女生坐地铁拒让座　躁底婆婆拎车仔大力撞脚再拍手机：畀个位嚟坐

拒让座就要郁手郁脚？有女生在网上大呻，日前上班搭地铁时坐得近门口位置，有推买𩠌车仔的婆婆上车时，拍她的手机要求让座，“你都系喺度揿机啫，畀个位嚟坐”，她拒绝后婆婆大吵大骂，直至有阿姨“顶唔顺”让位，婆婆仍不住口，下车时还两度用车“超大力撞我对脚”，然后快速离去。女生大呻如果婆婆态度好点，她一定会让，不少网民认为婆婆举动已算袭击，认为应报警，更有网民遇过类似事件，指现时车厢内人一多就不敢坐下。

楼主在Dcard讨论区以“搭地铁老冯要人让位？”为题发文，指7月19日早上坐地铁上班时，她头站上车坐在近车门位置，过了2、3个站，有婆婆推住买𩠌车仔上车，当时车厢有约八成满，仍有空位。

正当楼主一边用手机回复公司群组讯息、一边开住手机游戏“挂机”和听歌时，“个阿婆无啦啦拍我部电话，然后大声话：‘喂，你都系喺度揿机啫，畀个位嚟坐！’成程一句唔该都冇仲要拍到我部电话”。楼主忍气吞声，告诉婆婆如有需要可能礼貌一点去问坐在关爱座的乘客。

未料婆婆开始在车厢内大吵大闹，“有个姨姨顶唔顺，让咗中间位畀个躁底阿婆，个阿婆坐底之后继续大声嘈...”。再过一个站后，婆婆站起身“拎架车超大力撞我对脚”，楼主擡头怒目而视，婆婆眼神闪缩，突然又大力撞她的脚一次，“我大声叫好啦喂，个阿婆就加快速度急急引咁走咗”。

楼主大叹，坐地铁如果对方有礼貌询问，正常都会让座，“就算唔系坐紧批斗座都预咗会让位畀有需要嘅人，如果佢一开始礼貌咁叫我或者拍我膊头而唔系大力拍我电话，‘唔好意思我有啲攰可唔可以畀我坐？’，我一定让位”。她批评对方“老冯咁嘅态度”配合极差的语气，只会令人拒绝让座。

网民直言婆婆行为或构成袭击，“咁冇礼貌畀我都唔让，打人就报警”，但楼主认为就算报案，到最后都只会被劝和解。有留言指让座应该你情我愿，“逼人让位真系好鬼样衰”，是道德绑架，“而家有啲人就系钟意滥用社会嘅善良嚟行使佢哋嘅‘特权’，只能话楼主真系唔好彩，遇到啲咁嘅人，大声嘈都算，仲要肢体碰撞”。

有网民遇过类似情况，“惊咗佢哋，从此每次到站见人多／有望落老少少嘅人入嚟我就即刻起身行埋一边，费事坐都坐得唔安落，除非真系攰就会扮瞓，人多就开始唔敢睇手机”。其中，最令人反感的是车厢内明明有空位，但部份长者仍“专恰我哋，𠮶次明明对面有位，佢系咁啤住我要我让畀佢，我已经系咁指住𠮶个位…”。

（综合）