同黎生呢两位爸爸，好多嘢想我透过纪大伟嘅角色表达出嚟，同埋透过今次拍摄，令我了解多咗咩系家庭，虽然为人父亲辛苦啲，但我谂满足感同快乐系大过冇家庭嘅！”