【每逢大事讲故事】点解一个俄罗斯伯伯　可以搞到华府一镬泡？

近排特朗普新班子因为一个人，搞到好鬼死头痕。哎～侵侵平日得罪人多，难得咁辛苦先掹掹紧凑齐人，点知呢条友搞一搞，一个已经人头落地，另一个几乎堕马，连侵侵自己都被俾人烦到呕，成个内阁团队乱过乱世佳人。到底系何方高人咁劲揪？
点样睇，呢位肥伯伯都系安西教练失散多年兄弟，唔好以为少副眼镜同剃咗须就呃到我！

登登登凳！无错，就系佢。唔系妖娆嘅俄罗斯金丝猫，亦唔系英明神武嘅KGB，果位侵侵团队差唔多人人都见过嘅俄罗斯大使，就佢呢位叫基斯利亚克嘅阿伯。Sor，基咩咩咩话？Sergey Kislyak，谢尔盖．基斯利亚克，一个普通而且典型难记嘅俄罗斯人名，听完100次都未必记到入脑果只。
 
美国政坛同传媒一提起呢个人，即刻起晒摃如临大敌咁，一时话佢系特务，一时仲话佢在美国招兵买马，控制俄罗斯喺美国嘅特务组织添。不过呢位其貌不扬嘅肥伯伯，个样咁鬼慈祥敦厚，成个安西教练咁款，点都联想唔到“坏人”呢两个字。虽然特务系无样睇嘅，但呢个阿伯真系一啲都唔似系特务或者情报人员啰，佢至多咪系星爷套零零漆或者零零发入面啲搞笑角色！

不过呢个阿伯最厉害嘅地方，系好似有本“死亡笔记”在手咁，边个一同佢扯上关系，立即被佢害到鸡毛鸭血。唔系净系指“侵班子”班蛋散，就连民主当党嘅议员都系咁，今年已经76岁、德高望重嘅众议院少数党领袖佩洛西（Nancy Pelosi）都中招呀阴功～
 
飞云“系咁意”查一下，已经发现：

最搞笑嘅系，个个见完肥伯伯，全部“宫雪花”上身，乜都唔记得晒，无一个认同佢有接触。好彩“有图有真相”，一个二个被发现擘大眼讲大话，见过肥伯伯而无乜事嘅，暂时只有侵侵个靓仔女婿兼白宫高级顾问库什纳咋。
 
究竟呢个肥伯伯咩来头，个个都见过佢咁威水呢？今年66岁嘅佢，32年前已经在驻华盛顿大使馆工作4年，当时仲系苏联年代。苏联解体后，佢做咗俄罗斯第一位北约代表，1998到2003年转做驻比利时大使，然后升职返咗莫斯科做副外长，直到2008年被委任为驻美国大使，时隔20年又回到华盛顿。睇完成份CV，总之佢就系一个好资深嘅俄罗斯外交官。
 
你心谂：“𪠳，讲咗咪等于无讲！”

咪咁心急住先，好戏在后头。唔好睇肥伯伯个样咁慈祥就以为佢无料到，佢母校系莫斯科工程物理学院，出产过好几位诺贝尔物理学奖得主，呢间大学近年改咗名，叫做“国立核能研究大学”。飞云谂嚟谂去都谂唔明，作为堂堂一个理科尖子，点解卅年前有物理科学家咁好路数唔做，要千里迢迢走去万几公里外嘅华盛顿帮美国人耷印仔批签证。仲唔系有阴谋？？？

希拉里旧年竞选期间，民主党总部电脑被黑客入侵，之后爆出嘅“电邮门”丑闻对选情有一定影响，民主党将矛头指向俄罗斯黑客组织。到“侵班子”越来越多人被发现同肥伯伯有接触，“俄罗斯操控美国大选”嘅剧本已经写好喇。

过去呢9年入面，肥伯伯利用大使身分，疯狂接触华府精英。话见就见，乜班精英咁易埋手㗎咩？试幻想一下，如何你系华府精英成个礼拜做到只狗咁，到星期五下昼有人同你讲，“喂有个P你去唔去？有最顶级Volka、鱼子酱、金发靓女”，或者“有个由名厨主理嘅俄罗斯Fusion菜饭局，我、阿边个、边个同阿边个都去”，地点？白宫隔几座建筑物一栋三层高古典建筑物。你唔系唔去吖，咪玩啦。
 
就系咁，肥伯伯9年来见尽华府精英，共和党的、民主党的、政府各个部门的，全部通杀！肥伯伯虽然周旋于众多美国政客之间，但佢行事向来低调，可能再加上佢毫无威胁性嘅外表，一直相安无事。直到侵班子接连出事，美国人先惊觉呢位仁兄相当有可疑。
 
都唔知真系黄咗，定系借题发挥，当美国传媒追问俄罗斯外交部发言人沙卡洛娃就嬲嬲猪咁讲：“爆个军事机密俾你听：联络派驻国家政治人物，系外交官嘅工作。如果佢哋唔做联络工作，唔参与谈判，咁佢地就唔系外交官！”
 
哦明晒！即系学明福侠话斋：

既然肥伯伯已经黄咗，佢已经再无利用价值。近排佢已经同班下属讲定，自己好快会离开美国，“升”去联合国坐一个关于反恐嘅新位。咦，乜啲情节咁熟口熟面嘅？

不过讲返转头，肥伯伯又好，其他人又好，点解美国一提起俄罗斯就好似猫猫惊果时咁，后颈啲毛竖起晒嘅呢？乜佢哋唔系世界警察，好打得㗎咩？
 
讲起呢笔无可避免讲返远少少，话说二次大战后，欧洲列强全部残晒，得返地缘关系基本上打风流仗嘅俄罗斯同美国，有力成为战后仅存超级大国。当时奉行共产主义嘅苏联同行民主制度嘅美国，意识形态走向两极，陷入冷战年代。一路安安乐乐嘅美国人，唔知点解突然发现身边总有“疑似”苏联间谍，搞到总统杜鲁门要落一个好大龙凤嘅行政院指令：强制所有联邦政府雇员都要被查家宅，睇下对国家够唔够忠诚。

呢单嘢已经搞到政府上下人人自危，疑神疑鬼，美国国会入面仲有个叫做“非美调查委员会”（Un-American Activities Committee）嘅物体，不时走出嚟踢爆埋伏政府内部同荷里活嘅“共产党”。吓，荷里活又关事？或者美国政府也知道梦工场嘅威力，所以不断向电影公司施压，于是乎，业内大佬就整咗份荷里活演艺界黑名单出嚟，共产党、或者同情共产党嘅演员、导演、编剧等，全部唔请。其他行业亦有样学样。

有一个叫做麦卡锡嘅参议员就醒目喇，当人人“闻苏色变”，佢老兄自称手上有份“共产党同间谍”名单，然后边个唔听佢话就话对方系“苏联间谍”，令大批名人、学者身败名裂。果时连黑人民权领袖马丁路德金，都俾FBI局长胡佛无限上纲，屈佢系共产党。呢段咁黑暗嘅“麦卡锡年代”，真系好羞家，美国人自己都唔多愿提起。
 
所以你依家明白，点解荷里活电影入面嘅俄罗斯人，唔系黑帮就系衰人啦。呢啲角色定形，根本系当年自我政治审查一路遗留落嚟嘅产物。如果你觉得荷里活成日千篇一律好老套，美国政府其实间接有份造成。

麦卡锡主义喺1950年代中期逐渐消失，点解美国人仲系咁忌俄罗斯？我问你：边个国家最先成功发射人造卫星？苏联。边个国家最先成功送太空人上外太空？苏联。苏联太空科研劲，军事实力强，仲下下食住晒佢哋，美国人梗系唔Like啦，直到成功将太空人送上月球，美国先至扭转到太空竞赛形势咋，仲一步步成为全球大佬添。之后苏共倒台，俄罗斯更加不是美国对手，美国人又在可以安安乐乐做全球霸主了，yeah~。

佢哋又点估得到，隔咗几十年之后，会突然间爆个KGB走出嚟嘅普京，再次激活沉睡多年嘅俄罗斯吖。当时，俄罗斯衰到要赖债，政府员工迟咗成个月先出粮，基建破破落落。寡头财阀横行，挖空国家资源，曾经“好打得”嘅军队连车臣都打唔赢。谁不知普京上场后，完全变晒，尤其奥巴马八年，外交军事交白卷，益咗普京在反恐、中东事务上占尽上风。
 
“麦卡锡年代”系美国人永恒之痛，连飞云细细个读过嘅名作家海伦凯勒，都搞到被FBI监控。所以美国人真系好惊俄罗斯，呢种惊，不单在于各种实力上嘅威胁，而系连敌人在哪里，敌人是否真实存在，也不知道。所以俄罗斯随手揾班黑客搞一搞，便轻易令美国人自乱阵脚。