【栋笃特工】黄子华爆10大制作秘闻 “佘诗曼本来系揾我开剧先”
由黄子华、佘诗曼主演的贺岁片《栋笃特工》，上画4日已大收2,000万，彻彻底底为子华的“票房毒药”封号除名。为隆重其事，昨晚两位便联同一众幕后制作团队齐齐开Live同大家倾偈，期间更无意中爆出大大小小的制作秘闻，样样都过瘾有趣，而家就同大家结集其中10大。
01. 足本长达160分钟
有不少观众看过《栋笃特工》后，都话节奏太快太急，而且全片100分钟又有大量串星间场，有人表示看到吃不消。子华解释其实电影本身拍了接近160分钟，但碍于排片关系，一定要忍痛割爱剪到100分钟内。子华说︰“我都想大家有机会睇到一个常速版，要睇下有冇机会。”在场嘉宾提及当年《少林足球》因为大收，特别推出一个加长版叫大家入戏院睇多次，而家《栋笃特工》都咁好反应，要睇足本其实唔难，只要大家一齐集气，推高票房，等老板唔推个足本都唔得。
02. 原先唔系开戏，系开剧
子华加阿佘，自2009年合作完《绝代商骄》，虽然收视爆升大受欢迎，但一直都未有合作，直至今次《栋笃特工》。但原来拍板话要拍电影前，阿佘原本系想揾子华拍剧的。佘诗曼说︰“因为我仲有20集的剧集约，于是就谂起子华睇下佢有冇兴趣。”殊不知倾谈途中，经身边人的推波助澜，就变成拍电影，世事就系咁奇妙。但话时话，张20集剧集约其实都可以照样揾子华倾落去，大家都好想睇下三水妹同麦提爽（《绝代商骄》角色名）的再度合作。
03. 阿佘角色本来系忍者？
现在大家睇到的剧情，阿佘在戏中是饰演由女警爬升至保安局长的Madam，但原来本身的剧本初稿，系要阿佘饰演一名忍者。虽然在Live中几位爆完呢个惊天秘闻后一味大笑冇再讲落去，但成件事就更添几分悬疑，好想知到底剧本最初系想搞乜。
04. 子华有揾过苏施黄客串
现在戏中连同一众KOL及YouTuber，有多达40位串星贯穿，子华要多谢监制陈颖伦一手包办所有联络，连许冠文、谭咏麟、郑秀文、杨千嬅都俾佢揾到。其实子华都有出过力，经佢出手的有两位，分别系白只同苏施黄，“本来想叫苏施黄做吴君如其中一只麻雀脚，但佢就冇兴趣。”结果邀请两位，最终得白只到场，成功率系50%。
【栋笃特工】与阿佘开Live谢票 黄子华︰开完戒毒会唔再被人睇小【栋笃特工】子华碌爆卡揾贴地串星 龙婆方丽娟Dickson连环爆gag
05. 最憎唱主题曲
电影的主题曲《Final Calling》系由郑欣宜主唱， featuring黄子华的“镫蹬瞪邓 镫蹬瞪邓”，子华称唱得非常过瘾，但原来佢本身系拒绝。子华说︰“当时导演带住几个人来，同我讲话想我唱番主题曲，我未听Demo就大叫︰‘我最憎唱主题曲，又唔系唱得好听。’原来导演背后就系作曲同填词人，好尴尬。”不过当子华听过Demo发现自己只需唱“镫蹬瞪邓 镫蹬瞪邓”时又觉得OK。子华说︰“要赞负责唱Demo位朋友，佢将我最衰衰格的一面扮到出来，令我好有兴趣。”
06. 两公升酒坚一take过饮晒
戏中有幕子华要将一碗约两公升的汤加薄荷酒一饮而尽，镜头所见子华亲身上阵半分钟一饮而尽，事实上现场亦真系一take过搞掂。“导演想我饮有颜色嘅嘢，所以我选择加薄荷酒，因为如果叫道具大哥整一啲有颜色嘅嘢俾我饮，我会仲惊。”
07. 掩嘴讲嘢演出毒男谦虚
有细心的网民睇到子华在戏中扮演毒男时，讲亲对白都特别要掩嘴，问其原因，原来系想表达毒男的一份谦虚。导演说︰“毒男系比较怕丑，同人讲嘢时会好唔自然，所以特别加入呢个小动作。”
【栋笃特工】上映2日票房达1100万 单日入场人次更超越《黑豹》【栋笃特工】黄子华拍片鸣谢28位串星 “多谢大家拯救票房毒药”
08. 导演原来合作过《一蚊鸡保镳》
今次为子华成功脱毒的导演叫张家杰，原来佢同子华都有渊源，早在拍《一蚊鸡保镳》时已担任第二副导，即系今次齐齐脱毒。值得一提，当时做《一蚊鸡保镳》第一副导的叫陆剑青，即系现时香港华语片票房冠军《寒战II》的导演之一。
09. 导演差啲想放弃
《栋笃特工》剧本筹备达两年，过程漫长之余，大家更十五十六未知开唔开得成，虽然大家都已经先出粮，但冇谂过份粮要摊分两年去使。而其中一次开完会后，导演就WhatsApp去大Group同大家讲︰“各位，我嘅工作到此为止，我仲要养家活儿。”真系一字一泪，幸好最后都顺利开得成。
10. 度桥良伴︰腿蛋治
唔好以为电影人度桥就一定系文华酒店café，其实剧组留守最长时间的，是铜锣湾某茶餐厅，而大家赖以维生的就系店中的名物︰招牌腿蛋治。虽然几位讲到好出名咁，但睇番各人表情，都系苦笑多，睇怕都会有一年半载唔想再食腿蛋治。