【每逢大事讲故事】飓风丹尼斯直扑白宫 可能系侵侵食过最错嘅女
香港啱啱被个“山竹”捣乱完，美国东岸就有“佛罗伦斯”超级飓风，不过一波未平一波又起。白宫正受一股飓风影响，以时速200公里正面向美国总统侵侵吹袭，呢股飓风叫～～Stormy Daniels!
【▲点击睇片，飞云现真身同你讲故事！】
呢股“飓风”的确人如其名，如果大家有睇开美国动作片嘅，肯定唔会对佢感到陌生，冇错，相中呢位玩波大姐就系大名鼎鼎嘅Stormy Daniels啦。咩话，你话“而我不知道谁是Stormy Daniels？”，都系嘅，01读者咁pure，等本尊简单介绍下佢啦。
芳龄39，三围36-26-36，身材本身够晒煞食，加埋对DD Cup，净系睇相都已经迫爆个镜头啦！
Stormy老窦老母一早就离咗婚，喺差到冇人有嘅社区长大！佢使唔使好似粤语残片咁点住蜡烛穿胶花就冇人知，但起码都挨到高中毕业。Stormy本来谂住做记者，不过老实讲，如果我系受访者，对眼都唔知望边度好。最终佢都冇浪费自己嘅天赋，喺高中时候同朋友睇脱衣舞时，被人摆咗上台客串表演。
Stormy成为舞台生招牌之后，有朋友揾佢拍同性恋爱情动作片，之后仲俾AV公司睇中签约成为合约女优，自此成为美国AV界代表人物之一，仲要“拍而优则导”，赢埋AV界影后同最佳导演，甚至入埋名人堂。不过，唔好以为佢净系拍18禁动作片，正经骚都有佢份！好似客串《40处男戆居居》、为Maroon 5歌曲《Wake Up Call》嘅MV出场，使出拿手功夫跳Pole Dance，嗱，飞云就分明系睇完Maroon 5个MV先识佢嘅!
讲到戏肉喇，2006年7月，已经红遍咸片界嘅Stormy就喺高尔夫球场偶遇侵侵。据女方说法，当时侵侵虽然满场飞，但其实悄悄地同Stormy眉来眼去，之后仲要两个人上咗架高尔夫球车，侵侵话“我想再揾你倾偈”于是咪抄咗牌又约食饭啰。时年27岁嘅Stormy话当时应承咗，“有边个唔想有机会同一个咁interesting嘅人倾偈？我又无谂住要同佢拍拖。”
当然大家心照啦，倾偈只是名目，Stormy话之后佢地持续咗数月嘅婚外情，通常侵侵每隔十日左右就会call佢。有行家仲爆料，话侵侵成日打电话去片场，试过Stormy开着电话speaker，由得侵侵一轮咀自己讲，不过当时无人留意，因为只系一个有钱佬沟姐姐仔啫，NO BIG DEAL!
之后佢两个就无疾而终了。无疾而终？你就想呀侵侵。时间转眼嚟到2018年，有传媒报道指侵侵的私人律师科恩喺2016年总统大选前夕畀咗13万美金Stormy，当成系阻止佢爆大镬嘅“掩口费”。Stormy同CNN讲，话自己本来想在2011年将呢段情史以15000蚊美金卖俾一间杂志社，但事后就比个彪形大汉恐吓，当住佢个囡面前叫佢咪爆料。而杂志社职员就话科恩要胁打官司，结果单买卖做唔成。Stormy话过，叫佢唔爆料，fine，但被人当住个女面前威胁，我就绝对唔忍你，绝对唔会容忍被欺凌！于是决定同侵侵玩到底。
科恩本来话唔关佢事，仲整咗封律师信“大”返Stormy。不过随住通俄门调查烧到埋身，办公室被人搜查过后，曾经公开表明为侵侵挡子弹嘅科恩见势色唔对，就决定“转身射个3分波”，承认喺2016年受侵侵指使向Stormy磅水，避免影响选情，白宫嘅新闻从此好睇过戏。
Stormy之前向传媒披露返同侵侵12年前嘅“战况报告”，但如果你地以为当时佢哋好似动作片一样咁“翻天覆地”充满激情，咁就令各位大失所望啦。因为Stormy话“侵侵得𠮶两分钟货仔，根本不值一提”，仲要话侵侵下面就真系“NO BIG雕”, 最近仲要更仔细咁形容，话似某卡通磨菇。
谂深一层，全地球人都知侵侵处事手法不嬲快手，而且贵人事忙，两分钟收工都符合佢处事作风吖。大拿拿两分钟够佢同金仔进行九次历史性握手喇。下图利申：无咁短架，足本版握足13秒架。
【植入式广告时间】两分钟仲可以做啲咩？
就系睇两次 01国际嘅《一分钟看世界》啰!
查实，侵侵都被唔少女人追究佢性骚扰，话同佢有一腿嘅女人十只手指都数唔晒，佢老婆Melania仲要帮口。反而当初侵侵同Stromy你情我愿，点解搞到一身蚁架？唔只俾AV界女神弹佢床上功夫差，连“细佬”size都要俾人讲，堂堂美国总统俾呢位姐姐仔搞到颜面扫地。
(原来侵侵细嘅唔只系双手㖞～我指佢好细心)
DD级“飓风”丹尼斯嘅威力点解异常惊人？等飞云同你拆解一下：
一． 讲咸，侵侵真系输了。论口出狂言，Stormy一样识，仲去得比你尽。
以往任何女性同已婚政客搞婚外情，都唔会大言不惭讲出口，但Stromy唔单止直认不讳，仲开口邀请侵侵除裤俾佢打箩友。人地问佢点解当年同侵侵上床，佢就话：“我单独上佢间房就系一个坏决定。”呢句说话出自佢呢位脱星口中，都无乜需要质疑了。
我地又一齐睇下Stormy可以有几爆：
“企鹅喺动物园系最臭嘅动物，我摸过企鹅，佢地好似食过最臭嘅X一样。”（X字唔出得街，读者请自行填充）
飞云唔系话乱噏可以当秘笈，但呢句说话就系证明Stromy讲咩都无包袱，做开呢行讲咸嘢又点会觉得羞家？但以侵侵今日嘅身分地位，最多只可以闹人stupid, idiot, bad bad guy，𠮶啲f字呀，p字开头嘅字统统变咗禁语。闹交唔畀讲粗口，咪等于被废武功啰，侵侵只能挨打。
二．唔好得罪自力更生嘅女人，尤其系喺资本主义社会
喺单亲低下家庭长大嘅Stormy，屋企试过N日都冇电，17岁出来跳strip dance，自力更身，成为美国AV界红牌阿姑，佢赚嘅每个崩，咬开都系有血有汗，真正嘅America Dream。Stormy仲话过，自己唔系天使，唔会讲到自己系正义嘅朋友咁，相反佢仲直认系藉今次风波赚钱。“我得两个选择，一系匿埋喺屋企喊，一系就喺柠檬身上榨柠檬汁”。
于是佢近排就搞咗个全国巡回脱衣舞演出，个名仲叫“Make America Horny Again”(Horny点解？飞云话你地咪扮唔识)，就算侵侵系一个再Juicy嘅柠檬，都无办法唔俾佢抽干抽净啦。
Stormy仲话，边个死ｘ蠢会放过咁嘅赚钱机会：“我地活喺一个资本主义社会，如果有人叫你做番同样嘅工作，但人工高四倍，边个会拒绝？”
呢种“我要努力向上”嘅态度同选总统𠮶阵嘅侵侵又几似㖞，唔怪得侵侵都吹佢唔胀。仲有左胶赞Stormy系女权斗士，美国最需要佢呢种不畏强权嘅女英雄，有传媒就形容Stormy直头颠覆咗政坛性丑闻。
侵侵又系傻猪猪来的，又要偷食，又要唔认，又要选总统。你细个阿妈无教你嘢唔可以乱食架咩？濑嘢喇今次!
其实，想爆侵侵婚外情嘅唔止Stormy一个，18禁杂志老行尊《Playboy》的前模特儿麦克道格亦自爆曾经搭上过侵侵，而且时间亦系发生喺Melania生完Barron之后冇几耐，就咁睇唔难令人怀疑侵侵系咪见老婆挂住凑仔，自己寂寞难耐，所以有人送上门就一律无任欢迎？不过麦克道格爱侵侵，对方就当请食饭一样，Show you the Money就无拖无欠，搞到可怜嘅麦克道格做咗真心胶。
但点解要提麦克道格嘅悲惨情史？冇，除咗想畀大家知侵侵唔单止衰过一次以外，科恩亦都同呢件事有关。事关科恩被侵侵当成弃卒之后，就向传媒爆大镬，公开一段佢哋之间对话，内容正正提到侵侵提出用真金白银买断麦克道格段故仔。最重要嘅系，侵侵一直唔知有呢段录音存在，今次科恩完全set个靓助攻俾调查部门，为证明侵侵有无违反竞选财务法有决定性作用。
搞成今日咁，除咗可以赖科恩，都要有个“朱队友”助攻嘅。我指姓朱𠮶个朱利亚尼啊！接替科恩、侵侵私人律师兼纽约市前市长朱利亚尼仲玩“人格谋杀”，话AV女星卖肉唔值得尊重㖞。喂朱老大，我飞云就算读得书少，但起码都知道一句说话叫“职业无分贵贱”，唔通卖肉就冇付出咩？起码Stormy都系手口并用揾食吖。你咁系歧视性工作者，越描越黑。
讲到底，侵侵个白宫宝座暂时未俾呢股飓风吹到连根拔起，Stormy仲话会喺11月美国中期选举前出新书爆大镬。假如侵侵拆弹有咩差池，又或者掘多几个炸弹，就唔止系“Stormy in a teacup”，分分钟好似《时代》杂志个封面咁，变成十级飓风！
最近仲传佢座世界大楼个门僮想爆料，话侵侵搞大咗前管家个肚，而且科恩“咁啱”又系知情。我飞云奉劝侵侵一句：“色字头上一把刀，你都系睇路啦！”呢个时候，我哋不如听吓Maroon 5嘅《Wake Up Call》，重温Stormy嘅演出，同时食咗花生睇吓侵侵系咪好似入面歌词“And it’s not my fault ‘cause you both deserve”啦。
欢迎追踪01国际Twitter帐户 @01WorldNews，或电邮至international@hk01.com提供意见。