【DSE免费考】考生千字文诉心声：对“玩残我哋”网民言论感压力

新出炉财政预算案，提出为参加2019年香港中学文凭考试（DSE）的考生代缴考试费，引起网民热烈讨论。免费当前，不少网民戏言要入场“搞事”，又有人希望考多次为自己“平反”！
网民热烈商讨是否报考DSE，另一边厢当届DSE日校生，面对突如其来的“喜讯”却坦言无法消化，对于“全民DSE”热潮更是心情紧张。有考生在facebook专页“名校 Secrets”投稿，以千字文分享心声，盼各位市民高台贵手。

该名2019年DSE考生在帖文坦言，政府的一个“恩赐”，令不少身边人绝望，“觉得自己短暂人生中最重要的命运”被改写，而一班“口出狂言”、声称要“玩残我哋”的网民是一众考生的压力来源。

考生亦引用韩国电影《与神同行》，表示各人要为自己言论负责，“网上嘅一言一语，其实对每一个人都有影响，我谂宜家系时候要停啦”。

免文凭试考试费的消息一出，引起极大争议，财政司司长陈茂波昨早（1日）出席电台节目时称问题不大，但下午出席立法会财委会时则改口风，被问到措施可否只限日校考生，改称会再作研究。

以下为facebook专页“名校 Secrets”的“2019DSE”考生心声全文，内容经《香港01》编辑加入标点及修改广东话用字。

===================

【2019DSE】冇错，又系我呢个所谓学霸，又系我呢个五万人入面嘅2019DSE考生，亦即系网上好多人扬言，要我哋入唔到大学嘅零零后。

㖊日唔少群组、IG上都出晒2019DSE唔使钱嘅消息，同好多考生一样，先系开心，觉得财政预算案终于关我事；之后系担忧，担忧咩？相信好多人都明，我哋要面临更加大嘅考生竞争！

网上唔少言论，扬言要“玩残”我哋呢班佢哋口中嘅废青，话唔使钱不如大学生、出嚟做嘢嘅人，入去考翻一次。

今日返到学校，最轰动依旧系呢一个“喜讯”。2019DSE唔使钱，系天跌落嚟嘅礼物，定系个天跌咗落嚟？成为我哋全班同班主任嘅讨论话题。即使我哋几唔想承认DSE系要同自修生一齐考口试、要同自修生一齐争JUPAS，我哋都要向命运低头。

身边越嚟越多人绝望，觉得自己短暂人生中最重要嘅命运决定，因为政府一个“恩赐”而改写。

同学们怕，怕考中文口试隔离，坐住补习名师、坐住位准备讲英文嘅考生；怕考writing比个marker觉得自己文笔比唔上日日作文嘅专栏作家、英文水平高过自己嘅大学生（不喜勿插）。

虽然系“水平参照”，但对我哋嚟讲，佢只系一个一试定生死嘅游戏，我哋其实唔系怪政府“变相派钱”去帮助穷苦学生，我哋嘅压力，其实系源自一班“口出狂言”嘅人，一班声称要“玩残我哋”嘅网民。

无错，言论自由系相对嘅道理，但系言论自由总有一个底线，作为一个受而家社会最大压力嘅2019DSE考生，我哋好怕自己未来真系断送喺呢一班“玩嘢”嘅“考生”身上。即使香港人系如此善忘、即使唔系所有人都真系会去行动考DSE，但系呢一日网上嘅言论，话我哋不断闹其他自修生，话我嘅唔想再相信DSE既游戏，其实令我哋千夫所指，呢一小部分2019DSE嘅考生 其实同样活喺DSE嘅压力之下，网上嘅言论，其实只系徒添我哋嘅压力。

唔知各位有冇睇《与神同行》？《与神同行》带出过一点：我哋要为自己嘅言论负责。喺网上嘅一言一语，其实对每一个人都有影响，我谂，而家，系时候要停啦！

“2019DSE免费”已经成咗定局，我哋呢班学生亦都要继续面对下一年更大嘅挑战。的确，作为一个中产，DSE免费对我影响唔系话非常大，算系减轻屋企人嘅负担，但系有一班学生，面对紧解决唔到三餐嘅问题。呢一个的确系一份天赐嘅礼物，但系，我哋收到呢一份礼物嘅同时，又系咪要受到社会上嘅千夫所指？又系咪要因为满足社会上嘅声音而需要赌上自己一生嘅前途呢？

2019 DSE fighters 共勉之