【每逢大事讲故事】由小毒毒变方丈 走过男人最痛的埃尔多安
今时今日从政，最棹忌嘅系咩？唔系女人（你睇克林顿），唔系乱嗡当秘笈（你睇特朗普），唔系唔梳头（你睇Boris Johnson），而系两个字，离地！
对政客而言，出身基层重要过出身名校。出嚟行，无住过板间房、无喺碌架床做过功课、无陪阿妈揹过胶花，边有人畀面！喺土耳其，就同样有一名穷小子攀上权力高峰，佢就系而家嘅土国总统埃尔多安。
埃尔多安童年喺伊斯坦布尔既贫民区大，对住著名嘅金角湾，望住山上面嘅有钱精英阶层夜夜笙歌，真系咪话唔羡慕。人穷，自然要谂计，埃尔多安细细个就有打吓工赚吓外快。同波叔唔同，埃尔多安就无话一毫子带白粉，最多都只系卖吓柠檬汁同芝麻包。
呢个少年骨格精奇，穷都穷得与别不同。作为浪漫又梦幻嘅双鱼座，埃尔多安后生果时都曾经系个文艺少年。佢最钟意吟下诗，成日自己一个去码头，企喺空荡荡嘅船上面，望住广阔嘅大海……演讲。喺我哋嘅眼中，虽然佢只系一个对海自high嘅毒L，但喺佢自己眼中，就仿若有亿万听众嘅大演说家，每一个浪花都系少女倾慕嘅目光……呢啲咁违世脱俗嘅嘢，你哋呢啲凡人识条铁咩，杨过嘅黯然销魂掌都系咁练成咋嘛！
所以飞云成日都话，每一个毒L（包括在下）都系潜力股呀。古语有云，莫欺少年毒。就如同大部分有为青年一样，穷小子大个咗读嘅系商科，督信伊斯兰教徒，仲要系足球员，真系文武全才。加上当年对海自学而成嘅一身好武功，成功赢得土耳其人嘅支持。
毕业之后，埃尔多安毅然从政。可能撇须留得靓，民望真系会高啲，埃尔多安自踏足选举，一直系长胜将军。1994年佢就做到伊斯坦布尔市长，当年佢先得40岁。果然系叻仔，做市长果时佢都解决咗唔少民生问题，储咗唔少声望，所以到2001年，埃尔多安成立正义与发展党（AKP），仲要一年之后喺选举赢到开巷，拎到三分二国会议席，成为最大党，03年仲做埋总理。
所谓男人四十一枝花，五十都仲系风华正茂……点知竟然遇上男人一生之中最痛嘅意外！2003年埃尔多安出席典礼，几十岁人仲要骑吓马show off，点知意外堕马，都不特止，只马仲要一脚踩咗落佢两腿之间。
【慎入！以下是男人看了会流泪，女人看了会沉默，震惊13亿人的片段重播……】
畀着一般人，可能从此一蹶不振，但佢系埃尔多安！佢唔单止自己企翻起身，仲要继续典礼发表埋演说：“有呢啲经验，生命先宝贵。首先，我哋系天台跌落街就学识面对现实，今日我哋堕马就学识从另一个角度看人生。你知唔知最重要系咩？就系跌倒咗识企返起身！无论系天台定马背跌落嚟都一样。”吓？飞云连担櫈仔跌落嚟都要报工伤架㖞，又堕楼又堕马，究竟埃尔多安果几年对住个海，系练演讲定葵花宝典？
但Any肥，一个练成神功嘅人真系唔同啲，What doesn’t kill you makes you stronger果然系真理。埃尔多安连任又连任，做左三届总理。正所谓，政治一日都嫌多，好明显系飞云呢啲loser嘅说话，一个咁强顽嘅政客，当然一再创高峰，2014年做埋总统，成为土耳其史上第一个选完总理又选到总统嘅领袖。
4月16日土耳其举行修宪公投，通过后势令总统权力大增，按此看更多： 【土耳其修宪专页】
好多猪猪都迷信，出身基层就会关心基层知悭识俭，但sorry啰，自己钱就话姐，使紧你哋市民大众钱咋嘛，当然多多益善、少少唔拘啦。呢位土国总统真系名符其实嘅“土皇帝”，上任就起咗个新宫殿，斥资3.5亿美元，买到嘅午餐肉随时多到可以起多层楼呀。
个宫殿就巴闭啰，有成千间房不特止，占地有成200万平方呎，即系几大？即系3个凡尔赛宫左右咁大啦，即系食食吓饭去个厕所都要睇地图开GPS咁上下啦。埃尔多安仲要有自己嘅私人实验室同团队，唔系搞咩生化武器，而系同朕check吓啲Kebab有无落毒。主责验毒啲医生仲话：“So far都无咩大镬嘢，但系啲蔬果农药多咗啲，我哋会好好处理。”Oh my god！点可以畀我哋尊贵嘅总统先生食农药架！简直要起个私人水耕菜农场畀佢添呀。
所以啲人话埃尔多安系“新苏丹”都不无道理，当年佢喺新宫殿接见巴勒斯坦自治政府主席阿巴斯，咁贵宾来访梗系要夹道欢迎啦，出奇嘅系夹道欢迎嘅唔系摇红旗嘅大妈，而系着晒土耳其传统盔甲嘅战士！唔好以为埃尔多安钟意玩Cosplay，呢16位战士代表住横跨2000年突厥人骁勇善战的历史。好眼力嘅你，可以睇到公元前200年的匈人帝国，到1920年奥斯曼帝国的士兵服饰演变。
之但系，啲士兵真系同佢两个好唔夹，第一眼仲以为阿巴斯同埃尔多安系Key上去咁。不过阿巴斯真系好冷静，畀着飞云实以为走错戏棚，无咩事我出返去先。
一个经历咗咁多次民主洗礼、由选民一人一票拣出嚟嘅总统，除左洗脚唔抹脚之外，究竟份人系点呢？一言以蔽之，就系方丈。即系咩？当然系指总统大人有如少林寺般强人辈出嘅地方入面嘅精神领袖啦，绝对唔系话佢小器！话说旧年有个德国人写咗首诗笑埃尔多安，呀总统嬲到要越洋入禀告到佢甩裤。嗱呢啲咪做实事啰！唔通仲出律师信咁龟缩？
而家飞云好希望总统大人唔识睇中文，因为话说埃尔多安做咗总统18个月果时，司法部做咗个统计，总共有近2000单案系因为侮辱总统大人而被告，即系平均每日有3单左右，被控嘅有记者、漫画家、学者等等，甚至连细路仔都唔放过：有个12岁同13岁嘅少年，因为撕走埃尔多安嘅海报而被告，阴功猪嘅系，佢地只系想当废纸咁卖咗佢，赚啲零用，上面印嘅系汪明荃定彭于晏对佢哋而言都无分别。又曾经有个男人网上贴左埃尔多安同魔戒角色咕噜嘅相，将佢地两者拍埋一齐比较，就咁被判囚1年。
民主制度都可以选出独裁者，埃尔多安曾经讲过：“民主都好似搭火车——你上车，搭到目的地，就落车。”而家埃尔多安都到咗权力高峰喇，都差唔多时候要落车。周日（16日）土耳其就已经举行咗修宪公投，埃尔多安如愿以偿，唔单止加长连任期限，仲将土耳其由议会制变做总统制，删咗总理个位，无人同佢分薄权力，而且仲要将本来分开嘅三权重新三为一体。任命咩法官呀、部长呀都有埃尔多安份话事，未来没有明确机制可以制衡总统权力，土耳其嘅民主就会再进一步倒退。
对于埃尔多安，相信佢都好想讲一句：
等飞云讲个故事你听，2015年土耳其国会选举，埃尔多安嘅AKP党滑铁卢，失去最大党之位。你以为民主就系愿赌服输，有啲人仲打锣打鼓话系民主嘅胜利，实在系too simple sometimes naive！总统大人一嬲猪，话唔得㖞组唔到联合政府，补选！正所谓神说要补选，就有了补选，果然AKP再赢返，继续做最大党，仲要补返句：“你哋见过个游戏系几黑暗啦，而家你哋终于扭转到个局面喇。”吓，边度扭转咗，睇过？
延伸阅读：电影《领袖》塑造埃尔多安强人形象 总统“造神工程”凑效？
延伸阅读：【01专访】伙伴变敌人 护照变废纸 滞港土耳其人进退两难
赢咗就欢呼，输咗就“唔得！三盘两胜！”仿佛系同紧姨甥仔猜皇帝。况且而家反对埃尔多安嘅人，入狱嘅入狱，流亡嘅流亡，仲边度有人系公投入面say no丫。今次埃尔多安成功透过公投修宪，学谷阿莫话斋，一统天下指日可待啊，科科。