香港电影业惨淡一年内9间戏院结业　廖子妤愿减片酬共渡时艰

廖子妤（Fish）今晚（11日）现身尖沙咀出席电影《曾经拥有》首映礼。对于电影8年后面世，Fish接受《香港01》访问时表示：“其实唔系好谂得起自己做过啲乜，因为好多片段都好零碎，但有啲记忆亦系好美好，我手机储存咗拍紧呢套戏嘅回忆，手机不时都会自动阵出呢啲相片，变咗当时成日都会谂呢套电影究竟几时先会上。套戏今日终于上，我睇返发觉自己变咗好多，例如讲嘢嘅咬字冇咁正，同埋声调系比较高，咁所以好希望呢8年自己系有进步。”

提到香港电影市道惨淡，过去一年全香港有9间戏院结业。Fish表示：“其实我又唔会灰心同埋失望，因为有啲嘢知否世事常变，变幻才是永恒。有好多嘢变幻系一定会有，只系我哋喺呢啲变幻之中，记起我哋曾经拥有嘅嘢呢。（今年有冇戏开？）当中系有倾紧，希望能够顺顺利利啦，始终我哋作为电影从业员有工开，先可以维持呢个产业嘅生态，唯有啲老板能够大胆啲，我哋又做好啲，然后就听天由命。（会唔会减片酬？）减片酬？我已经冇乜加过，但共渡时艰就一定会。”