HG突击自由高达极海量囤货打击炒卖｜炒家发文爆SEED怒吼：公平咩

HG突击自由高达极海量囤货打击炒卖、炒家发文爆SEED怒吼：公平咩｜SEED FREEDOM 高达 HG 1/144 突击自由高达极重头作5月25日上市，日本炒家大手扫货后，BANDAI竟忽然派发了海量货落日本市面，有炒户似乎因此赔本损手，竟在讨论区上发文投诉BANDAI“反对增产”、歪理连篇。

妄想一盒“HG极突”赚3000日圆

原来BANDAI早就预计HG突击自由高达极需求甚大，誓必被炒家扫货；在6个月前已经开始安排厂房24小时增产，睇准第一批货被炒家抢购后，忽然将囤货多月的海量模型一次过推出市面，连便利店都有货，旨在人人买到、打击模型炒卖。

炒高达无罪！万字奇文反对BANDAI增产

资本主义社会自由市场、炒卖转售不犯法，但价钱当然亦有升有跌，炒家平时牙刷刷，点知BANDAI一招囤货就被打残，有炒家在Yahoo 知识写了万字奇文表达不满，当中的理论有多扭曲？马上睇睇！

（以下为日文原文截图，再下面有广东话翻译版)

【反对增产突击自由高达极，有必要连便利店都卖模型咩？】

呢件事搞到我哋呢班转卖屋（炒家）研修会要开紧急会议😡
集会啱啱先完，好多人心中一肚火，好想问候人伯母😡

我哋成班炒家本来倾好晒，2970日元入货，再用6800日元卖出，每卖1盒可以赚3000日圆，有成20几人入咗好多货。点知你转头就嚟增产，真系有必要连便利店都卖模型咩？（今次万代在日本安排到连Fami mart、Lawson都有货）我哋仲有好多行家住得好远，花高昂交通费去台场Gundam Base入货，你咁样增产搞到我哋全部货蟹晒！公平咩！

BANDAI应该感激炒家、唔系封杀

如果唔系我哋炒家推高Gunpla（高达模型）嘅价值，人人都抢被受瞩目，点会有今时今日嘅人气？我哋转售商一直相信自己有份为呢个人气产业作出贡献、倍感自豪，点解而家会落得如此下场？

真相其实系畀蛇头揾笨

明明研修会（研修会其实即是一班炒家蛇头、收学费教人炒高达，再带班学生去台场扫货，再同佢哋收购批模型，详情可以睇另一篇文：高达模型炒卖特训班学生炒MGSD怨嫌得少｜网民：美化炒卖仲唔知足）同我哋讲，如果努力转卖高达模型，一年赚1000万日圆唔系冇可能，点知连续几只飞升自由、不朽正义全部都蟹晒，通街都系货，GW（日本黄金周）根本一只都卖唔去，通通都系揾笨。我仲开始觉得，个班所谓靠炒高达年收八入2000万嘅王牌炒家，睇真啲部车又旧又烂，仲有人见到佢哋半夜去吉野家兼职，根本系吹大咗。

炒卖提升高达形象、增进爸爸与子女沟通

想买高达模型？落便利店都有啦！而家Gunpla已经变成咁cheap嘅嘢，班细路仲点会对佢感兴趣？再咁落去Gundam食得屎啦！一定要做到人人都想买，但买极都买唔到，物以稀为贵，咁样商品先至会有魅力㗎。

我哋炒家就系想令到细路买唔起，大人先买得起，咁样爸爸就可以增进同子女嘅沟通，根本系用心良苦，我哋都系为咗细路嘅笑容，先忍痛高价转售高达啊！

唔少转售商本来都有正职，但喺公司过得唔如意，仲畀权力压迫、无办法再打工，先至会去做转售。我哋面对人生逆流，勇敢咁转型，想逆转乾坤改变命运，点解万代连呢啲小小嘅投资机会都要阻头阻势？

高达变晒蟹、冇得退订炒家点生存？

零售商搞多新条款去阻我哋退货，订咗未到嘅想cut单，点知连订金都拎唔返。你班网店同零售铺，点解可以对客人嘅损失摆出一副事不关己嘅嘴脸？

以前炒到冇货，我哋炒家都会退钱畀客人啦，而家到我哋囤货，又有边个可怜我哋？仲有呀，唔好讲拎黎炒，正常买家睇见一街都系货，唔觉得抢到劲嘢嘅成功感打咗折扣咩？

作为Gundam粉丝，希望各位发表意见。

揾食啫？我想㗎？

讲多句：虽然被人误解，你为咗人人有高达玩就增产，但点解要无视将高达当作投资，从而获利嘅人，咁样做生意既咩？真正高达fans之前都出钱出力，不惜一切去抢；而家变到唔使任何努力就买得到，你点对得住一直以嚟付出极大代价入货嘅高达真粉？

你班网民成日觉得炒家自由自在、唔使返工、唔使交税，冇错当中可能真系有人年收达到2000万日圆，明你哋好嫉妒，但更多人其实只系靠转售吊住条命咋！

各位高达fans，连出高价买模型、帮助生活穷苦炒家嘅慈悲心都冇？

就系因为咁，所以日本先会出现少子化啊！

总结，其实记者觉得呢篇系曲线抽水潮文，但因为实在太搞笑，所以先以港式口语文法翻译，当中一些用词或跟日本原文有出入，但只系想大家都有得笑。