【每逢大事讲故事】全球和应“美国优先” Let's Make HK Second
情人节又杀到，正所谓每逢佳节倍唏嘘，飞云都忍唔住要唱句“那动人时光 今日常回看”。男人可以有几长情？听下Juno横跨十年嘅《念念不忘》三步曲一定Feel得到。虽然平时声大夹无准，又不时对女士们出言不逊，但美国总统侵侵其实都系一个长情嘅人，不过呢位呢幸运的女士并非佢果位靓爆镜嘅第一夫人梅拉尼娅，而系艾美。咁啱得咁桥，侵侵同艾美又系纠缠咗十年。
侵侵咁自恋，钟意自己多过任何一位女伴基本上同实际上都系理所当然。所以生意蚀钱公司破产几多次呢啲湿碎嘢，佢真系Sorry, I don’t care！含住白金锁匙出世嘅佢作为人生胜利组，钱，大把，女人，又系大把，佢最关心系咩？咪就系全世界都知道同认同佢有几叻几有成就啰，因为呢啲嘢，系无论有几多钱都买唔到嘅。
身为超级有钱佬嘅佢，每秒钟闲闲哋几百个上落，时间咁宝贵做乜鬼要走去拍个叫《飞黄腾达》（The Apprentice）嘅真人骚，仲足足拍咗十年咁耐？因为佢觉得个节目可以同所有人宣传自己有几厉害嘛，唔通贪果两亿美金人工咩，对佢嚟讲，身家零头嚟咋呢啲。点解要拍十年咁耐？咪就系一开头讲果位艾美累事啰。
如果为侵侵拍真人骚嘅目的整个Check List，应该会系咁样嘅：
侵侵《飞黄腾达》Check List
为自己宣传，剔
为女儿Ivanka，宣传，剔
顺便为公司宣传，剔
拿超高人工以示真材实料，剔
高收视率以示受欢迎程度，剔
攞艾美奖以示成就，交叉
张清单上面几乎所有嘢佢都做到了，就只差攞奖这一项。如果你心谂：有票房、有顶级片酬、有靓女伴，连业界都认同你，咁仲唔够咩？咁少年你就真系太年轻鸟，唔信你问下里安纳度迪卡比奥，或者华仔、星爷开斋前点谂？作为完美主义者，个靓到爆灯嘅CV上面，就只差攞奖呢瓣漏空咗，就系你系你系你呀艾美！
拍拍拍，系咁拍系咁拍前前后后拍咗14个Season，成十年呀大佬，人生有几多个呀？呢位一向耐性麻麻哋嘅大少爷，竟然拍呢个桥段重复又重复嘅节目十年咁耐，真系火都嚟！无错喇，受够了嘅佢最后喺自己个Twitter开艾美波：
“奥斯卡同艾美奖，边个衰啲、边个狡诈啲？”
以为自己攞硬奖威威，点知等嚟等去都攞唔到，艾美奖仲唔系受到有心人操控？是时候出绝招了，一贯侵大少反台三步曲：Twitter开拖，绝交，劈炮唔捞！世人估佢唔到嘅系，为咗报复，佢竟然走去选总统，好衰唔衰仲要赢埋。唔俾奖我吖嗱？我就走去做总统，日日喺白宫逼你班友睇我表演，日日闹爆你斑左胶媒体同演艺界！
当年拍《飞黄腾达》侵侵一句“You're Fired!”Soundbite街知巷闻，对美国观众口味了如指掌嘅佢，参选时整咗句非常入脑嘅口号“Make America Great Again!”连三岁细路都记得，入脑到无论班左胶传媒点笑佢踩佢都整佢唔死，事实胜于雄辩，叫声总统先生啦。就职典礼当日，全球几百亿观众睇佢表演，佢无令大家失望，再整句更入脑嘅Bite出来，成晚系咁美国第一（意思系事事以美国优先），America First, America First, America First，睇到飞云发开口梦都识噏。
侵侵：“别人笑我太疯癫，我笑他人爱肤坚！”
世人嘅眼光系雪亮嘅，呀艾美系都唔颁奖俾侵侵，激到佢去选总统，实在太过份喇，一向充满正义感嘅荷兰人睇唔过眼，整咗条叫“美国第一，但荷兰可唔可以系第二？”嘅片出嚟，表面上扮衰仔，认美国做蝙蝠侠大佬，自己做二哥罗宾，实际上可能想曲线送侵侵上艾美奖颁奖台，等佢终于可以威返次咁啰。（手机用户按此）
荷兰搞笑节目主持人Arjen Lubach，喺1月侵侵刚宣誓就职之后几日，在节目中播出一段短片，向侵侵介绍点解佢应该拣荷兰做二佬。为咗送侵侵一程（上艾美奖颁奖台姐，咪心邪），条片用咗一把同侵侵把磁性声音似到十足十嘅旁白读稿，内容仲用咗侵侵字典入面老是常出现嘅great、absolutely fantastic、fake同losers等字眼，哗，佢唔讲真系以为系侵侵本人啰～为咗帮侵侵荷兰人真系用心良苦。可能，呢啲就系爱呀哈利。
侵侵被美媒逼害，明眼人都知，荷兰人条片一夜爆红，令全世界齐齐和应拍片帮侵侵兼同佢示好，好似瑞士人条片就话：“我哋好迟先俾女人投票㗎，侵侵应该会钟意呢一点。而且呢度好安全，因为冇墨西哥人嘛”。
飞云心谂：今次仲唔系黄金机会嚟？锄强扶弱呢家嘢飞云都识，等我即刻代表香港同侵侵伸出友谊之手，介绍下呢粒东方之珠，话唔定佢会带挈埋我哋“Make Hong Kong Great Again”呢。趁仲系正月，飞云向侵侵拜个年，祝佢今次嘅“作品”红遍全球，演艺生涯更进一步，早日攞到艾美奖填补CV上那个永不磨灭嘅洞，去片～
“美国第一，但香港可唔可以第二？”请掌声鼓励！啪啪啪！
以下就系瑞士版：（手机用户请按此）
就连一直同美国唔多妥嘅伊朗，都拍片向佢致敬。仲好细心咁教佢分清楚伊朗（Iran）同隔离果个叫伊拉克（Iraq）的国家嘅分别，温提佢用手机打行政指令果时唔好唔小心打错字搞到“打”错隔离，真系巧令人“简栋”巧有爱呀！
以下就系伊朗版：（手机用户请按此）
澳大利亚人认真唔话得，前排总理特恩布尔（Malcolm Turnbull）同侵侵讲电话“被Cut线”，佢哋依然肯拍片撑侵侵，仲话“澳大利亚袋鼠就多，人就无乜，相比之下侵侵个就职典礼真系劲多人啰！”个个都想争做二哥，佢哋唔执输照讲“希望美国第一，澳大利亚第二”，但补多飞：“或者最起码，最尾先炸澳大利亚吖好无？”真系卑微得抵锡㗎jack！
以下就系澳大利亚版：（手机用户请按此）
如果想睇晒咁多个国家，可到以下网址：
http://everysecondcounts.eu/index.html