蔡瀚亿获提名金鹿奖男配　10月拍《狂舞派3》：角色有突破

蔡瀚亿（BabyJohn）过去一年戏接戏忙个不停，2017年已经有6套参演电影上映，真系年头见佢到年尾，早前终于放假去日本游玩，直至近日返港突然收到一份非常惊喜嘅神秘礼物，就系凭《拆弹专家》中黄天诺一角，获得第十四届中国长春电影节“金鹿奖”提名“最佳青年男配角奖”。

今届金鹿奖有15部入围影片，《拆弹专家》系唯一一部入围嘅香港电影，而今届颁奖礼重点系鼓励青年人才，蔡瀚亿能够被提名最佳青年男配角，亦系影展对佢嘅一种肯定和鼓励，蔡瀚亿话：“获得提名，当然觉得开心。多谢长春电影节以及《拆弹专家》幕前幕后所有手足。可惜无法到现场感受气氛，希望日后再有机会，可以亲身到现场，所以依家继续努力，拍好每部作品。”

BabyJohn嚟紧要拍黄修平导演嘅《狂舞派3》，呢部戏亦系佢同导演嘅成名作，黄金组合重现经典，BabyJohn自然十分重视，亦花好多心思筹备做足功课：“套戏10月就开啦，角色上喺剧本嚟睇已经突破咗第一集嘅框框，包括‘柒良’呢个角色，而我哋前几日整个班底都聚咗一次，发觉5年冇再聚，但互相好有默契，令我更期待开工。”蔡瀚亿和黄修平再聚，大家倾剧本之余，亦有男人的浪漫，蔡瀚亿笑说：“我发觉我同导演都有颗少女心，我哋约咗一齐倾剧本，结果我哋两个都点咗士多啤梨酒同埋食住cake咁倾，结果𠮶一晚我哋倾咗六、七个钟，但我哋仲未倾完，相信好快会再倾。”