【每逢大事讲故事】普特会——当小毒毒侵侵　遇上情场骗子普京

芬开简单抺去往事极兰，侵侵普京烛光晚餐～　

飞云唱晒歌今次要讲嘅，当然系侵侵同普京的芬兰之约——赫尔辛基峰会（Helsinki Summit）。点解呢个 Hehe Summit咁浪漫架?  但如果要飞云形容呢段爱，我会形容为“小毒毒侵侵单恋　撞上情场骗子普京”，怎可能不是苦恋？

今次唔系普京同侵侵第一次见面，上年分别喺德国G20峰会同越南APEC峰会有两面之缘。G20，佢两个正式两小时会面，倾正经嘢飞云唔想知，花生位在于当晚各国领袖一齐出席晚宴，侵侵主动走去向普京男神搭讪，仲要无任何翻译人员同顾问跟身。咦，唔通抄牌？

到左11月APEC，侵侵同普京“私会”。侵侵会后同记者讲，自己亲口问过普京有无干预2016年美国大选，“佢话佢无干预，我再问佢，佢话绝对无干预我地（美国）嘅大选。佢无做过人地话佢有做过嘅事。”咩咩咩话？有句歌词好贴切 "Loving eyes can never see~" ，而飞云就no eye see，侵侵信普京无做过就无做过，什么“通俄门”我唔理，你无论做错啲咩，我都一样咁爱你架。

侵侵过去都试过公开表示对普京嘅爱慕之情，赞对方“very smart”，系个好领袖。隔左半年，任性嘅侵侵同男神见面嘅“机会又嚟喇”～　白宫消息人士仲话，侵侵坚持单独同普京会面。讲到单恋飞云大把经验，所以好明白侵侵嘅心情，争取独处机会系追到手的第一步！Oh卖吉真系谂起都兴奋。

不过喺芬兰首次约会就唔系佢地拣嘅，绝对有历史由来。芬兰虽然受沙俄统治108年，但一战喺德国支持下成功独立，1948年签订“苏芬条约”，殿定两国友谊合作关系，芬兰有义务帮助苏联抵抗西方军事入侵，苏联就要承认芬兰民主同资本主义体制。之后，芬兰一方面拒绝加入苏联嘅华沙公约组织（Warsaw Pact），亦无加入欧美阵营嘅北约组织（NATO），要做“中间人”。嗱，你地啲打工仔要学嘢，芬兰咪就系世界仔嘅典范啰，一方面无得罪俄罗斯，保住独立，一方面又得到欧洲的经济利益。

芬兰就成为左东西阵营之间的中立国，等飞云教大家一只外交术语：“芬兰化”（Finlandization）──就系形容表面独立，实际向俄罗斯低头嘅骑墙派。到左冷战时期，1975年美军从越南撤出，冷战局势依然绷紧，美国、苏联以及33个国家嘅领袖齐集赫尔辛基，为解除冷战威胁进行协商，包括无核化、人权问题、解除武装....

冷战结束后，赫尔辛基已经系两次美苏／美俄领袖嘅峰会地点，所以“芬兰之约”对于侵侵同普京嚟讲，可谓顺利成章。我地一齐recap之前两次赫尔辛基峰会：

ROUND 1   1990年9月　　老布什  VS 戈尔巴乔夫

冷战结束，老布什同戈尔巴乔夫会面，当时主要系倾海湾地区威胁，对付伊拉克总统侯赛因。当时苏联濒临瓦解，东欧集团解散，戈尔巴乔夫其实处于弱势。戈尔巴乔夫仲送左份礼物比老布什——一幅卡通画上面，地球先生一齐高举老布什同戈尔巴乔夫嘅手，和平万岁 yay～　收到咁励志嘅礼物，你睇老布什几开心，梗系要学下曼联咁放喺更衣室留念啦。

ROUND 2   1997年3月　　克林顿  VS 叶利钦

叶利钦嘅“下把”程度，同戈尔巴乔夫相比，应该有过之而无不及。苏联瓦解后，俄罗斯经济陷于崩溃，加上俄罗斯对车臣分离派发动战争，叶利钦极需要美国金援，喺克林顿游说下，俄罗斯联邦走亲欧美路线，采用资本主义制度，宣布美俄转变成“战略伙伴关系”。为左钱，唔单只要只眼开只眼闭，任北约东扩到东欧心腹地区，连做小丑都在所不惜，克林顿遇着佢不知几开心。

Any肥，上述一切都系20年前，美俄关系已经完全不同，俄罗斯依家系普京说了算。讲番今次Round 3，1975年嘅赫尔辛基峰会目标好明确，就系为左和平合作，但今时今日..... 大家对于特普会唔知可以expect啲咩啰，你知侵侵有几难捉摸架啦。　

前芬兰驻俄大使Hannu Himanen就话，特普会好似同1975年峰会嘅意念对立咁：“普京就想欧洲安全格局重新洗牌，特朗普就想令成个欧洲大陆地震。”啱呀，欧洲对于今次峰会实在腾腾震，侵侵对普京嘅暧昩态度真系令欧洲盟友极度不安。系㖞，乜侵侵唔记得左自己有个拍左拖好多年嘅“正印”？

我地睇番侵侵呢两个礼拜嘅schedule：北约峰会>>访问英国>>赫尔辛基见普京。北约峰会，侵侵同佢嘅欧洲friend子又出现内閧，为左军费开支咄咄逼人，头号追击目标系德国总理默克尔，话“德国系俄罗斯嘅俘虏”，除左要靠俄罗斯输入能源，啲德国政客离开政治圈后，都系走去帮俄罗斯能源公司打工，德俄关系“不恰当”。

讲到最尾，侵侵都系𠮶句：美国要负担北约咁多军费好唔公平啰，唔该你地班欧洲佬俾多啲，尤其你呀德国人。即使德国已经计划2030年前“加码”，将GDP的2%拨作北约军费开支，但侵侵都系要踩多脚：“佢地听日开始俾都得架。”侵侵系生意人，讲数的确叻，叫欧洲各个成员国一律以GDP的4%作北约军费。喂不过睇番最近数字，美国缴交嘅比率虽然最高，但其实都系3.6%，你要人地爆4，北约梗系Say No啦。

呢场北约峰会简直见证左北约历来最分裂嘅时刻，对于紧接而来嘅“特普会”，美国的欧洲friend子 （aka 9gag网民）都超担心，侵侵同普京关上房门之后，会出现以下呢一幕......

唔系呢张呀，边有咁快呀？我指下面呢张呀。

。

。

。

。

。

。

。

。

。

。

。

一言以蔽之，擦鞋。好多西方分析形容，侵侵一直对普京态度卑躬屈膝，闩埋房门侵侵可能事事妥协，就系欧洲一众“正印”最担心的。事实上，90年代两场美俄领袖峰会，美国占有嘅上风，今日已经烟消云散。“通俄门”事件令侵侵当选总统合法性成疑；喺国际舞台上，普京嘅政治能量，绝对唔会比特朗普低。何况普京系情场老手？嗱，被佢欺骗感情嘅就包括小布什。等飞云讲番比你知，普京掌权以来，同过三位美国总统交手。

先讲克林顿，2000年上任嘅普京邀请克林顿到克里姆林宫会面，比起对住叶利钦笑到痴肺，克林顿对住普京似乎有DD拘谨。佢喺记者面前就话：“叶利钦引领俄罗斯走向自由，总统普京或能使俄罗斯繁荣、强壮，同时守护自由和法治。”不过，克林顿心里其实唔系咁睇，佢同叶利钦有次饮茶就忍唔住笃背脊，话：“Boris，你心里有民主，你肚里有团火，系真正嘅民主派，真正嘅改革者，但普京我就唔敢讲喇。”

克林顿其实无睇错，普京当然同叶利钦完全唔同，普京版本嘅民主，同美国谂嘅唔系好似....

不过小布什唔信邪㖞，佢2001年喺斯洛文尼亚同普京见面，话：“我直视这个人的双眼，我认为他率直可信。”从佢嘅眼睛感受到佢嘅灵魂，仲有好多共同价值观添！普京仲去过小布什得州家乡嘅牧场作客，献出佢嘅第一次（到访外国元首屋企）。呢个驾着Truck去牧场嘅画面，飞云觉得好熟面…

好景不常，呢段感情两年就完结了。小布什退出《反弹道导弹条约》，加上对伊拉克开战，美国喺中东、中亚地区嘅活动，令普京相当不满。2005年，普京再同小布什见面时，从前的深情对望，已变成了冷眼相待。小布什提到俄罗斯新闻自由问题，普京就话：“你无资格同我讲新闻自由。”

去到奥巴马时期，虽然首届任期时，俄罗斯总统系梅德韦杰夫，但都知真正话事嘅系暂时退居总理嘅普京。奥巴马上任后半年，第一次喺莫斯科见普京，就赞对方“为俄罗斯人民作出非凡贡献。”不过往后几年大家有眼睇，由中东阿拉伯之春、叙利亚内战、克里米亚脱乌入俄、乌克兰东部危机，有边单系奥巴马有普京符？

小布什同奥巴马对普京，开初都系用友善模式，但到最后结论始终如一：无可能同俄罗斯成为真正伙伴。

等飞云教精侵侵啦，一段关系不平等嘅恋爱，注定唔走得多远，普京爱嘅只有佢自己，唔好再痴心错付了。最后，等飞云点首华仔金曲比侵侵听先。