马国明爱陪老婆煲《On Call》　高海宁考虑尝试追男仔︰要主动啲

由马国明、高海宁主演的贺岁片《麻雀女王追男仔》，是两位第一次担正的香港电影，二人都觉得第一部担正的港片已经是贺岁片，非常开心，既冇票房压力，又有纪念价值。戏中马国明是位潦倒的科学家，一直怀才不遇，偏偏身边就有个高海宁情人眼里，觉得他是最好的。问到现实中，未走红前的马国明，可有这类粉丝支持，殊不知高海宁已抢答︰“佢老婆（汤洛雯）咪系啰！”

打麻雀最讲演技

高海宁演的是“麻雀女王”，但原来两位都是略懂，未去到麻雀精级数，高Ling更因为今次拍摄，学识不少专有名词︰“十八罗汉、海底捞月、七只花一台花，都系今次先知系咩。不过讲到拍麻雀戏，最辛苦是剧组人员，因为每打完一铺牌，都要花个多小时重新排过，要将麻雀排好，到下一幕边位拿边只又要度清度楚，原来唔简单。”

而对高Ling而言，打麻雀戏系好有挑战，特别系表情管理︰“拎完牌要做表情，心底里又有另一副表情，所以打麻雀戏份是极难拍。”咁现实中，演员打麻雀又有冇优势呢？马国明︰“又唔使演员，好多打麻雀好叻嘅人，都系冇乜表情，突然就话食糊！”高海宁︰“我表情管理好差，因为我要慢慢砌牌，当我三只三只放埋一齐时，对家已经知︰‘食得糊㖞！’

两公婆重温旧剧

马国明在戏中是个科学家，专门发明一些不设实际的东西，懂欣赏的不多，就只有高海宁给予支持。问到现实中的知音，高Ling立即抢答︰“佢老婆就系个知音。”马国明也甜丝丝地细道︰“佢会睇番我啲旧剧，仲话自己未入行已经好钟意睇《On Call 36小时》，剧中我细路死一幕，佢睇到喺被窝喊，好感动。而家喺屋企有时间，都会陪佢重温以前啲剧。虽然我就唔系好想睇，因为觉得自己演得好差，但佢又话唔紧要，仲觉得好得意。”

除了《On Call 36小时》，汤洛雯最近仲有追番《铁马寻桥》同《律政新人王2》。“我本身觉得呢套演得唔好，但同太太一齐睇，个感觉又几得意，我又会睇番佢套《一笑渡凡间》，回味一下。”

高Ling都想主动啲

电影叫“追男仔”，高Ling坦言未试过，但见一直未有著落下，自己都谂谂系咪要积极啲。“我都有谂系咪要实践一次追男仔，要主动啲。不过戏中我都唔算好主动，反而拍紧套电视剧，就讲我向马明求婚。”以前觉得女性太主动唔太好，但高Ling就觉得时代不同，观点完全不同。“而家会讲女性如何悍卫自己事业，点样掌握自己人生，要主动追求幸福，不再逆来顺受，愿意为自己勇敢一次。”

来到新年，亲戚见面仲会有不少提问，已婚的马国明必答题当然是几时先生番个？“都系随缘，可以话有plan或者冇plan，而家老婆心力都放在两只猫，有冇小朋友在现阶段都冇特别追求，如果个天送到当然会欣然接受。”至于高海宁，当然最常被问到几时拍拖结婚，去到这些问题，高Ling立即霸气回应︰“我阿爸阿妈都唔问啦，亲戚只会问我有冇首映飞换票证，哈哈……”