【人访】黄淑仪入厨60年转型做网红　初拍食谱书美食竟无人问津？

大家都认识黄淑仪（Gigi姐），观众对她的印象，除了是一个演员，近年更深刻的可能是煮𩠌一流的烹饪节目主持。近日她非常活跃，做电视节目、书展例牌出食谱，甚至进军YouTube界！言谈间她讲到自己第一次拍食谱书时，无人愿试其手势；另外又提到自己因操劳过度，身体响起了警号，即管听听Gigi姐自己亲自解画。
摄影：黄宝莹
场地提供：V-ZUG Hong Kong

身边不少朋友，因为结婚才不得不开始学煮𩠌，但原来受家庭环境影响，Gigi姐早在8、9岁已经在厨房揸起镬铲，当时的偷师对象她还记得清清楚楚，正是隔篱屋的梁师奶，“跟我隔篱邻舍去买𩠌，返去睇佢点煮，我就点煮。”

不过原来照办煮碗不一定成功，厨房里的技巧更讲求实战经验之谈，Gigi姐也是反复从失败中学习，“譬如话煎条鱼，系用个镬、系落一片姜呀，但系原来个镬红咗先至落油，油热咗先至摆鱼落去，要用慢火嚟慢慢煎。𠮶时我唔识，攞个镬，掉片姜落去，落咗油就摆条鱼，个镬一路热，一反转条鱼就变咗甩皮甩骨黐住晒。后尾我成功煎咗一条红衫鱼，我爹哋食完之后当场奖咗个5毫子畀我，𠮶时好开心，原来成功煮到一味𩠌，屋企人欣赏，系咁有成功感！”大概就是这条红衫鱼，令Gigi姐从此成为了一家之“煮”。

以谭国梅为入厨启蒙老师

自此之后，Gigi姐想学更多，每逢吃到好食的饭菜，都会问人如何烹煮，有何窍门，但这么多年来，她就只跟过一位烹饪老师而已，甚至只上了几堂课。许多人想到早年的烹饪节目主持，都立即浮起方太（方任利莎）或李太（李曾超群）的面孔，不过Gigi姐就表示，自己的恩师谭国梅才是初代的烹饪节目主持，“睇完个节目我去报读佢个班，读咗大概1期都唔够，就听讲佢身体唔舒服，后尾都走咗，但系佢畀到好多烹饪嘅启蒙我。”谭国梅离世后，Gigi姐也没再跟过任何老师学做菜，只是四围向其他大厨请教，互相分享心得。

Gigi姐入行是参加丽的电视第二期艺员训练班，一心只想拍戏，教人煮𩠌根本是她从未想过的目标。至于后来为何有《吾汤吾水》的出现，原来就是一位电台DJ穿针引线，试过Gigi姐的手势，搭上搭将她引荐给出版社。你以为出食谱书后她才开始慢慢写食谱吗？非也，根本Gigi姐早已有过百存货，随时为朋友服务，“我喺温哥华有个叫《Gigi天地》嘅节目，我又钟意煮嘢，整亲就会记低点样煮法、咩分量，朋友一嚟我屋企食嘢就会话：‘哎呀！好食呀，点样煮㗎？’我就即刻攞张纸去影印，次次请客都要影印一大叠Recipe畀朋友攞走嘅！”

首次食谱书拍摄后　无人愿试其手势

Gigi姐推出第一本食谱书《吾淑吾煮‧入厨最乐》，已是十几年前的事，出书当然要有摄影团队，拍摄煮𩠌的步骤和成品相，Gigi姐非常快手，一日通常可以拍摄8个𩠌，全部现成即做。相信平时睇电视时，家庭观众们见到嘉宾食到舔舔脷，都希望能一尝Gigi姐的手势，她却忆述，自己第一次拍食谱书时，团队竟然宁愿叫外卖，都不欲吃她做的菜，“我就问：‘死啦，你哋唔食㗎？’佢哋好婉转话我听，因为影过，所以唔食。”

行外人未必清楚，但记者就绝对经历过，有时去餐厅采访，食物未完全炸好就会拿出来拍摄，因为颜色太深会影响卖相；又或是有时候食品不够深色，可能会加些老抽来“整色整水”，这些都是行内公开的秘密。Gigi却强调：“我整𠮶啲，冚唪唥唔使加，就咁原汁原味，真系全部煮晒出嚟就食得！我当时谂，咁样好嘥啫，我同你煮好晒，你叫白饭已经得啦，点解要叫叉烧饭、排骨饭？我啲嘢就摆晒喺度冇人食，我好𤷪，第二日开始我叫佢哋少部分留嚟影相，大部分留返畀我哋自己食。后尾佢哋试咗，食完就放心，同埋认为真系可以食得入口。”

出食谱后　更谦卑鞭策自己

出完书之后，更多人见识到Gigi姐的厨艺，知道她原来真是“有料到”，想必愈多愈多人会向她请教吧？她谦虚地说：“唔系唔系，可能因为人哋对自己有期望，出咗书会更加鞭策自己，要更加学多啲，如果唔系，人哋问起你先发现你原来唔识嘅，同人讲：‘哎呀，我唔识㗎……’好似好对唔住人啰，懒系出书咁，点知原来都唔识。”

数数手指，Gigi姐入厨资历已超过60年，今年她再趁书展推出食谱书《黄淑仪给入厨新手的菜式》，一看到这书名，确是令入厨新手如我等双眼发光，没想过原来她却不喜欢这个书名，“佢之前话《Gigi新煮意》，我觉得几好吖，但系到Send畀我睇嘅封面就唔同咗。其实我本本书都系入厨新手啱用，唔一定系依本，除咗《吾汤情浓》同《吾汤情浓2》，我每本书都冇主题。”因为Gigi姐只要搜罗到或者试到任何新菜式，都会放到下一半食谱书，每本都必有头盘、主菜、汤水、甜品，基本上读者宴客时，每个类别“执药”般执一、两款，就已经可以招呼朋友。

请按下图睇Gigi姐新书《黄淑仪给入厨新手的菜式》的几款菜式！

正式进军YouTube界　节目自己主导

出身电视台的Gigi姐，跟无线完约后，近日跟ViuTV合作，率领两位来自组合Error的新人保锜（吴保锜）与肥仔（梁业）拍摄《Cooking Gigi》，同时间她亦创立了自己的YouTube频道“Gigi 煮嘢/Gigi's Pot Of Love”，与网民分享自己处理食材的技巧，并用该食材煮𩠌。问到这个构思是自己想做还是身边人建议，Gigi姐表示：“有些少系屋企人鼓励，因为我先生话见到我𠮶个柠檬鸡翼喺网上有过百万点击，但有时电视节目里面，个导演会剪走啲需要嘅嘢，如果系咁我不如自己拍，Detailed啲、详细啲仲好。我试过喺屋企揾我个女、女婿同我拍，我准备好晒啲嘢，拍亲都1 Take过！”Gigi姐讲过拍摄烹饪节目时喜欢自己做主导，从头到尾一脚踢，做自己的频道可以保留所有她觉得重要的片段，亦较为仔细，小试牛刀后听从朋友意见，再跟助手商量后，就在个几星期前推出了第一条片！

膝头有旧患　10月做手术

虽然外表看来不像，但其实Gigi姐将在年底步入70之龄，可是她却仍然非常活跃，工作量不断，实在不禁问句：“你唔攰㗎咩？”Gigi姐笑一笑说：“攰，但系你问我助手都知，我三、五日又煲下汤，整下蛋糕或者煮嘢，我停唔到落嚟㗎，真系辛苦劳碌命！”朋友每次约食饭，Gigi姐都主动提议到自己家吃，一来她的确享受入厨，二来跟圈内人谈天说地时，在自己家里私隐度始终较高，大家自然较放松。

言谈间，Gigi姐跟记者分享了一个秘密，就是她膝头的伤患情况，原来她4、5年前膝盖开始出问题，半月板撕裂，即使做了微创手术把碎骨抽出后，Gigi姐却因忙于工作，没有好好做物理治疗而使得情况恶化，认真点留意就会发觉她步姿有点不自然，“我尽量都唔想畀人睇到，我份人呢，一系就唔好做，一做我就要好投入去做，所以由朝做到晚，唔记得饮水，又唔记得去洗手间，夜晚一收工去到旅馆，哗……好似得返半条人命，所以你可以话我唔识锡身。”有时拍剧要在楼梯上上落落，行得耐企得耐又会痛，令膝头负荷愈来愈重，Gigi姐就透露说：“依家真系太辛苦，所以我已经决定咗10月17日要开刀做手术，正式成个膝头哥换，希望做完好啲啦！”

在此也希望Gigi姐保重身体，沉醉工作之余也不要操劳过度。