GTA 6 大量试玩体验及细节曝光｜开放世界活动更自由可call车打劫
全球引颈以待的超大作游戏《Grand Theft Auto VI》侠盗猎车手VI GTA 6 已定于2025年第3／4季左右发售，最近在 Reddit 社群上，有几位自称《GTA6》前工作人员出长文爆料，当中提及了《GTA 6》大量游戏细节与系统情报，虽然未知真伪但睇完都会好期待尽快玩《GTA 6》！
做车手｜驾驶玩法相关改良
揸车手感就好似《GTA4》同《GTA5》夹埋咁，唔再似之前𠮶啲咁“飘”，但又未至于100%拟真。你踩落条路，真系感觉到架车有重量，尤其系你急转弯𠮶阵，个重心会明显甩出去。如果行泥地或者落雨㖞，条路滑到你想喊，操控直接变难咗几个档次。
而家架车可以改装得超细致，好似你升级悬吊之后，揸落去个手感即刻唔同晒。官方话呢只改装系统系史上最强，调咩都实有分别，唔系攞嚟呃你嘅。
想抢豪车唔再系咁易。啲高级车有防盗系统，要攞专业工具慢慢破解，或者手动撬线先偷到。而家仲有啲“追踪干扰器”，可以搞乱警车 GPS，帮你甩身。
新增咗油量同耐久度机制，唔加油唔维修？好啦，你架车会慢慢跪低，最后直接抛锚等人拖车。仲有，街头飙车、低底盘车聚都完整重现，甚至连《圣安地列斯》𠮶啲车仔弹跳比赛都返晒嚟，怀旧玩家一定睇到喊。
通街撩事斗非｜NPC互动系统
而家你打 NPC，佢哋会惨叫、求你放过佢，甚至闹返你，对白多到你根本唔会闷。唔似以前咁冷冰冰，一打就走，特别系偏远地方你搞事，𠮶种罪恶感真系会浸住你。更疯狂系连尸体物理效果都升级咗，死法更写实。
主角呢，佢唔系以前𠮶啲“超人模式”。而家中枪后有真实伤害，例如比人射中对脚，跑步即刻慢晒；如果只手中枪，揸车都会甩甩哋。你要用医疗包或者急救物资先搞得掂，唔系以前𠮶啲食包薯片就回血咁简单。
仲有，跌亲、车祸、长期伤残，呢啲都会有累积影响。装备系统又更加现实，背包大细同战术外套会限制你带几多嘢，唔再可以随身攞埋成个军火库，出任务之前要谂清楚点装备。
剧情有深度｜风格基调更成熟
剧情开头就玩慢热，唔系以往𠮶啲开场大爆炸𠮶种喇。跟住你会慢慢睇住主角个世界崩坏，整体基调贴近《GTA4》，玩得更加现实、沉重，带住啲个人情感。有爆料者话，《GTA6》系“Rockstar最劲之作”，甚至连佢哋自己都未必再超越到。
小心CCTV监控｜警察能力亦大升
而家警察 AI 都劲晒，会做酒测、毒品检测。如果你揸车摇摇哋或者危险驾驶，就会俾人强制截停。如果俾警察截车，你咪以为谂住将啲违禁品藏喺手套箱或者座位底就过骨。警察会睇你嘅行为，例如眼神闪缩、动作快慢，先决定搜唔搜你架车，唔系以前𠮶啲一按掣就完事。另外连无人监控摄影机都进化咗，识得人脸辨识。如果你有案底，去到某啲地区，警察巡逻会特别密。连啲店舖都可能因为你有通缉状态而唔卖嘢俾你。
杀人系统而家玩得更硬核，尸体可以藏喺后车尾、垃圾桶，甚至挖个坑埋咗。如果你藏得好，初期可以避过追查，但如果失踪人口报案，警察会展开深入调查。低调啲犯案，甚至可以扮连环杀手。
各式活动丰富过人中之龙
《GTA》同《人中之龙》系列一样系mini game好玩到你冇心机打主线，今集活动一样多到你玩唔晒：高尔夫、保龄球回归，仲新增乒乓球、网球、骰子赌博，喺大赌场或者街边细赌坊玩老虎机、扑克乜都有。
城市仲有海滩派对、生日派对、音乐节，啲 NPC 喺周末晚嘅行为会完全唔同，街头满晒醉仔同狂欢人群。健身房系统返晒嚟，可以练力量、耐力、射击、驾驶、飞行，练得多，实战就真系会劲啲。
狩猎同钓鱼系统都升级咗，鱼竿、鱼饵、水底鱼枪乜都有，猎物同渔获可以卖俾合法买家或者黑市。世界经济系统正式起飞，抢民宅、偷嘢可以换钱，但唔系即刻攞现金，要去当铺或者黑市交易。
仲有“叫车平台”系统，好似 Uber 咁，可以接送乘客，出租车同巴士任务都更加写实化。呢只《GTA6》，真系俾人感觉就系“挨打都要买”，玩完你真系会话值回票价！